1 Ibrahim tuɣa iwsar u imɣar deg wussan uca SIDI ibarek Ibrahim di kuřci. 2 Xenni inna Ibrahim i umsexxar nnes awessar nni iǧan x taddart nnes, awkiř n marra min ɣares: “Egg řexxu afus nnek sadu tmeṣṣaḍt inu, ^■   3 ad ac ssjjaǧeɣ s SIDI, AREBBI n ijenwan d AREBBI n temmurt, belli war dd-tᵉttiwyed tamɣart i mmi zi tḥenjirin n Ikenɛaniyyen mani zedɣeɣ necc jar asen, ^■   4 maca ad traḥed ɣar temmurt i zi dd-usiɣ, ɣar raǧ inu maḥend ad dd-tawyed tamɣart i mmi Isḥaq.” 5 Inna as umsexxar: “Balak war tᵉttexs temɣart ad ayi dd-teḍfar ɣar temmurt-a. Ma ittxeṣṣa ad arreɣ mmic ɣar temmurt nni manis dd-tusid?” 6 Inna as Ibrahim: “Ḥḍat, war dd-ttarri ca mmi dinni! 7 SIDI, AREBBI n ujenna, wenni d ayi-dd inedhen zi taddart n baba u zi temmurt n raǧ inu uca issiweř-dd ɣari uca ijjuǧ ayi umi d ayi inna: ‘I zzariɛet nnek ad wceɣ tammurt-a!’, d Netta i ɣa issekken Lmalak nnes zzat i wudem nnek maḥend ad tawyed ssenni tamɣart i mmi. ^■   8 Mařa tamɣart war tᵉttexs ad cek dd-teḍfar, ad tiřid třellid zi tjaǧit-a, mɣir war dd-ttarri din mmi.” 9 Issars umsexxar afus nnes sadu tmeṣṣaḍt n Ibrahim, sidis, uca ijjuǧ as x man aya.

10 Iksi umsexxar ɛecra n iřeɣman n sidis, iruḥ uca tuɣa ɣares ɛřam kuř agřa iɣřan n sidis. Ikkar uca iṭṭef abrid ɣar temmurt n ‘Aram jar tnayen n iɣezran’, aqa-tt d Misubutamya, ɣar tendint n Naḥur. ^□  

11 Ɣar uxecci n tmeddit ijja iřeɣman ad jjnen barra i tendint zzat i řɛunṣar n waman, ɣar tsaɛɛet i di dd-ffɣent temɣarin maḥend ad ayment aman.

12 Xenni inna: “SIDI, AREBBI n sidi inu Ibrahim, ttzawgeɣ cek ad ayi tɛawned ass-a uca scen tamexsiwt nnek icewwaren i sidi inu Ibrahim.

13 Aqa ayi ɣar řɛunṣar n waman d tḥenjirin n yeryazen n tendint ggur ad dd-ffɣen maḥend ad ayment aman.

14 Ejj taḥenjirt nni umi ɣa iniɣ: ‘Sehwa-dd aqbuc nnem, mařa texsed, ad sweɣ!’, uca xenni ad tini: ‘Su, ad wardeɣ uřa d iřeɣman nnek!’, aqa d nettat i teggid i umsexxar nnek Isḥaq, u s uya ad ssneɣ aqa tessecned tamexsiwt nnek icewwaren i sidi inu.”

15 Uca ɛad qbeř ma ad ikemmer awař, iẓra Rifqa, tenni i dd-yurwen i Bituwil, mmis n Milka, tamɣart n Naḥur umas n Ibrahim, teffeɣ-dd zi tendint s weqbuc nnes x teɣruḍt. ^■  

16 Taḥenjirt tuɣa dayes aẓri imɣar, d taɛzarect, war tt issin weryaz. Nettat tehwa-dd ɣar řɛunṣar, teccur aqbuc nnes uca tgeɛɛed ɛawed.

