1 Iřaɣa Isḥaq i Yaɛqub, ibarek i-t uca issekk i-t, inna as: “War ttawi tamɣart zi yessis n Kenɛan. 2 Kkar, ruḥ ɣar Fadan-Aram, ɣar taddart n Bituwil, babas n yemmac, uca awi-dd ssenni tamɣart i cek zeg yessis n Laban, umas n yemmac. ^■   3 Arebbi, Amzemmar x kuřci, ad cek ibarek u ad ac iwc řɣiǧet uca ad cek ikettar ař ɣa tdewřed d ijj n wegraw n řegnus. 4 Iři Netta ad ac iwc lbaraka n Ibrahim, i cek u i zzariɛet nnek akidek, ḥima ad twarted tammurt nni di tzeddɣed am ubarrani, tenni iwca AREBBI i Ibrahim.” ^■   5 Xenni issekk Isḥaq Yaɛqub. Uca netta iruḥ ɣar Faddan-Aram, ɣar Laban, mmis n Bituwil, Aramiyu, umas n Rifqa, yemmas n Yaɛqub d Ɛisu.

6 Iẓra Ɛisu belli Isḥaq ibarek Yaɛqub uca issekk i-t-i-dd ɣar Faddan-Aram ḥima ad yawi i yixef nnes tamɣart ssenni, u řami t ibarek, issekk i-t, inna as: “War kessi tamɣart zeg yessis n Kenɛan!”, 7 uca iẓra Ɛisu ɛawed belli Yaɛqub iṭaɛ babas d yemmas, iruḥ ɣar Faddan-Aram. 8 Ammu iẓra Ɛisu belli yessis n Kenɛan d tiɛeffanin di tiṭṭawin n babas Isḥaq. 9 Xenni iruḥ Ɛisu ɣar Ismaɛil uca yiwi Maḥalat d tamɣart i yixef nnes, yarni tt-i-dd ɣar temɣarin nneɣni. Nettat tuɣa-tt d yeǧis n Ismaɛil, mmis n Ibrahim, učmas n Nabayut.

10 Uca iffeɣ Yaɛqub zi Bi’r-Sebɛa, iruḥ ɣar Ḥaran.

11 Yiweḍ ɣar ijj n wemcan mani yensa, minzi tuɣa tafuct teɣri. Iksi zeg yeẓra n wemcan nni, issars i-ten sadu uzeǧif nnes uca iwḍa iṭṭeṣ deg wemcan nni.

12 Yurja, aqa ijj n ddruj ibedd x temmurt uca ittḥada ixef nnes ajenna, u xzar, lmalakat n AREBBI ttařyent hekkwant zzayes. ^■  

13 U xzar, SIDI ibedd xas, inna: “Necc d SIDI, AREBBI n Ibrahim babac, d AREBBI n Isḥaq. Tammurt i xef tᵉṭṭṣed ad ac tt wceɣ i cek u i zzariɛet nnek. ^■  

14 Ad tiři zzariɛet nnek amecnaw acař n temmurt uca ad tiřiwed ɣar řɣarb d ccarq, ɣar ccamal d ljanub uca dayek u di zzariɛet nnek ad ttwabarkent marra řaǧat n temmurt. ^■  

15 Aqa ayi Necc akidek u necc ggur ad cek ḥḍiɣ manis ma tekkid, ad cek arreɣ ɣar temmurt-a, minzi Necc war cek ttejjiɣ ař ɣa kemmřeɣ min d ac nniɣ.”

16 Řami dd-ifaq Yaɛqub zi tarjit nnes, inna: “S tidett SIDI aqa-t deg wemcan-a u necc war ssineɣ ca!”

17 Tuɣa iggʷed aṭṭas, inna: “Mecḥař issaggʷad wemcan-a! Aqa ta mɣir d Taddart n AREBBI u tanita d tawwart n ujenna!”

18 Ikkar Yaɛqub uca iksi aẓru nni i tuɣa issars sadu uzeǧif nnes, igga i-t amecnaw ijj n weẓru n řidaret uca ifarreɣ zzect x uzeǧif nnes. ^■  

19 Igga amcan nni Bayt-Il, maca zeg umezwaru tuɣa isem n wemcan nni Luz. 20 Uca iwaɛd Yaɛqub, inna: “Mařa AREBBI aqa-t akidi uca ad ayi iḥḍa deg webrid i ɣa uyureɣ, ad ayi iwc aɣrum ḥima ad cceɣ d warruḍ ḥima ad arḍeɣ 21 u mařa dewřeɣ ɣar taddart n baba di řaman, xenni SIDI ad yiři d AREBBI i necc. 22 D weẓru aya i ggiɣ d aẓru n řidaret, ad yiři d Taddart n AREBBI u zi marra min d ayi ɣa tewced, ad ac wceɣ řeɛcur!”