1 Iksi Yaɛqub deg iḍaren nnes, iruḥ ɣar temmurt n ayt n ccarq. 2 Ixzar uca iẓra ijj n wanu deg iyyar u tuɣa din třata n tḥimriwin n wuǧi jnint zzates, minzi zeg wanu nni zi warrden nitni tiḥimriwin. Tuɣa din ijj n weẓru x uqemmum n wanu. 3 Ssmunen din marra tiḥimriwin. Xas uca kksen aẓru x uqemmum n wanu uca warden uǧi. Xenni arrin aẓru x uqemmum n wanu. 4 Inna asen Yaɛqub: “Aytma inu, manis kenniw?” Nitni arrin-dd: “Zi Ḥaran i neǧa.” 5 Netta inna asen: “Ma tessnem Laban, mmis n Naḥur?” Nitni arrin-dd: “Wah, nessen i-t.” 6 Inna asen netta: “Mammec iǧa?” Arrin-dd: “Aqa-t mliḥ, aqa da yeǧis Raḥil tusa-dd ak-d wuǧi.” 7 Inna as: “Aqa da aziř ɛad imɣar, war yeǧi bu řweqt ḥima ad nendeh řebhayem. Wardem uǧi uca ruḥem maḥend ad ten tarewsem.” 8 Nitni arrin-dd: “War nzemmar ad t negg ař dd ɣa munent marra tiḥimriwin. Xenni ad sseqrujjɛen aẓru x uqemmum n wanu, ḥima ad nwared uǧi.”

9 Řami tuɣa ɛad issawař akidsen , tusa-dd Raḥil s wuǧi n baba as, minzi nettat tuɣa-tt d tameksawt.

10 Řami iẓra Yaɛqub Raḥil, yeǧis n Laban, umas n yemmas, ak-d wuǧi n Laban, umas n yemmas, ixecc-dd Yaɛqub uca isseḥřuǧed aẓru x uqemmum n wanu, iward uǧi n Laban, umas n yemmas.

11 Issudem Yaɛqub Raḥil, issgeɛɛed tmijja nnes uca isɣuyy.

12 Inna Yaɛqub i Raḥil aqa netta zeg idammen n baba as i iǧa, uřa d mmis n Rifqa. Uca nettat tuzzeř, txebbar baba as.

13 Umi isřa Laban řexbar x Yaɛqub, mmis n učmas, yuzzeř ad t iřqa uca idarreɛ as, issudem i-t, indeh i-t ɣar taddart nnes. Uca netta iɛawed marra timesřayin-a i Laban.

14 Laban inna: “D tidett cek d iɣes inu d aysum inu i teǧid.” Uca iqqim ɣares řqedd n ijj n uyur ikmeř.

15 Inna Laban i Yaɛqub: “Umi cek d uma i teǧid, ma ad ɣari txedmed baṭeř? Ini ayi min i ɣa tiři řmunet nnek?”

16 Laban ɣares tnayen n yessis. Isem n tmenzut d Liya u isem n tmaẓuẓt, Raḥil.

17 Tiṭṭawin n Liya tuɣa kecɛent, maca Raḥil tuɣa dayes aẓři n waddud u n řxezrat.

18 Yaɛqub ixs Raḥil. Inna: “Necc ad ɣarek xedmeɣ sebɛa n iseggʷusa x Raḥil yeǧis tmaẓuẓt.” ^■  

19 Laban yarra-dd: “Xar ad ac tt wceɣ i cek niɣ ad tt wceɣ i weryaz nneɣni. Qqim akidi.”

20 Ammu ixdem Yaɛqub x Raḥil sebɛa n iseggʷusa maca ḍharen as-dd iseggʷusa nni amecnaw ca n wussan, minzi tuɣa ittexs i-tt. 21 Inna Yaɛqub i Laban: “Ewc ayi řexxu tamɣart inu, minzi aqa kemmřen wussan n řmijař inu, ařami as i ɣa yadfeɣ.” 22 Xenni issmun Laban marra iryazen n wemcan nni, igga urar. 23 Ɣar tmeddit iksi yeǧis Liya uca issiweḍ i-tt ɣares uca yudef xas Yaɛqub. 24 Iwca Laban tayya nnes Zilpa i yeǧis Liya d tayya nnes. 25 Tiwecca nnes iẓra Yaɛqub belli d Liya. Xenni inna i Laban: “Min dayi teggid? Ma war d ac xdimeɣ x Raḥil? Maɣar d ayi tcemted?” 26 Laban inna: “War ittiři uya di temmurt nneɣ, ad nessizzar tamaẓuẓt x tmenzut. 27 Kemmeř simana aya n wurar n ta uca ad ac newc ɛawed tin x řxedmet i ɣa tegged ssa tsawent akidi ɛad sebɛa n iseggʷusa nneɣni.” 28 Igga Yaɛqub amenni, ikemmeř simana aya n wurar. Xenni iwca as Raḥil yeǧis d tamɣart 29 uca iwca Laban tayya nnes Bilha i yeǧis Raḥil d tayya nnes. 30 Yudef Yaɛqub ɛawed x Raḥil uca ixs Raḥil ɛad ktar x Liya u isexxar as ɛawed sebɛa n iseggʷusa nneɣni.

31 Umi iẓra SIDI belli Liya tuɣa tᵉttwasseḥqar, yarzem řemřawet nnes, maca Raḥil tuɣa war dd-tᵉttiruw ca. 32 Teksi Liya s ddeyset uca turuw-dd aḥenjir, igga as Rubin, minzi tenna: “Aqa SIDI ixzar ɣar řemḥayem inu. Řexxu aqa ad ayi ixs weryaz inu.” ^□   33 Teksi ɛawed s ddeyset, turuw-dd aḥenjir, tenna: “Umi isřa SIDI belli necc ttwasseḥqareɣ, iwca ayi ɛawed wa.” Uca tegga as Cimɛun. 34 Teksi ɛawed s ddeyset, turuw-dd aḥenjir, tenna: “Řexxu twařa aya ad imun weryaz inu akidi, minzi urweɣ as-dd třata n iḥenjiren.” S uya netta igga as Lawi. 35 Teksi twařa nneɣni s ddeyset, turuw-dd aḥenjir uca tenna: “Twařa aya ad qadiɣ SIDI.” S uya tegga as Yahuda. Awarni man aya tessbedd tarwa. ^□