1 Tuɣa ɣar Sara mya u-sebɛa u-ɛicrin n iseggʷusa. Man aya d řmijař n iseggʷusa n tudart n Sara. 2 Uca temmut Sara di Qaryat-Arbaɛ, ixs ad yini Ḥabrun, di temmurt n Kenɛan uca yudef-dd Ibrahim, icḍen x Sara, isɣuyy xas. 3 Ikkar Ibrahim ṭṭarf i umettin nnes, uca issiweř ak-d iḥenjiren n Ḥit, inna: 4 “Necc d abarrani d amɛezzeb ɣar awem. Wcem ayi mɣir anḍeř d agřa jar awem ḥima ad neḍřeɣ amettin inu zi zzat inu.” ^■   5 Arrin-dd iḥenjiren n Ḥit x Ibrahim, nnan as: 6 “Seř ɣarneɣ, siditneɣ! Cek d ijj n arrays n AREBBI jar aneɣ. Nḍeř amettin nnek deg imeḍřan nneɣ iṣebḥen. Uřa d ijj zzayneɣ ad cek iṭṭef x wenḍeř nnes ḥima ad dayes tneḍřed amettin nnek.” 7 Xenni ikkar Ibrahim, ibbendeq qibač i řgens n temmurt, qibač i iḥenjiren n Ḥit 8 uca issiweř akidsen, inna: “Mařa kenniw s array nwem ad neḍřeɣ amettin inu zi zzat inu, sřem ɣari uca zawgem ɣar Ɛifrun, mmis n Zuhar, 9 maḥend ad ayi iwc ifri n Makfila, wenni ɣar ṭṭarf n yeyyar nnes. Ejj i-t ad ayi t iwc s ttaman nnes ikmeř. Ad yiři d anḍeř inu i ɣa mellkeɣ jar awem.”

10 Ɛifrun tuɣa iqqim jar iḥenjiren n Ḥit uca Ɛifrun, Aḥitti, yarra-dd x Ibrahim deg imejjan n iḥenjiren n Ḥit d marra inni yudfen ɣar tewwart n tendint nnes, inna:

11 “Lla, a sidi inu, seř-dd ɣari! Necc ad ac wceɣ iyyar uřa d ifri nni dayes iǧan. Zzat i tiṭṭawin n tarwa n řgens inu ad ac t wceɣ, nḍeř amettin nnek!”

12 Xenni ibbendeq Ibrahim zzat i řgens n temmurt

13 uca issiweř ak-d Ɛifrun deg imezzuɣen n řgens n temmurt, inna: “Ttzawgeɣ, mařa texsed, seř-dd ɣari. Ad ac wceɣ nnuqart n yeyyar, qbeř i-tt zzayi, xenni ad dayes neḍřeɣ amettin inu.”

14 Yarra-dd Ɛifrun x Ibrahim, inna as:

15 “Sidi inu, seř-dd ɣari! Min ixs ad yini iyyar isekkwan arbeɛmya ciqlu n nnuqart, jar ayi d cek? Nḍeř amettin nnek!” ^□  

16 Isřa Ibrahim i Ɛifrun uca iwzen Ibrahim i Ɛifrun tmenyat n nnuqart i xef issiweř deg imezzuɣen n iḥenjiren n Ḥit: arbeɛmya ciqlu n nnuqart, am tt nnumen isebbaben. ^■  

17 Ammu i idweř yeyyar n Ɛifrun, wenni iǧan di Makfila arendad n Mamri, iyyar d ifri wenni dayes iǧan d marra ticejjura inni deg iyyar ɣar iymiren nnes i d as dd-innḍen, ^□  ■  

18 d agřa n Ibrahim zzat i iḥenjiren n Ḥit d marra inni yudfen ɣar tewwart n tendint.

19 Awarni aya inḍeř Ibrahim Sara, tamɣart nnes, deg ifri n yeyyar n Makfila qibač i Mamri, wenni iǧan d Ḥabrun di temmurt n Kenɛan. 20 Ammu i idweř iyyar ak-d yefri i dayes iǧan zeg iḥenjiren n Ḥit ɣar Ibrahim am wenḍeř nnes.