1 Řami idweř Isḥaq d awessar u tiṭṭawin nnes ɛemcent ařami ɛřaḥař war ittwiři, iřaɣa Ɛisu, mmis amenzu, inna as: “Mmi!” Uca netta inna as: “Aqa ayi da!” 2 Uca inna: “Aqa necc wsareɣ, war ssineɣ ass i di ɣa mmteɣ. 3 Řexxu, ksi řesnaḥ nnek, d weqrab nnek n fřitcat d řqews, teffɣed ɣar řexřa uca gmar ayi-dd taymart i macca. 4 Sewjed ayi-dd ict n macca icnan i d ayi ɣa iɛejben uca tewced ayi tt-i-dd, ad tt cceɣ, ḥima ad cek barkeɣ qbeř ma ad mmteɣ.” 5 Rifqa tuɣa tesřa umi issiweř Isḥaq ak-d mmis Ɛisu. Uca iruḥ Ɛisu ɣar řexřa ḥima ad iymar timiyra maḥend ad tt-i-dd-yawi. 6 Xenni tessiweř Rifqa ak-d Yaɛqub mmis, tenna as: “Xzar, necc sřiɣ babac issawař ak-d Ɛisu umac, inna as: 7 ‘Awi ayi-dd ijj n teymart uca sewjed ayi ict n macca lemliḥ maḥend ad tt cceɣ, ḥima necc ad ac barkeɣ qibač i wudem n SIDI qbeř ma ad mmteɣ.’ 8 Řexxu, mmi, seř-dd ɣari min zi cek ɣa umureɣ. 9 Řuh ɣar tḥimart uca awi ayi-dd tnayen n iɣayḍen imeẓyanen. Necc ad zzaysen sswejdeɣ ijj n macca icnan i babac, am mammec d as ittaɛjib

10 u ittxeṣṣa cek ad t tawyed i babac, ad yecc, ḥima ad cek ibarek qbeř řmewt nnes.”

11 Xenni inna Yaɛqub i Rifqa, yemmas: “Xzar, Ɛisu uma d aryaz bu-cɛar u necc d aryaz d ařeqqaɣ.

12 Balak ad ayi iḥada baba uca ad iřiɣ amecnaw aɣeccac di tiṭṭawin nnes. Xenni ad ksiɣ ict n nneɛřet xafi maci lbaraka.”

13 Yemmas tenna as: “Nneɛřet nnek ad tiři xafi, a mmi! Ṭaɛ i wawař inu waha, awyi ten-dd ɣari.”

14 Xenni netta iruḥ, iksi ten uca yiwyi ten i yemmas. Uca yemmas tegga ijj n macca icnan am mammec d as ittaɛjib i babas.

15 Teksi Rifqa arruḍ ifeccḥen aṭṭas i tuɣa ɣares di taddart zeg warruḍ n Ɛisu, mmis amenzu, uca tarḍ i-t Yaɛqub, mmis amaẓuẓ. ^□  

16 Tegga as iřem n iɣayḍen imeẓyanen x ifassen nnes u x yiri nnes ařeqqaɣ.

17 Tewca macca aya icnan ak-d weɣrum nni tegwa deg ifassen n mmis Yaɛqub.

18 Netta yusa-dd ɣar babas, inna: “Baba inu!” Netta inna: “Aqa ayi da! Min teɛnid cek, mmi inu?”

19 Inna Yaɛqub i baba as: “Necc d Ɛisu, amenzu nnek. Ggiɣ min d ayi tennid. Kkar řexxu, qqim, ecc zi tmeyra inu, ḥima ad ayi ibarek řeɛmar nnek.” 20 Xenni inna Isḥaq i mmis: “Mammec teggid tufid tt deɣya, a mmi inu?” Inna: “Maɣar SIDI, AREBBI nnek, igga i-tt deg webrid inu.” 21 Isḥaq inna i Yaɛqub: “Qarreb-dd řexxu, ḥima ad cek ḥadiɣ, mmi inu, ma cek d mmi Ɛisu niɣ lla.” 22 Řami dd-iqarreb Yaɛqub ɣar babas Isḥaq, iḥada t uca inna: “Tmijja d tmijja n Yaɛqub, maca ifassen d ifassen n Ɛisu.” 23 Netta war t iɛqiř, minzi ifassen nnes tuɣa ceɛɛaren amecnaw ifassen n Ɛisu uca ibark i-t. 24 Inna: “Ma d cek d mmi Ɛisu?” Netta inna: “D necc!” 25 Xenni inna: “Sqarreb ayi tt-i-dd zzati ḥima ad cceɣ zi tmeyra n mmi, ḥima necc ad cek barkeɣ.” Issars i-tt-i-dd zzates uca icca. Yiwi as-dd ɛawed binu uca iswa. ^□   26 Inna as babas Isḥaq: “Qarreb-dd ɣari řexxu, sudem ayi, mmi inu!” 27 Uca iqarreb-dd ɣares, issudem i-t. Icemm Isḥaq arriḥet n warruḍ nnes uca ibark i-t, inna: “Xzar, řefwaḥet n mmi amecnaw řefwaḥet n yeyyar i ibarek SIDI. 28 Iři AREBBI ad ac iwc nnda n ujenna u zi řeydam n temmurt d waṭṭas n imendi d binu n jdid. ^■   29 Ad ac xedmen řegnus uca ccuɛub ad cek aḍaren. Ḥkem x aytmac u ejj iḥenjiren n yemmac ad ac sejden! Inni cek i ɣa ineɛřen, ad ttwaneɛřen, u inni i cek ɣa ibarken, ad ttwabarken.” ^■  