17 Yuzzeř ɣares umsexxar nni, inna: “Ttzawgeɣ cem ad ayi tewced ad sweɣ cwayt n waman zeg weqbuc nnem!”

18 Nettat tenna: “Su, a sidi inu!” Tqeǧeq tessehwa aqbuc nnes x ufus nnes, tewca as ad isu.

19 Řami d as tewca iswa mliḥ, tenna: “Ad aymeɣ aman ɛawed i iřeɣman nnek, ař ɣarsen i ɣa yiři s zzyada.” 20 Tqeǧeq tessexwa aqbuc di tarya, tuzzeř ɛawed ɣar řɛunṣar ḥima ad tayem aman, uca tuyem asen-dd aman i iřeɣman nnes marra. 21 Waxxa itebhet dayes weryaz, waxxa amenni isqar ḥima ad issen ma SIDI issehwen xas abrid nnes niɣ lla. 22 Umi jjiwnen iřeɣman tisessi, iksi weryaz deg ijj n umur ict n txadent n wureɣ tenni iwezznen azyen ciqlu d tnayen n tmeqyasin i ifassen nnes tinni iwezznen ɛecra ciqlu n wureɣ, 23 inna: “Ini ayi, umi teggid d yeǧis? Ma aqa din amcan di taddart n babam mani nzemmar ad nessens?” 24 Nettat tenna as: “Necc d yeǧis n Bituwil, mmis n Milka, wenni i-tt-i-dd-yurwen i Naḥur.” ^■   25 Uca tarni tenna as: “Aqa ɛawed ɣarneɣ aṭṭas n uřum d iɣeǧ u ɣarneɣ ɛawed amcan i tmensiwt.” 26 Uca yuḍar weryaz uca ibbendeq i SIDI, 27 inna: “Ad ittwabarek SIDI, AREBBI n sidi inu Ibrahim, wenni war ikkisen tamexsiwt nnes icewwaren d řaman nnes zi sidi inu. Indeh ayi SIDI deg webrid ɣar taddart n wawmaten n sidi inu.”

28 Tuzzeř taḥenjirt, tɛawed timesřayin-a i yemmas di taddart. 29 Uca Rifqa tuɣa ɣares umas, qqaren as Laban, uca Laban yuzzeř ɣar weryaz nni tuɣa din di barra ɣar řɛunṣar. 30 Tuɣa iẓra taxadent d tnayen n tmeqyasin deg ifassen n učmas uca isřa i wawařen i tuɣa teqqar učmas Rifqa, tenna: “Ammu i kidi issiweř weryaz nni.” Uca yuyur ɣar weryaz. Xzar, ibedd diha zzat i iřeɣman, ɣar řɛunṣar. 31 Inna: “Araḥ-dd, a cek d amimun n SIDI! Mayemmi teqqimed di barra, necc aqa sswejdeɣ taddart d wemcan i iřeɣman.” 32 Iruḥ weryaz akides ɣar taddart u netta iḍřeq i iseɣwan n iřeɣman. Netta iwca asen řum d macca, uca iksi aman ḥima ad issird iḍaren nnes uřa d iḍaren n iryazen nni kides iǧan. 33 Issars zzates min ɣa yecc. Uca netta inna: “War ttᵉtteɣ qbeř i ɣa iniɣ tabrat inu.” Netta inna as: “Siweř!” 34 Xenni inna: “Necc d amsexxar n Ibrahim. 35 SIDI ibark sidi inu aṭṭas s waṭṭas uca ccan nnes imɣar aṭṭas. Aqa iwca as uǧi d ifunasen d tfunasin, nnuqart d wureɣ, isemɣan d tiyyiwin, iřeɣman d yeɣyař. 36 D Sara, tamɣart n sidi inu, turuw-dd aḥenjir i sidi inu awarni umi tewsar u netta iwca as marra min ɣares. 37 Uca sidi inu ijja ayi jjuǧeɣ, inna: ‘War dd-ttawi tamɣart i mmi zi tḥenjirin n Ikenɛaniyyen, inni mani zedɣeɣ di temmurt nsen. 38 Uct xak mařa war ttriḥed ɣar taddart n baba, ɣar raǧ inu uca ad dd-tawyed tamɣart i mmi zi ssenni.’ 39 Xenni necc nniɣ i sidi inu: ‘Balak tamɣart war d ayi-dd tḍeffar.’ 40 Uca netta inna ayi: ‘SIDI i umi uyureɣ zzat i wudem nnes, aqa Netta ad dd-issekk Lmalak nnes akidek uca ad xak issehwen abrid nnek ař dd ɣa tawyed i mmi ict n temɣart zi řaǧ inu u zi taddart n baba. 41 Ad tiřid tfekked zi tjaǧit i d ayi tejjuǧed, xmi i ɣa traḥed ɣar řaǧ inu u nitni war d ac tt tticen, xenni ad cek ssuffɣeɣ zi tjaǧit nnek i tuɣa tejjuǧed.’ 42 Ass-a usiɣ-dd ɣar řɛunṣar uca nniɣ: ‘A SIDI, AREBBI n sidi inu Ibrahim, ttzawgeɣ ad tesshewned řexxu abrid x wenni di ggureɣ. 43 Aqa ayi da zzat i řɛunṣar n waman. Ejj ad tiři ammu, aqa taɛzarect tenni dd ɣa iffɣen maḥend ad tayem aman u i tenni umi ɣa iniɣ: Ewc ayi ad sweɣ cwayt n waman zeg uqbuc nnem! 44 uca xenni nettat ad ayi tini: Su cek u necc ad aymeɣ ɛawed i iřeɣman nnek!, d ta ad tiři d tamɣart nni d issewjed SIDI i mmis n sidi inu.’ 45 Uca qbeř ma ad kemmřeɣ tẓaǧit-a deg wuř inu, xzar, Rifqa teffeɣ-dd s uqbuc nnes x teɣruḍt nnes, tehwa ɣar řɛunṣar uca tuyem-dd aman. Nniɣ as: ‘Ttzawgeɣ cem ad ayi tewced ad sweɣ!’ 46 Deɣya tessehwa aqbuc nnes, tenna: ‘Su u necc ad ssesweɣ ɛawed iřeɣman nnek!’ Swiɣ uca nettat tewca ɛawed i iřeɣman ad swen. 47 Sseqsiɣ tt, nniɣ: ‘Umi teggid d yeǧis?’ Nettat tarra: ‘Yeǧis n Bituwil, mmis n Naḥur wenni d as dd-yurwen Milka.’ Xenni ggiɣ as taxadent di tinzart nnes d tmeqyasin deg ifassen nnes. 48 Xas uca uḍareɣ, bendqeɣ i SIDI uca barkeɣ SIDI, AREBBI n sidi inu Ibrahim, wenni d ayi inedhen nican x webrid ḥima ad dd-awyeɣ iǧis n umas n sidi inu d temɣart i mmis. 49 Řexxu, mařa kenniw texsem ad tessecnem tamexsiwt icewwaren d řaman i sidi inu, ini ayi t, mařa lla, ini ayi t ɛawed, xenni ad kkeɣ yeffus niɣ zeřmaḍ.” 50 Xenni Laban d Bituwil arrin-dd, nnan: “Zi SIDI i dd-iffeɣ uya, war nzemmar ad dayek nini řɣar niɣ řxar. 51 Xzar, Rifqa qibač nnek, ksi tt uca truḥed uca ad tiři d tamɣart n mmis n sidi nnek, am mammec inna SIDI!”

