1 Raḥil teẓra belli war dd-tiruw i Yaɛqub uca tusem zeg učmas, tenna i Yaɛqub: “Ewc ayi tarwa! Mařa war teqbiřed, xenni ad mmteɣ.” 2 Ixeyyeq Yaɛqub x Raḥil, inna: “Ma aqa ayi necc deg wemcan n AREBBI wenni xam iṭṭfen řɣiǧet n uɛeddis nnem?” 3 Tenna: “Aqa da tayya inu Bilha, adef xas, ḥima ad dd-taruw x ifadden inu uca uřa d necc ad ɣari tiři tarrawt zzayes.” 4 Tewca as Bilha, tayya nnes, d tamɣart uca yudef xas Yaɛqub. 5 Teksi Bilha s ddeyset uca turuw-dd aḥenjir i Yaɛqub. 6 Tenna Raḥil: “Iwca ayi AREBBI tasɣart uca isřa ɛawed ɣari. Iwca ayi mmi.” S uya tegga as Dan. ^□   7 Teksi Bilha, tayya n Raḥil, twařa nneɣni s ddeyset uca turuw-dd i Yaɛqub aḥenjir wiss tnayen. 8 Tenna Raḥil: “S imenɣan n AREBBI menɣeɣ ak-d učma uca ɣeřbeɣ.” Tegga as Naftali.

9 Umi teẓra Liya tessbedd tarwa, teksi Zilpa, tayya nnes, tewca i-tt i Yaɛqub d tamɣart,

10 uca Zilpa, tayya n Liya, turuw-dd aḥenjir i Yaɛqub.

11 Tenna Liya: “Mana řxir-a!” uca tegga as Jad.

12 Uca turuw-dd Zilpa, tayya n Liya, aḥenjir wiss tnayen i Yaɛqub.

13 Uca tenna Liya: “A sseɛd inu!”, minzi tibřiɣin ad ayi ḥesbent d sseɛd!” Uca tegga as Acir.

14 Deg wussan n tmeyra n irden iffeɣ Rubin uca yufa ‘titeffaḥin n tayri’ deg iyyar uca netta yiwy i-tent i Liya, yemmas. Xenni tenna Raḥil i Liya: “Ttzawgeɣ cem ad ayi tewced zi ‘tteffaḥin n tayri’ n mmim.”

15 Nettat tenna as: “Ma war iǧi drus ařami tiwyed aryaz inu, umi texsed ɛawed ad dd-tawyed ‘titteffaḥin n tayri’ n mmi?” Tenna Raḥil: “Aqa ad iṭṭeṣ akidem ǧiřet-a x ‘tᵉtteffaḥin n tayri’ n mmim.” ^□  

16 Umi dd-iɛqeb Yaɛqub zeg iyyar s tmeddit, teffeɣ-dd Liya ɣares tenna as: “Ad xafi tadfed, minzi nican criɣ cek s ‘tᵉtteffaḥin n tayri’ n mmi.” Uca ammu i iṭṭeṣ akides ǧiret nni.

17 Isřa AREBBI i Liya uca teksi s ddeyset uca turuw-dd aḥenjir wiss xemsa i Yaɛqub.

18 Tenna Liya: “AREBBI iwca ayi řmunet inu x umi wciɣ tayya inu i weryaz inu!” Uca tegga as Issakar.

19 Teksi Liya ɛawed s ddeyset uca turuw-dd aḥenjir wiss setta i Yaɛqub. 20 Uca tenna Liya: “AREBBI iwca ayi ijj n lbaraka tecna. Řexxu ad kidi izdeɣ weryaz inu, minzi urweɣ as-dd setta n iḥenjiren.” Uca tegga as Zabulun. 21 Awarni as turuw-dd taḥenjirt. Tegga as Dina.

22 Xenni idar AREBBI Raḥil uca isřa as AREBBI uca yarzem řemřawřet nnes. 23 Teksi s ddeyset uca turuw-dd aḥenjir, tenna: “Ikkes AREBBI řḥegra inu!” 24 Uca tegga as Yusuf, tenna: “Ad ayi yarni SIDI aḥenjir nneɣni.”

