1 Tuɣa iǧa řaẓ di temmurt, ijj n řaẓ nneɣni ɣar umezwar nni tuɣa iǧan deg wussan n Ibrahim. S uya iruḥ Isḥaq ɣar Abimalik, ajeǧid n Ifilisṭiniyyen, ɣar jjwayeh n Jirar. 2 Dinni iban as-dd SIDI, inna: “War hekkwi ca ɣar Miṣra. Zdeɣ di temmurt i d ac ɣa iniɣ. 3 Zdeɣ di temmurt-a am ubarrani u Necc ad kik iřiɣ, ad cek barkeɣ, minzi i cek u i zzariɛet nnek umi ɣa wceɣ marra timmura aya uca ad kemmřeɣ tjaǧit i jjuǧeɣ i Ibrahim babac. ^■   4 Ad kettareɣ zzariɛet nnek amecnaw itran n ujenna uca ad wceɣ i zzariɛet nnek marra timmura aya. Marra řegnus n ddunect ad ttwabarken di zzariɛet nnek, ^■   5 minzi isřa Ibrahim i wawař inu uca iḥḍa min d as wciɣ maḥend ad iḥḍa: řumurat inu, tiweṣṣa inu d izerfan inu.” 6 Ammu i izdeɣ Isḥaq di Jirar.

7 Řami t sseqsan iryazen n wemcan nni x temɣart nnes, inna asen: “Nettat d učma”, minzi iggʷed ad yini: “D tamɣart inu”. Maɣar inna deg yixef nnes: “Mařa war nniɣ amenni ad ayi nɣen iryazen n wemcan-a di ṭṭweɛ n Rifqa, minzi aqa dayes aẓri.” 8 Řami din izdeɣ aṭṭas n wussan, imsar belli Abimalik, ajeǧid n Ifilisṭiniyyen, ixzar-dd zi řkazi, iẓra Isḥaq ittɛatab Rifqa, tamɣart nnes. 9 Uca iřaɣa Abimalik x Isḥaq, inna as: “Xzar, ta s tidett d tamɣart nnek! Mammec teggid tennid aneɣ d učma?” Isḥaq inna as: “S minzi nniɣ i yixef inu: ‘Aqa tiři ad ayi nɣen x ssibbet nnes.’ ”

10 Abimalik inna: “Maɣar d aneɣ teggid aya? X drus ad yiři iṭṭeṣ ca n ijj zi řgens ak-d temɣart nnek uca ad tiři teggid ddenb nnek x yiři nneɣ.”

11 Yumur Abimalik marra řgens, inna: “Wenni i ɣa iḥadan aryaz-a niɣ tamɣart nnes, ad t nɣen nican!”

12 Izarɛ Isḥaq di temmurt nni uca iksi aseggʷas nni mya n imuren n zzyada, minzi ibark i-t SIDI.

13 Temmarni ccenɛet n weryaz nni uca netta iqqim imeqqar ařami tedweř ccenɛet nnes d tameqqrant aṭṭas.

14 Tuɣa ɣares uǧi u ɣares ɛawed ifunasen d tfunasin d waṭṭas n isemɣan, ařami zzayes usmen Ifilisṭiniyyen.

15 Marra anuten nni iɣzan imsexxaren deg wussan n Ibrahim babas, netyen ten Ifilisṭiniyyen uca ccuren ten s ucař.

16 Xenni inna Abimalik i Isḥaq: “Beɛɛed xaneɣ, minzi tdewřed tjehded xaneɣ s waṭṭas.”

17 Isḥaq iruḥ ssenni, iwta iqiḍan nnes di teɣzurt n Jirar uca izdeɣ dinni.

18 Uca idweř Isḥaq iɣza anuten n waman inni tuɣa ɣzin deg wussan n Ibrahim babas, inni netyen Ifilisṭiniyyen awarni řmewt n Ibrahim. Isemma ten s ismawen inni d asen iřaɣa babas.

19 Uca imsexxaren n Isḥaq ɣzan di teɣzurt nni uca ufin din řɛunṣar n waman ddaren. 20 Xenni qacḥen imeksawen n Jirar ak-d imeksawen n Isḥaq, nnan: “Aman nneɣ!” S uyenni řaɣan isem n řɛunṣar nni ‘Ɛisiq’, minzi tuɣa ttqacaḥen xas. ^□   21 Xenni ɣzan ijj n řɛunṣar nneɣni uca mmennɣen xas ɛawed. S uyenni d as igga isem n Sitna. 22 Uca ibeɛɛed ssenni, iɣza ijj n řɛunṣar nneɣni, war xas qicḥen ca uca ggin as isem nnes Raḥubut, inna: “Řexxu SIDI iwca aneɣ ttasiɛ uca ad ɣarneɣ tiři řɣiǧet di temmurt.” 23 Uca igeɛɛed ssenni ɣar Bi’r-Sebɛa.

24 Iban as-dd SIDI di ǧiret nni, inna as: “Necc d AREBBI n Ibrahim babac! War tteggʷed ca, aqa Necc akidek u Necc ad cek barkeɣ, ad kettareɣ zzariɛet nnek di ṭṭweɛ n umsexxar inu Ibrahim.” 25 Xenni ibna din ijj n uɛalṭar min xef igga taɣarṣt, uca iřaɣa Isem n SIDI. Iwta din aqiḍun nnes uca ɣzin din imsexxaren n Isḥaq ijj n wanu. 26 Abimalik yusa-dd ɣares zi Jirar, ak-d Ahuzzat, ameddukkeř nnes, d Fikul, akumandar ameqqran n řɛeskar nnes. 27 Inna asen Isḥaq: “Maɣar ɣari dd-tusim, waxxa kenniw tcarrhem ayi uca tessuffɣem ayi xawem?” 28 Nitni nnan: “Aqa neẓra belli SIDI akidek. S uya nenna, ad din tiři řexxu ict n tjaǧit jar aneɣ d cek, uca ejj aneɣ ad kik negg ijj n řɛahd 29 ḥima cek war d aneɣ tᵉttegged řɣar, am mammec uřa d neccin war cek nettḥidi ca uca aqa nemmṣurref akidek mliḥ uca nessekk i cek di řaman. Aqa cek řexxu d amimun n SIDI!” 30 Xenni igga asen amensi uca ccin, swin. 31 Kkaren zic uca jjuǧen ijjen i wenneɣni. Xas uca issqebbeḍ i-ten Isḥaq uca ruḥen nitni zi ɣares di řehna.

32 Deg wass d ijj usin-dd imsexxaren n Isḥaq, xebbaren t x wanu i iɣzan uca nnan as: “D aman i nufa.” 33 Isemma tanut-a Sebɛa. S uya i iǧa yisem n tendint nni Bi’r-Sebɛa, ař ass-a.

34 Umi tuɣa ɣar Ɛisu arebɛin n iseggʷusa, yiwi Yudit, yeǧis n Biri, Aḥitti, d tamɣart, uřa d Basmat, yeǧis n Ilun, Aḥitti. ^□   35 Tuɣa atent d tarzugi n wuř i Isḥaq d Rifqa. ^■