Ibrahim d Abimalik, ajeǧid n Jirar
20
1 Ssenni issmuṭṭiy Ibrahim iqiḍan nnes, yuyur ɣar Temmurt n Ljanub uca izdeɣ jar Qadac d Cur uca iqqim amecnaw abarrani di Jirar. 2 Umi inna Ibrahim x Sara tamɣart nnes: “Nettat d učma i teǧa!”, issekk Abimalik, ajeǧid n Jirar, yiwi akis Sara. □ ■ 3 Maca iḍhar-dd AREBBI i Abimalik di tarjit n ǧiret, inna as: “Aqa řexxu ad temmted di ssibbet n temɣart tenni dd-tiwyed akic, minzi nettat temřec ak-d weryaz.” 4 Maca Abimalik tuɣa war ɣares-dd iqarreb, s uyenni inna: “A Sidi inu, ma xenni ad tawḍed ad tenɣed ijj n řgens iseggden? 5 Ma war d ayi inni netta: ‘Nettat d učma i teǧa!’, u nettat s yixef nnes tenna ɛawed: ‘Netta d uma i yeǧa!’ S tidett n wuř u s ifassen izdigen i ggiɣ aya.” 6 Inna as AREBBI di tarjit: “Necc ssneɣ ɛad belli teggid man aya s tidett n wuř, s uyenni ḥḍiɣ cek ḥima war xafi txeṭṭiḍ u war cek jjiɣ ad tt tḥadid. 7 Řexxu, arr tamɣart ɣar weryaz nnes, minzi netta d anabi uca netta ad xak iẓẓaǧ, ḥima ad teddared. Maca mařa war tt tarrid ca, ssen belli aqa ad temmted, cek d marra min iǧan nnek!” 8 Ikkar Abimalik zic ɣar ṣṣbeḥ. Iřaɣa i marra imsexxaren nnes, inna marra awařen-a deg imezzuɣen nsen uca iryazen nni dewřen ggʷeden aṭṭas. 9 Xenni iřaɣa Abimalik x Ibrahim uca inna as: “Min d aneɣ teggid d min di xḍiɣ akidek umi tɣeḍred xafi u x tgeldit inu ddenb ameqqran? Cek teggid akidi min war icuwwaren ad t tegged.” 10 Uca yarni inna Abimalik i Ibrahim: “Min cek yejjin řami teggid man aya?”
11 Inna Ibrahim: “Minzi nwiɣ: ‘Nican war dinni tiggʷudi zi AREBBI deg wemcan-a uca ad ayi nɣen di ssibbet n temɣart inu.’
12 Uca s tidett nettat ɛawed d učma. Nettat d yeǧis n baba, maca maci d yeǧis n yemma uca tedweř d tamɣart inu.
13 Umi d ayi issetleɛ AREBBI zi taddart n baba, nniɣ as: ‘Ad yiři wa d řeɛřamet n tmexsiwt nnek icewwaren i necc, aqa ad tinid di marra imucan mani i ɣa naweḍ: Netta aqa d uma!’ ” ■
14 Xenni iksi Abimaliki uǧi d ifunasen d tfunasin d isemɣan d tsemɣin uca iwca i-ten i Ibrahim uca yarr as Sara, tamɣart nnes.
15 Inna Abimalik: “Xzar, tammurt inu aqa-tt qibač nnek. Zdeɣ mani i d ac-dd iḍhar mliḥ di tiṭṭawin nnek.”
16 I Sara inna: “Xzar, wciɣ ařef n uqiyyat n nnuqart i umam. Aqa atent d ařeḥḥaf x tiṭṭawin i kuřci inni kidem iǧan, wah, i kuřci idweř am-dd d ttiqart.”
17 Iẓẓuǧ Ibrahim i AREBBI uca AREBBI issgenfa Abimalik d temɣart nnes d tiyya nnes uca urwent.
18 Minzi tuɣa SIDI ibelleɛ qaɛ marra řemřawat n temɣarin di taddart n Abimalik di ssibbet n Sara, tamɣart n Ibrahim.