1 Awarni man aya temsar, aqa ijarreb AREBBI Ibrahim, inna as: “Ibrahim!” Uca inna as: “Xzar, necc aqa ayi da!” 2 Inna as Netta: “Ksi ayenni n mmic, wenni texsed, Isḥaq, uca ruḥ ɣar temmurt n Muriya uca tqeddmed t din d taɣraṣt x yijj n wedrar jar idurar i d ac ɣa iniɣ.” ^■   3 Ikkar Ibrahim zic, iḥezzem i weɣyuř nnes uca iksi akides tnayen n iḥudriyyen nnes d mmis Isḥaq. Iqess akeccuḍ i tewhibt n tɣarṣt, ikkar, iruḥ deg webrid ɣar wemcan i d as inna AREBBI. 4 Deg wass wiss třata issgeɛɛed Ibrahim tamuɣři nnes uca iẓra amcan zi řaggʷaj. 5 Inna Ibrahim i iḥudriyyen nnes: “Rajam da ak-d weɣyuř, necc d uḥenjir ad nraḥ diha, ad nesjed uca ad ɣarwem dd-neɛqeb.” 6 Iksi Ibrahim akeccuḍ i wecmaḍ n tɣarṣt, issars i-t x mmis Isḥaq u netta s yixef nnes iksi s ufus nnes timessi d txedmect uca ammu i ruḥen s tnayen idsen. 7 Xenni issiweř Isḥaq ak-d Ibrahim babas, inna: “Baba inu!” Inna netta: “Xzar, necc aqa ayi da, mmi!” Uca inna netta: “Xzar, aqa da timessi d ukeccuḍ, maca mani iǧa izmar i tɣarṣt?” 8 Inna Ibrahim: “AREBBI simant nnes ad issarzeq s yezmar i tɣarṣt, mmi!” Uca ammu i ruḥen s tnayen idsen 9 uca iwḍen ɣar wemcan nni i d as inna AREBBI. Din i ibna Ibrahim ijj n uɛalṭar uca iɛdeř akeccuḍ, icarf mmis Isḥaq uca issars i-t x uɛalṭar x ikecwaḍ. ^■  

10 Xas uca isswiẓẓeḍ Ibrahim afus nnes uca iksi-dd taxedmect ḥima ad iɣarṣ i mmis.

11 Maca Lmalak n SIDI iřaɣa as-dd zeg ujenna, inna as: “Ibrahim, Ibrahim!” Netta inna: “Necc aqa ayi da!”

12 Xenni inna as: “War swiẓẓiḍ afus nnek ɣar uḥenjir niɣ ad as tegged ca, minzi řexxu aqa ssneɣ belli tᵉtteggʷeded AREBBI u war xafi tessɛizzed ayenni n mmic.”

13 Issgeɛɛed Ibrahim tiṭṭawin nnes, u xzar, aqa awarni as tuɣa ijj n icarri iqqen ɣar cbarq zeg waccawen nnes. Yuyur Ibrahim dinni, iṭṭef icarri uca izarf i-t d taɣarṣt deg wemcan n mmis. ^□  

14 Iřaɣa Ibrahim isem n wemcan nni: “SIDI ad issarzeq!” S uyenni iqqar bnadem ař ass-a: “Deg wedrar n SIDI ad yiři yarzeq!” ^□  

15 Iřaɣa-dd Lmalak n SIDI wiss martayen zeg ujenna x Ibrahim,

16 inna: “Minzi teggid man aya uca war xafi tᵉṭṭifed ayenni n mmic, ad jjaǧeɣ x Simant inu, inna SIDI, ^■  

17 aqa ad cek barkeɣ aṭṭas uca ad kettareɣ zzariɛet nnek aṭṭas amecnaw itran n ujenna u amecnaw ijdi x tma n řebḥar. Zzariɛet nnek ad tᵉṭṭef tawwart n řɛedyan nnes d řwart ^■  

18 u di zzariɛet nnek ad ttwabarken marra řegnus n temmurt, minzi tesřid i tmijja inu.” ^■  

19 Xenni iɛqeb-dd Ibrahim ɣar iḥudriyyen nnes. Nitni kkaren uca ruḥen jmiɛ deg webrid ɣar Bi’r-Sebɛa uca izdeɣ Ibrahim di Bi’r-Sebɛa.

20 Awarni man aya imsar aqa xebbaren Ibrahim, nnan as: “Xzar, ɛawed Milka turuw-dd iḥenjiren i Naḥur umac: 21 Ɛuṣ, amenzu nnes, d Buz umas, d Qamuwil wenni d babas n Aram, 22 d Kasad d Ḥazu d Fildac d Yidlaf d Bituwil.” 23 Bituwil ijja-dd Rifqa. Tmenya aya i dd-turuw Milka i Naḥur, umas n Ibrahim. 24 U tayya nnes, tenni umi qqaren Riɛuma, turuw as-dd ɛawed Ṭabaḥ d Jaḥam d Taḥac d Maɛka. ^□