1 Uca isřa Yaɛqub awařen n iḥenjiren n Laban, nnan: “Yaɛqub iksi marra min tuɣa n babatneɣ, u s min tuɣa n babatneɣ aqa ikseb marra aɛuǧi aya.” ^□   2 Ixzar Yaɛqub ɣar uɣembub n Laban. Xzar, war akides iǧi amecnaw iḍennaḍ d fariḍennaḍ. 3 Inna SIDI i Yaɛqub: “Dweř ɣar temmurt n řejdud nnek u ɣar řaǧ nnek. Aqa Necc ad iřiɣ akidek.” 4 Isekk Yaɛqub uca iřaɣa-dd x Raḥil d Liya ɣar yeyyar, ɣar wuǧi nnes. 5 Inna asent: “Ttwařiɣ belli aɣembub n babatkent war kidi iǧi amecnaw iḍennaḍ d fariḍennaḍ. Maca AREBBI n řejdud inu aqa-t akidi. 6 Kennint tessnent belli aqa xedmeɣ i babatkent s marra min ɣari d jjehd. 7 Maca babatkent iɣecc ayi, ibeddeř řmunet inu ɛecra n twařawin, maca AREBBI war d as isemmeḥ ḥima ad ayi igg řɣar. 8 Mařa netta inna: ‘Ibeqqiḍen ad iřin d řmunet nnek!’, řexdenni marra uǧi urwen-dd uǧi s ibeqqiḍen, mařa inna: ‘Inni s icariḍen ad iřin d řmunet nnek!’, řexdenni marra uǧi urwent-dd uǧi s icariḍen. 9 Ammu ikkes AREBBI řebhayem n babatkent uca iwca ayi tent i necc.

10 Imsar ɣar řweqt umi weḥḥment uǧi, ssgeɛɛdeɣ tamuɣři inu uca ẓriɣ di tarjit, aqa da iɣayḍen inni ineggzen x wuǧi, tuɣa aten s icariḍen d ibeqqiḍen d iqarqacen.

11 Inna ayi Lmalak n AREBBI di tarjit ‘Yaɛqub!’ Necc nniɣ ‘Aqa ayi da!’

12 Inna: ‘Nḍar tiṭṭawin nnek, xzar, marra iɣayḍen, inni ineggzen x wuǧi, aqa aten s icariḍen d ibeqqiḍen d iqarqacen, minzi Necc ẓriɣ marra min d ac ittegg Laban.

13 Necc d Arebbi n Bayt-Il, mani tdehned aẓru n řidaret u mani d ayi tewcid awař. Kkar řexxu, ffeɣ zi temmurt-a, ɛqeb ɣar temmurt mani txeřqed.’ ” ^■  

14 Xenni arrint-i-dd Raḥil d Liya, nnant as: “Ma din ɛad ca n tesɣart niɣ ict n řwart i neccin di taddart n babatneɣ?

15 Ma war nettwiḥsib amecnaw tibarraniyyin? Aqa netta izzenz aneɣ u netta aqa iqeṭṭa marra nnuqart nneɣ.

16 Minzi marra agřa nni ikkes AREBBI i babatneɣ, nneɣ i iǧa u n iḥenjiren nneɣ. Řexxu ɛad, egg marra min d ac inna AREBBI.”

17 Xenni ikkar Yaɛqub uca issgeɛɛed iḥenjiren nnes d temɣarin nnes x iřeɣman.

18 Igga deg webrid marra řebhayem nnes d marra agřa nnes nni dd-ikseb, aqa řebhayem nni iṭṭef, inni dd-ikseb di Fadan-Aram, ḥima ad dd-iɛqeb ɣar Isḥaq, babas, di temmurt n Kenɛan.