25 Řami dd-turuw Raḥil Yusuf, inna Yaɛqub i Laban: “Sekk ayi uca ad raḥeɣ ɣar dcar inu d temmurt inu. 26 Ewc ayi timɣarin inu d iḥenjiren inu min zi ɣarek xedmeɣ. Xenni ad ffɣeɣ. Aqa cek tessned řxedmet i zi tuɣa d ac ttsexxareɣ.” 27 Inna as Laban: “Mři ufiɣ řexxu arḍa di tiṭṭawin nnek. Aqa ẓriɣ belli SIDI ibarek ayi di ṭṭweɛ nnek.” 28 Yarni inna: “Ini ayi zeɛma man řmunet i texsed. Ad ac tt wceɣ.” 29 Xenni inna as: “Cek tessned mammec d ac xedmeɣ d mammec uyureɣ ak-d řebhayem nnek zeg wami kic ǧiɣ. 30 Minzi drust i tuɣa ɣarek řexdenni qibač i tiṭṭawin inu aqa idweř deg waṭṭas, uca ibarek i cek SIDI deg iṣuraf inu. Řexxu, meřmi i ɣa zemmareɣ ad xedmeɣ i taddart inu?” 31 Inna as: “Min d ac i ɣa wceɣ?” Yarra-dd Yaɛqub: “War d ayi ttic walu, maca samḥ ayi aya waha, xenni ad dd-dewřeɣ ad arewseɣ uǧi nnek ɛawed uca ad ten ḥḍiɣ. 32 Ass-a ad ɛduɣ x marra taḥimart n wuǧi nnek. Egg x uɣezdis zzayes marra uǧi ibeqqḍen d iqarqacen, marra uǧi abarcan jar iḥuřiyyen d min iǧan d aqarqac niɣ s ibeqqiḍen jar iɣayḍen. Man aya ad yiři d řmunet inu. 33 Xmi dd ɣa tased deg ijj n wass n yimař ad tẓared řmunet inu, ad xafi teched tsegda inu zzat i wudem nnek ammu: min war iǧin ibeqqeḍ niɣ min war iǧin iqqarqec jar iɣayḍen d min iǧan d abarcan jar iḥuřiyyen, aqa ad ittwaḥseb ittwacar jar min iǧan inu.” 34 Xenni inna Laban: “Xzar, aqa ad yiři am mammec i d ayi tennid!”

35 Deg wass nni ifarq iwetman n iɣayḍen icarḍen d iqarqacen uřa d marra tiɣayḍtin ibeqqḍen d iqarqacen, d marra inni di teǧa temřeř, uřa d marra min iǧan d abarcan jar iḥuřiyyen, uca issars i-ten deg ufus n iḥenjiren nnes. 36 Xenni igga třata n wussan n webrid jar ixef nnes d Yaɛqub. Uca yarwes Yaɛqub uǧi iqqimen n Laban.

37 Xenni iksi Yaɛqub tiseḍwin n ṣṣefṣaf u zi tcejjart n ǧuz u zi tcejjart n dulb. Netta iqeccar i-tent d iceṭṭiḍen d icemřařen umi iɛarra x ucemřař n tseḍwin. 38 Issars tiseḍwin-a iqeccaren qibač i wuǧi di taryiwin d řeqwareb mani dd-usin wuǧi maḥend ad swen uca dewřen ttweḥḥamen xmi dd-tasen ad warden. 39 Xmi i ɣa iwḥḥem wuǧi ɣar tseḍwin, urwent-i-dd txeswin icarḍen d min ibeqqḍen d min iqarqcen n wuǧi. 40 Xenni tuɣa ibeṭṭa Yaɛqub iḥuřiyyen uca yarra uǧi s uzeǧif nsen ɣar min icarḍen d min iǧan d abarcan jar wuǧi n Laban. Uca igga tiḥimriwin nnes ɣar uɣezdis, war tent iggi ak-d wuǧi n Laban. 41 Kuř amuř xmi ttweḥḥament tinni ijehden zeg wuǧi, ittegg Yaɛqub tiseḍwin qibač i wuǧi di taryiwin, ḥima ad weḥḥment ɣar tseḍwin. ^□   42 Maca war tent issars ca ak-d tenni iḍeɛfen jar wuǧi. Ammu tuɣa tinni iḍeɛfen i Laban u tinni ijehden i Yaɛqub. 43 Uca imɣar wagřa n weryaz-a ba qeṭṭu. Tuɣa ɣares aṭṭas n wuǧi d tiyya d isemɣan d iřeɣman d yeɣyař.