Asřaḥ jar Yaɛqub d Ɛisu
32
1 Ikkar Laban ɣar tuffut n ṣṣbeḥ, issudem iḥenjiren nnes d yessis, ibark i-ten. Xenni iruḥ Laban, iɛqeb ɣar wemcan nnes. 2 Uca iṭṭef Yaɛqub abrid nnes uca usint-i-dd lmalakat n AREBBI, řqant t-i-dd. ■ 3 Inna Yaɛqub umi ten iẓra: “Řmargeḥ n řɛeskar n AREBBI d wa!”, uca iřaɣa isem n wemcan nni Maḥanayim. 4 Issekk Yaɛqub ireqqasen ɣar zzat, ɣar Ɛisu umas ɣar temmurt n Saɛir, aqa-tt d jjihet n Idum. 5 Uca iweṣṣa i-ten, inna asen: “Ammu i ɣa tinim i sidi inu Ɛisu: ‘Ammu i iqqar umsexxar nnek Yaɛqub: Tuɣa zeddɣeɣ ak-d Laban am ubarrani uca qqimeɣ din ař i řexxu. 6 Ɣari ifunasen d yeɣyař d wuǧi d isemɣan d tiyya uca ssekkeɣ ireqqasen maḥend ad t iniɣ i sidi inu, maḥend ad afeɣ arḍa di tiṭṭawin nnek.’ ” 7 Ireqqasen dewřen-dd ɣar Yaɛqub, nnan: “Nruḥ ɣar umac Ɛisu, u netta ɛawed yusa-dd ad cek iřqa u aqa din arebɛmya n yeryazen akides.” 8 Xenni Yaɛqub tudef i-t tiggʷudi temɣar uca issqenḍ i-t řḥař. Netta ibḍa iwdan, inni akides d wuǧi d ifunasen d tfunasin d iřeɣman x tnayen n řemrageḥ n řɛeskar. 9 Inna: “Mařa yusa-dd Ɛisu ɣar ijj n řmargeḥ n řɛeskar, ad xas iɣřeb, xenni ad yarweř řmargeḥ n řɛeskar i iqqimen.”
10 Uca inna Yaɛqub: “A AREBBI n baba Ibrahim d AREBBI n baba Isḥaq, a SIDI, Cek wenni d ayi innan: ‘Dweř ɣar temmurt nnek d raǧ nnek uca Necc ad ac ggeɣ min icnan!’ ■
11 Aqa ayi qell x marra tamexsiwt icewwaren d marra řaman i tessecned i umsexxar nnek, minzi ẓwiɣ L'Urdun s teɣɣarct inu řami dd-ffɣeɣ uca řexxu dewřeɣ-dd d tnayen n řemrageḥ n řɛeskar.
12 Senjem ayi řexxu zeg ufus n Ɛisu uma, minzi tteggʷedeɣ balak ad dd-yas uca ad ayi ihellek uřa d tiyemmatin ak-d iḥenjiren!
13 Uca Cek tennid: ‘Necc ad kik ggeɣ mliḥ, ad ggeɣ zzariɛet nnek amecnaw ijdi n řebḥar i war izemmar ad ittwaḥseb zi ssibbet n ubarru nnes!’ ”■
14 Issens din ǧiřet nni uca iksi zi min dd-yusin deg ifassen nnes d agřa maḥend ad t yewc d arriɣalu i umas Ɛisu:
15 mitayen n tɣayḍin d ɛicrin n imuyan d mitayen n txeswin d ɛicrin n icarriyyen
16 d třatin n třeɣmin issuṭṭuden ak-d tarwa nsent, arebɛin n tyenduzin d ɛecra n iyenduzen d ɛicrin n teɣyař d ɛecra n yeɣyař.
17 Isseɛdu ten ɣar ifassen n imsexxaren nnes, kuř taḥimart weḥḥdes uca inna i imsexxaren nnes: “Ɛdum kenniw řexxu zzat inu, ggem ttasiɛ jar tḥimart d tḥimart.”
18 Xenni yumur umezwar, inna as: “Mařa yusa-dd Ɛisu i umsagar akidek uca isseqsa ac, inna: ‘Wi cek yiřan d mani i ɣa traḥed u umi tina i iǧan zzatek?’,
19 řexdenni ini: ‘D arriɣalu i iǧa n umsexxar nnek Yaɛqub, wenni dd-issekk i sidi inu Ɛisu. Xzar, netta ɛawed yusa-dd awarni aneɣ!’ ” 20 Yumur ɛawed wenni wiss tnayen d wiss třata inni igguren awarni i tḥimriwin, inna: “Siwřem awařen-a d ijjen ak-d Ɛisu, xmi t ɣa teřqam. 21 Kenniw ɛawed ad tinim: ‘Xzar, amsexxar nnek Yaɛqub yusa-dd awarni aneɣ!’ ” Minzi inna: “Ad t ssareyyḥeɣ s arriɣalu aya i dd-yusin zzat inu. Xenni awarni man aya ad ẓareɣ aɣembub nnes, balak ad iqbeř aɣembub inu zzates.”
22 Ammu i issizzar arriɣalu zzates ɣar ujemmaḍ am issens netta ǧiret nni di řmargeḥ n řɛeskar.
23 Ikkar ǧiřet nni uca iksi tnayen n temɣarin nnes d tnayen n tiyya nnes d ḥiṭac n iḥenjiren nnes, iẓwa amcan n uẓekkwu n Yabbuq. 24 Yiwyi i-ten uca isseẓwa ten i teɣzurt u marra min ɣares isseɛdu t ɣar ujemmaḍ.
25 Maca iqqim Yaɛqub weḥḥdes u netta immuɣzeř ak-d ijj n weryaz ařmi d tuffut n řefjar. 26 Umi iẓra Wanita aqa war xas iqedd ca, iḥada t ɣar wemcan n temqiqqect n tmeṣṣaḍt nnes, maḥend ad as dd-tenxuxer temqiqqect n tmeṣṣaḍt n Yaɛqub umi kides tuɣa ittmuɣzuř. 27 Inna: “Ejj ayi ad raḥeɣ, aqa iṣbeḥ řḥař.” Maca netta inna: “War Cek ttejjiɣ, mɣir mařa tbarked ayi.” ■ 28 Uca netta inna as: “Mammec d ac qqaren?” Yarra xas: “Yaɛqub.” 29 Xenni inna as: “War d ac qqaren ɛad Yaɛqub, maca Israil, minzi temmenɣed ak-d AREBBI d iwdan uca cek tɣeřbed.” □ ■ 30 Isseqsa Yaɛqub xenni, inna: “Ini ayi řexxu Isem nnek!” Yarra-dd xas: “Maɣar tesseqsid x Yisem inu?” Uca ibark i-t din. 31 Uca isemma Yaɛqub amcan nni Fanuwil, inna: “Minzi ẓriɣ AREBBI aɣembub deg uɣembub uca injem řeɛmar inu.” 32 Tenqar-dd xas tfuct umi tuɣa iɛdu x Fanuwil uca yuyur ittzeḥḥef zi tmeṣṣaḍt nnes. 33 S uya war ttᵉtten ayt n Israil ař ass-a zeg weẓwar igdaren i iǧan x tmeṣṣaḍt n wadday, minzi iḥada tameṣṣaḍt n Yaɛqub ɣar mani iǧa weẓwar igdaren.