19 Umi iruḥ Laban ɣar tiřsa n wuǧi nnes, tucar Raḥil řexyařat imeẓyanen n l’aṣnam n babas. 20 Yaɛqub ixdeɛ Laban, Aramiyu, řami war d as iɛřim aqa ad yarweř. 21 Yarweř s marra min ɣares. Ikkar, iẓwa iɣzar n Lfuraṭ uca yarra azeǧif nnes ɣar wedrar n Jilɛad. ^□  

22 Deg wass wiss třata xebbaren Laban, aqa yarweř Yaɛqub. 23 Xenni yiwi aytmas akides, iruḥ awarni as ticři n sebɛa n wussan, ixecc xas deg idurar n Jilɛad. 24 Uca yusa-dd AREBBI ɣar Laban, Aramiyu, di tarjit di ǧiret, inna as: “Ɣarek ad tessiwřed s řxar niɣ s řɣar ak-d Yaɛqub.” 25 Ireḥḥeg xenni Laban x Yaɛqub. Yaɛqub tuɣa iwta aqiḍun nnes deg idurar. Laban ɛawed iwta iqiḍan nnes ak-d aytmas deg idurar n Jilɛad. 26 Xenni inna Laban i Yaɛqub: “Min teggid, teẓwid ayi uř uca tiwyid-dd yessi amecnaw timeḥbas n garra? 27 Mayemmi tarewřed s tnuffra u tucared ayi u mayemmi war d ayi txebbared, ḥima ad cek ssqebbḍeɣ s řefraḥet, s řeɣnuj, s ubendir u s řgambri? 28 War d ayi tejjid ad ssudmeɣ iḥenjiren inu d tḥenjirin inu. Řexxu d tubbuheřya i teggid. 29 Ɣari tizemmar deg ifassen inu ḥima ad cek ḍarreɣ, maca AREBBI n babatwem issiweř akidi ǧiret-a, inna: ‘Ɣarek ad tessiwřed s řxar niɣ s řɣar ak-d Yaɛqub.’ 30 Uca řexxu tuyured, umi zeɛma tweḥḥced taddart n babac. Maca maɣar i d ayi tucared irebbiten inu?” 31 Yaɛqub yarra, inna i Laban: “Minzi tuɣa ggʷedeɣ, nniɣ ak-d yixef inu ad taɣ ad ayi tekksed yessic s uɣiř! 32 Ɣar wenni i ɣa tafed l’aṣnam nnek, war itteddar! Qibač i wawmaten nneɣ ad tmeyyzed min iǧan nnek jar min iǧan ɣari uca awyi tt akidek.” Maɣar Yaɛqub war issin belli Raḥil i ten yucaren.

33 Uca yudef Laban deg uqiḍun n Yaɛqub, deg uqiḍun n Liya, deg uqiḍun n tnayen n tiyya uca war yufi walu. Řami dd-iffeɣ zeg uqiḍun n Liya, yudef ɣar uqiḍun n Raḥil. 34 Maca teksi Raḥil řexyařat imeẓyanen n l’aṣnam, tegga i-ten deg iɣaynen n weřɣem uca teqqim xasen. Yarzu Laban deg uqiḍun am ikmeř, maca war yufi walu. 35 Tenna i babas: “War ittiři aya d řɣar di tiṭṭawin n sidi inu, minzi war zemmareɣ ad kkareɣ qibač nnek, maɣar aqa ayi s tnamit n temɣarin.” Uca yarzu, maca war yufi řexyařat imeẓyanen n l’aṣnam. 36 Xenni ixeyyeq Yaɛqub uca imcubbec ak-d Laban. Yaɛqub iṭṭef deg wawař, inna i Laban “Mani iǧa uxeṭṭu inu, man wen iǧan d ddenb inu, umi d ayi dd-teḍfared s zzɛaf? 37 Cek tbeqced marra řqecc inu, min tufid zi marra řeḥwayej n taddart nnek? Egg i-ten da zzat n yaytma d aytmac uca ejj i-ten ad ḥekmen jar aneɣ s tnayen. 38 Ɛicrin n iseggʷusa i kik kkiɣ. Tixeswin nnek d tɣayḍin nnek ɛemmarṣ ma ssutment niɣ necc cciɣ icarriyen n wuǧi nnek. 39 War d ac iwyeɣ min ittwamezzqen, maca xeṭṣeɣ t simant inu. Min ittwacaren zzayi deg wass niɣ di ǧiret, aqa zeg ifassen inu tᵉttared t. 40 S uziř ittett ayi řeḥmu yuẓɣen tiřmect u s ǧiret ttejmideɣ zi sqiɛ u iḍeṣ yarweř zi ɣari. 41 Ammu i d ayi tuɣa di taddart nnek ɛicrin n iseggʷusa. Xedmeɣ ɣarek arbeɛṭac n iseggʷusa x tnayen n yessic d setta n iseggʷusa x wuǧi uca tbeddřed řmunet inu ɛecra n twařawin. 42 Mařa AREBBI n baba, AREBBI n Ibrahim d tiggʷudi n Isḥaq, iři war akidi iǧi, d ṣṣeḥ iři ad ayi tessqaded řexxu s ifassen xwan! Iẓra AREBBI tamara d tumar n ifassen inu uca ideqmar i cek ǧiřet n iḍennaḍ.”