52 Umi isřa umsexxar n Ibrahim awařen nsen, ibbendeq ɣar temmurt zzat i SIDI. 53 Uca issuffeɣ-dd umsexxar řeqcuɛ n nnuqart d řeqcuɛ n wureɣ d warruḍen, iwca i-ten i Rifqa. Ɛawed iwca tarzeft iɣřan i umas d yemmas. 54 Ccin, swin, netta d yeryazen inni kis dd-yusin. Ssensen din uca faqen ɣar ṣṣbeḥ. Xenni inna: “Samḥem ayi ad raḥeɣ řexxu ɣar sidi inu!” 55 Arrin-dd umas d yemmas: “Ejj tabřiɣt akidneɣ waxxa mɣir ɛecra n wussan, awarni as ad tuyured.” 56 Maca netta inna asen: “War dayi tᵉṭṭifem ɛad umi SIDI issehwen abrid inu! Mɣir ejj ayi ad raḥeɣ ɣar sidi inu.” 57 Nitni arrin-dd řexdenni: “Ejj aneɣ ad nřaɣa i tebřiɣt, ad nseř i min ɣa tini zeg uqemmum nnes.” 58 Řaɣan i Rifqa uca nnan as: “Ma ad traḥed cem ak-d weryaz-a?” Uca nettat tarra-dd: “Wah, ad raḥeɣ.” 59 Xenni ssqebbḍen nitni Rifqa, učmatsen, ak-d tmeṭṭaḍt nnes, uca ssqebbḍen ɛawed amsexxar n Ibrahim d iryazen nnes. ^■   60 Uca barken Rifqa, nnan as: “A učmatneɣ, ad tawḍed ad temɣared d řuřuf n ɛecra n řuřuf uca zzariɛet nnem ad twart tawwart n yinni t icarrhen!” 61 Tekkar Rifqa d tiyya nnes, nyint x iřeɣman, ḍfarent aryaz. Ammu i dd-yiwi umsexxar Rifqa uca iruḥ.

62 Aqa iffeɣ-dd Isḥaq zeg wanu n ‘Laḥay-Ru’i. Tuɣa izeddeɣ di Temmurt n Ljanub. ^■   63 Iffeɣ-dd Isḥaq maḥend ad iẓẓaǧ deg iyyar. Tuɣa-tt ɣar uweṭṭu n tmeddit. Netta issgeɛɛed tamuɣři nnes, iqceɛ, u xzar, iřeɣman ttqarraben-dd! 64 Rifqa ɛawed tessgeɛɛed tiṭṭawin nnes, teẓra Isḥaq. Nettat tejja ixef nnes ad tḍar deɣya x weřɣem 65 uca tenna i umsexxar: “Min iɛna weryaz nni dd-yusin deg iyyar ɣarneɣ?” Uca inna umsexxar: “Wa d sidi inu!” Xenni teksi takenbuct uca třeḥḥef. 66 Uca iɛawed umsexxar i Isḥaq marra min igga. 67 Igewwed i-t Isḥaq ɣar uqiḍun n yemmas Sara, yiwi Rifqa uca nettat tedweř d tamɣart nnes u netta tuɣa ittexs i-tt. Ammu i ifewwej Isḥaq awarni řmewt n yemmas.