1 Uca yarzef SIDI ɣar Sara, am mammec t inna, uca ikemmeř SIDI awař i inna i Sara. ^■   2 Teksi Sara s ddeyset uca turuw-dd ijj n useymi i Ibrahim x tewsar nnes, di řmijar nni i d as inna AREBBI. ^■   3 Uca iřaɣa Ibrahim i mmis aseymi, wenni d as dd-turuw Sara, Isḥaq. 4 Ibrahim ixten i mmis Isḥaq umi tuɣa ɣares tmenya n wussan, am mammec d as yumur AREBBI. ^■   5 Tuɣa ɣar Ibrahim mya n iseggʷusa, ařami ɣares-dd ixřeq mmis Isḥaq. 6 Tenna Sara: “Isseḍḥec ayi AREBBI u kuř ijj wenni i ɣa isřan i man aya, ad iḍḥec ɛawed akidi.” 7 Tenna ɛawed: “Man wen izeɛmen ad yini i Ibrahim, aqa Sara ad tessuṭṭeḍ iseyman? Aqa urweɣ as-dd aḥenjir x tewsar nnes!”

8 Igma useymi uca ittwakkes as uṭṭuḍ. Deg wass i d as kksen uṭṭuḍ i Isḥaq, issewjed Ibrahim amensi imɣar. 9 Umi teẓra Sara mmis n Tmiṣrect Hajar, wenni dd-turuw Hajar i Ibrahim, iqeṣṣar xas,

10 tenna i Ibrahim: “Aẓẓeř x tayya aya d mmis, minzi mmis n tayya aya war iwarret ca ak-d mmi, ak-d Isḥaq.” ^■  

11 Awař-a iban-dd d aɛeffan aṭṭas di tiṭṭawin n Ibrahim di ssibbet n mmis.

12 Maca inna AREBBI i Ibrahim: “War ttejji aḥenjir d tayya nnek ad iřin d tisineft di tiṭṭawin nnek. Seř ɣar marra min i d ac ɣa tini Sara, minzi di Isḥaq ad ac tiři zzariɛet. ^□  ■  

13 Ad ggeɣ ɛawed ijj n řgens zi mmis n tayya aya, minzi uřa d netta d zzariɛet nnek.” ^■  

14 Ikkar Ibrahim zic uca iksi aɣrum d ict n tecyart n waman, iwca i-ten i Hajar, issars as ten x teɣruḍt. Iwca as ɛawed aḥenjir uca issqebbeḍ i-tt. Uca nettat truḥ, tennejru di řexřa n Bi’r-Sebɛa.

15 Řami neqsen waman zi tecyart, tenḍar aḥenjir sadu ijj n cbarq,

16 uca truḥ teqqim qibač nnes řaggʷaj n tecti n řqews, minzi tenna: “War zemmareɣ ad ẓareɣ meřmi i ɣa immet uḥenjir.” Ammu i teqqim qibač nnes uca tessgeɛɛed tmijja nnes, tesɣuy.

17 Isřa AREBBI ɣar tmijja n uḥenjir uca Lmalak n AREBBI iřaɣa i Hajar zeg ujenna, inna as: “Min cem yuɣin, Hajar? War tteggʷed ca, minzi AREBBI isřa řḥess n uḥenjir, din mani iǧa.

18 Kkar, sgeɛɛed aḥenjir uca ṭṭef as deg ufus nnem, minzi ad zzayes ggeɣ řgens imɣar.” ^■  

19 Uca yarzem AREBBI tiṭṭawin nnes, teẓra řɛunṣar n waman. Truḥ, tɛemmar tacyart s waman, tewca as i uḥenjir, ad isu. 20 Tuɣa AREBBI ak-d uḥenjir, iyma, izdeɣ di řexřa u tuɣa-t d amjebbad n řqews. 21 Tuɣa izeddeɣ di řexřa n Faran uca teksi as-dd yemmas tamɣart zi temmurt n Miṣra.

22 Di řweqt nni d ict imsar, belli Abimalik, ak-d Fikul, akumandar n řɛeskar, issiweř ak-d Ibrahim, inna: “AREBBI aqa-t akidek di marra min tᵉttegged. ^□   23 Řexxu, jaǧ ayi ɣar AREBBI, aqa war teqqimed ad tɣecced iḥenjiren uřa d ayyawen inu! Maca s muxas tamexsiwt icewwaren i kik ggiɣ qbeř, ad zzayes tegged cek akidi u ak-d temmurt mani teqqimed am ubarrani.” ^■   24 Inna Ibrahim: “Necc ad jjaǧeɣ!” 25 Xas uca iɛeyyeb Ibrahim Abimalik x řɛunṣar n waman nni iṭṭfen imsexxaren n Abimalik s uɣiř. 26 Xenni inna Abimalik: “Necc war ssineɣ wi iggin man aya u cek war d ayi t tennid ca qbeř. Aqa ař řexxu i zzayek t sřiɣ.” 27 Iksi Ibrahim uǧi d ifunasen d tfunasin uca iwca as ten i Abimalik uca nitni s tnayen ggin ijj n řɛahd jar asen. 28 Uca issars Ibrahim sebɛa n txeswin zeg wuǧi ɣar uɣezdis. 29 Xenni inna Abimalik i Ibrahim: “Min ɛnant sebɛa n txeswin nni teggid ɣar uɣezdis?” 30 Inna netta: “Ksi zeɛma sebɛa aya n txeswin zeg ifassen inu, ḥima ad iřint d cchadet di ṭṭweɛ inu belli necc i iɣzin anu aya.” 31 S uya semman amcan nni Bi’r-Sebɛa, minzi nitni s tnayen tuɣa jjuǧen din. 32 Ammu i wcin řɛahd di Bi’r-Sebɛa. Awarni man aya ikkar Abimalik ak-d Fikul, akumandar n řɛeskar, iɛqeb ɣar temmurt n Ifilisṭiniyyen. 33 Iẓẓu Ibrahim ijj n tcejjart n tmarist di Bi’r-Sebɛa uca iřaɣa din isem n SIDI, Arebbi n řebda. ^□  ■   34 Izdeɣ Ibrahim am ubarrani di temmurt n Ifilisṭiniyyen aṭṭas n wussan.