30 Awarni řami ikemmeř Isḥaq lbaraka i Yaɛqub u am dd-iffeɣ Yaɛqub ɛad x babas Isḥaq, iɛqeb-dd Ɛisu umas zi teymart nnes. 31 Issewjed xenni ict n macca icnan uca iksi tt ɣar babas, inna as: “Ttzawgeɣ, baba, kkar tecced zi teymart n mmic, ḥima cek ad ayi tbarked.” ^□   32 Inna as Isḥaq, babas: “Min teɛnid cek?” Netta inna: “Necc d mmic, amenzu nnek, Ɛisu.” 33 Uca ibda Isḥaq ad yarjij aṭṭas, inna: “Min iɛna wanita i dd-yusin da, iṭṭef taymart uca yiwi ayi tt-i-dd? Cciɣ zi marra man aya qbeř ma ad dd-tased uca necc barkeɣ t u ad ittwabarek ɛawed.” 34 Umi isřa Ɛisu awařen n babas, isɣuyy s yijj n řeɛyudat ijhed yarzeg, inna i babas: “Barek ayi uřa d necc, a baba inu!” ^■   35 Inna: “Yusa-dd umac s teḥraymect, iksi lbaraka nnek.” 36 Xenni inna: “Ma war iǧi isem nnes s řḥeqq Yaɛqub? Aqa icmet ayi tnayen n twařawin. Iksi řḥeqq n umenzu inu uca aqa řexxu iksi ɛawed lbaraka inu.” Xenni inna: “Ma war ɣarek teqqim ca n lbaraka i necc?” ^■   37 Xenni yarra-dd Isḥaq, inna i Ɛisu: “Xzar, necc ggiɣ t d řḥakem xak uca wciɣ as aytmas d imsexxaren, uřa s imendi d binu n jdid ɛewwřeɣ t. Min din ɛad, ad ac wceɣ řexxu, mmi inu?” 38 Inna Ɛisu i babas: “Ma ɣarek mɣir lbaraka aya waha, baba inu? Barek ayi ɛawed, uřa d necc, a baba inu!” Uca issgeɛɛed Ɛisu tmijja nnes, isɣuyy. ^■   39 Xenni yarra-dd Isḥaq x babas, inna as: “Xzar, ad tiři tzeddiɣt nnek iggʷejjen x řeydam n temmurt u x nnda n ujenna sennej. 40 S ssif nnek i ɣa teqqimed teddared u ad txedmed i umac. Maca xmi i ɣa teqqimed ad tenhezzed, ad imsar ad tawḍed ad tekksed zayřu nnes x yiri nnek.”

41 Uca icarh Ɛisu Yaɛqub di ssibbet n lbaraka i zi t ibarek babas uca inna Ɛisu deg wuř nnes: “Ad awḍen wussan n uɛezzi n baba, xenni ad nɣeɣ uma Yaɛqub.” 42 Umi nnan i Rifqa awařen n Ɛisu, mmis amenzu, tessekk ijjen ad iřaɣa i Yaɛqub, mmis amaẓuẓ, tenna as: “Xzar, Ɛisu umac yarezzu mammec zzayek i ɣa ixřef, netta ixs ad cek ineɣ. 43 Řexxu, mmi inu, ṭaɛ i wawař inu. Kkar uca tarewřed ɣar Ḥaran ɣar uma Laban. 44 Zdeɣ akides ca n wussan ař ɣa ixsi wesɛar n umac. 45 Xmi i ɣa ixsi uxeyyeq n umac uca ad ittu min d as teggid, necc ad ssekkeɣ ijjen, maḥend ad cek dd-yawi ssenni. Mayemmi i zzaywem ɣa ttwaḥarrmeɣ s tnayen idwem deg ijj n wass?” 46 Tenna Rifqa i Isḥaq: “Carheɣ tudart inu di ssibbet n yessis n Ḥit. Mařa Yaɛqub yiwi tamɣart zi tebřiɣin n Ḥit, amecnaw tnayen-a, zi tḥenjirin n temmurt-a, man lqima i ɣa yiřin ɣar tudart inu?” ^■