1 Uca iksi Ibrahim tamɣart nneɣni, qqaren as Qatura. ^□   2 Netta turuw as-dd Zimran, Yaqcan, Midyan, Yicbaq d Cuḥa. ^■   3 Yuqcan ijja-dd Caba d Dadan. Uca arrawen n Dadan tuɣa aten d Iccuriyyen d Ilituciyyen d Iliyumiyyen. 4 Iḥenjiren n Midyan tuɣa aten d Ɛiyfa, Ɛifar, Ḥanux, Abidaɛ d Aldaɛa. Marra ina tuɣa aten d iḥenjiren n Qaṭura. 5 Ibrahim iwca marra min ɣares i Isḥaq. ^■   6 Maca i iḥenjiren n tiyya i tuɣa ɣar Ibrahim, iwca asen Ibrahim arriɣalut uca, am t tuɣa ɛad iddar, issekk i-ten ssenni ɣar ccarq, ɣar temmurt n ccarq, issiggʷej i-ten x Isḥaq mmis. 7 Ibrahim tuɣa iddar mya u-xemsa u-sebɛin n iseggʷusa, wa d řmijař n tudart nnes. 8 Iḍřeq Ibrahim i buḥbeř nnes uca immut di ccib isegged, tewsar di tyawant. Uca ittwassmun deg wenḍeř ak-d řejdud nnes. ^■   9 Isḥaq d Ismaɛil, iḥenjiren nnes, neḍřen t deg ifri n Makfila deg iyyar n Ɛifrun, mmis n Ṣuḥar, Aḥitti, iyyar i iǧan qibač i Mamri.

10 Ittwanḍeř Ibrahim d temɣart nnes Sara deg iyyar nni isɣa Ibrahim zeg iḥenjiren n Ḥit.

11 Uca imsar, awarni i řmewt n Ibrahim, AREBBI ibarek mmis Isḥaq. Uca izdeɣ Isḥaq zzat i wanu n ‘Laḥay-Ru’i’. ^□  

12 Ina d imezruyen n yinni dd-ittwaxeřqen zi Ismaɛil, mmis n Ibrahim, inni dd-tejja Hajar, tayya n Sara zi Miṣra, i Ibrahim.

13 D yina d ismawen n iḥenjiren n Ismaɛil, s ismawen nsen ɛlaḥsab axřaq nsen. Amenzu n Ismaɛil tuɣa-t d Nabayut, xenni Qidar, Adbiyil, Mibsam, ^■  

14 Misma, Duma, Massa,

15 Ḥadad, Tayma, Yaṭur, Nafic d Qidma.

16 D yina d iḥenjiren n Ismaɛil s ismawen nsen, s tneddam nsen ifaryen d tqesfin nsen: tenɛac n arruyas s tqebbař nsen.

17 Tuɣa iddar Ismaɛil mya u-sebɛa u-třatin n iseggʷusa. Xenni iḍřeq Ismaɛil i buḥbeř nnes, immut uca ittwasmun ak-d řejdud nnes.

18 Nitni zedɣen zi Ḥawila ɣar Cur, wenni iǧan arendad n Miṣra, am tᵉṭṭfed abrid ɣar Accur. Netta izdeɣ arendad n marra aytmas.

19 Ina d imezruyen n yinni dd-ittwaxeřqen zi Isḥaq, mmis n Ibrahim. Ibrahim ijja-dd Isḥaq. 20 Tuɣa ɣar Isḥaq arebɛin n iseggʷusa umi yiwi Rifqa d tamɣart. Nettat d yeǧis n Bituwil, Aramiyu zi Faddan-Aram, učmas n Laban, Aramiyu. 21 Iḥeccem Isḥaq SIDI di ṭṭweɛ n temɣart nnes, tenni tuɣa war ittirwen ca, uca istajeb as SIDI s tẓaǧit nnes yuǧɣen, ařami teksi temɣart nnes, Rifqa, ddeyset. ^■   22 Uca mmdehsen iḥenjiren deg uɛeddis nnes. Xenni tenna: “Manawya ɛawed, mayemmi d ayi ittemsar manawya?”, uca truḥ ad tesseqsa SIDI. 23 Inna as SIDI: “Aqa din tnayen n řegnus di ddeyset nnem u tnayen n ccuɛub ad mmsebḍan zi dwaxeř nnem. Ijj n ccaɛb ad yiři ijhed x ccaɛb nneɣni u wenni d amenzu ad ixdem x uamaẓuẓ.” ^■   24 Ařami dd-iwḍen wussan nnes ad taru, xzar, aqa da deg uɛeddis nnes acniwen. 25 Iffeɣ-dd umezwar. Tuɣa-t d azeggʷaɣ, iceɛɛar qaɛ amecnaw ict n thiḍurt. S uyenni ggin as Ɛisu. ^□   26 Awarni as iffeɣ-dd umas. Iṭṭef afus nnes deg unirz n Ɛisu. S uya t semman Yaɛqub. Tuɣa ɣar Isḥaq settin n iseggʷusa ɣar wexřaq nsen. ^■  

27 Řami gman iḥenjiren, idweř Ɛisu d ijj n weryaz issen aneymar, ijj n weryaz n barra, maca Yaɛqub idweř d ijj n weryaz yarsa, wenni izeddɣen deg iqiḍan. ^□   28 Isḥaq tuɣa ittexs Ɛisu, minzi iɛjeb as ad yecc aysum n řmař n řexřa, u Rifqa tuɣa tᵉttexs Yaɛqub. 29 Uca issegw Yaɛqub ijj n macca uca xenni iɛqeb-dd Ɛisu zi řexřa, tuɣa yuḥeř. 30 Inna Ɛisu i Yaɛqub: “Ttzawgeɣ cek ad ayi tewced ad cceɣ zeg uzeggʷaɣ, azeggʷaɣ nni diha, maɣar aqa fniɣ s ufadi.” S uya qqaren as ‘Idum’. ^□   31 Řexdenni inna Yaɛqub: “Zenz ayi ass-a řḥeqq nnek n umenzu.” 32 Inna Ɛisu: “Xzar, aqa necc ggur ad mmeteɣ, min ɣa ggeɣ s řḥeqq n umenzu?” ^■   33 Xenni inna Yaɛqub: “Jaǧ ayi řexxu!” Uca ijjuǧ as, izzenz i Yaɛqub řḥeqq n umenzu nnes. 34 Xas uca iwca Yaɛqub i Ɛisu aɣrum d umecři n řeɛdes, u Ɛisu icca, iswa, ikkar, iruḥ. Ammu isseḥqar Ɛisu řḥeqq n umenzu nnes.