43 Yarra Laban uca inna i Yaɛqub: “Tiḥenjirin-a d yessi u iḥenjiren-a d iḥenjiren inu, u uǧi aya d uǧi inu, u marra min tᵉttwařid aqa inu. Min zemmareɣ xenni ad ggeɣ řexxu s yessi niɣ s iḥenjiren nsent nni urwent? 44 Ɣawer ɛad řexxu, ad negg ijj n řɛahd, necc d cek, ad yiři Netta d cchadet jar ayi d cek!” 45 Uca iksi Yaɛqub aẓru, issgeɛɛed i-t amecnaw aẓru n řidaret. 46 Uca inna Yaɛqub i yaytmas: “Smunem iẓra!” Ksin iẓra uca ggin taɛurrict uca ccin din x tɛurrict nni. 47 Uca igga Laban i uɛurric n iẓra nni ‘Jigar-Sahaduta’, maca Yaɛqub igga as ‘Jilɛad’. 48 Xenni inna Laban: “Taɛurrict-a ad tiři d cchadet ass-a jar ayi d cek!” S uya tuɣa iřaɣa isem nnes Jilɛad 49 d Miṣfa, minzi netta inna: “Iři SIDI ad iḥḍa jar ayi d cek, xmi i ɣa neddar am nᵉnuffar ijjen zeg wenneɣni. ^□   50 Mařa tesseḥqared yessi niɣ ad tmeřced timɣarin nneɣni x yessi u war din iǧi ḥed akidneɣ ḥima ad yiři d acehhad, aqa AREBBI ad yiři d acehhad jar ayi d cek!” 51 Inna ɛawed Laban i Yaɛqub: “Xzar, taɛurrict n yeẓra, xzar, aẓru n řidaret nni ssbeddeɣ jar ayi d cek. 52 Taɛurrict-a n yeẓra d weẓru aya n řidaret ad cehdent belli necc war ɣarek dd-ẓekkʷiɣ ca x tɛurrict-a uca uřa d cek war ɣari dd-tẓekkʷwid ca i řɣar x tɛurrict-a uřa x weẓru aya n řidaret! 53 Irebbiten n Ibrahim d irebbiten n Naḥur, aqa irebbiten n řejdud nsen, ejj i-ten ad ḥekmen jar aneɣ!” Maca Yaɛqub ijjuǧ s ‘Tiggʷudi n Isḥaq babas’. 54 Xenni iɣarṣ Yaɛqub i yict n tɣarṣt deg idurar uca iřaɣa i yaytmas ad ccen aɣrum. Uca ccin aɣrum, senssen ǧiret nni deg idurar.