1 Iwḍen xenni tnayen n lmalakat nni ɣar Sadum s ǧiřet. Tuɣa Luṭ iqqim ɣar tewwart n Sadum. Umi ten iẓra Luṭ, ikkar maḥend ad ten iřqa uca ibbendeq ařami aɣembub nnes iggur ad iřqef tammurt. ^□   2 Inna: “Xzar, a isiditen inu, ttzawgeɣ kenniw ad dd-tasem ɣar taddart n umsexxar nwem uca ad din tessensem, ad tessirdem iḍaren nwem. Xenni ad tfaqem zic, ad tkemmřem x webrid nwem.” Maca nitni nnan: “Lla, aqa deg wazzay ad neqqim ad nessens.” ^■   3 Maca netta ikellef xasen aṭṭas ařami akides ruḥen, udfen ɣar taddart nnes uca igga asen amensi, iggʷa aɣrum břa antun uca ccin. ^■  

4 Aqa qbeř ma ad ṭṭṣen, qewwaren i taddart iryazen n tendint, iryazen n Sadum, zeg umeẓyan ař awessar, marra iwdan zi marra imucan iṭṭurfen n tendint. 5 Nitni řaɣan i Luṭ, nnan as: “Mani ǧan iryazen inni ɣarek-dd yusin ǧiret-a? Suffeɣ i-ten-dd, ḥima ad ten nessen.” ^□   6 Iffeɣ-dd ɣarsen Luṭ ɣar tewwart uca iqqen tawwart awarni as. 7 Inna: “Ttzawgeɣ, a aytma inu, war tteggem qaɛ řɣar! 8 Xzar, ɣari tnayen n yessi tinni ɛad war issinen aryaz. Ejj ayi ad awem tent i-dd-ssuffɣeɣ barra uca ggem daysent min tᵉttwařam mliḥ di tiṭṭawin nwem. Mɣir i iryazen-a war daysen tteggem walu, aqa s uyenni dd-usin nitni swadday n tiři n tzeqqa inu ɣar tmensiwt.” ^□   9 Nitni nnan: “Aggʷej diha!” Uca nnan ɛawed: “Aqa wanita yusa-dd da d abarrani uca ixs ad iḥkem amecnaw řqaḍi? Řexxu ad cek nḍarr ktar zzaysen.” Uca ggin aṭṭas n uɣiř x weryaz nni, x Luṭ, uca qarrben-dd ḥima ad arẓen tawwart. ^■  

10 Maca iryazen nni sswiẓẓḍen afus nsen uca ssidfen Luṭ ɣar taddart akidsen, bellɛen tawwart

11 uca wtin s tuddarɣeč iryazen nni tuɣa ibedden ɣar tewwart n taddart, am umeẓyan am umeqqran, u ssihřen ixef nsen di tarezzut x tewwart.

12 Xenni nnan iryazen nni i Luṭ: “Wi ɣarek da ɛad? Ma aḍeggʷař niɣ iḥenjiren niɣ tḥenjirin, marra inni ɣarek di tendint, ejj i-ten ad ffɣen zeg wemcan-a.

13 Aqa ad nareddeǧ amcan-a, minzi tɣuyyit nnes temɣar zzat i wudem n SIDI, u SIDI issekk aneɣ-dd ḥima ad tt nareddeǧ.”

14 Iffeɣ Luṭ uca issiweř ak-d iḍeggʷařen nnes, inni i ɣa imeřcen yessis, inna: “Kkarem, ffɣem zeg wemcan-a, minzi SIDI ad yareddeǧ tandint-a.” Maca iban-dd ittqeṣṣar di tiṭṭawin n iḍeggʷařen nnes.

15 Umi iṣbeḥ řhař, ssqeǧqent lmalakat Luṭ, nnant: “Kkar, teksid tamɣart nnek d tnayen n yessic tinni akidek, ḥima war thelliked ca di řmuɛṣiyyet n tendint-a.”

16 Maca netta war izɛim. Xenni ṭṭfen iryazen nni afus nnes d ufus n temɣart nnes d ifassen n tnayen n yessis, minzi SIDI tuɣa ixs ad xas iḥinn. Nitni ssuffɣen t ɣar barra, nedhen t barra i tendint.

17 Ařami ten ssuffɣen barra, inna netta: “Senjem ixef nnek! War xezzar awarni ac, war tbedda di jjihet-a am tekmeř. Arweř ɣar idurar, ḥima war tᵉttwateḥḥid ca.” ^□  

18 Inna asen Luṭ: “Lla, ttzawgeɣ, a Sidi inu!

19 Xzar, amsexxar nnek yufa arḍa di tiṭṭawin nnek uca tessemɣared tamexsiwt nnek icewwaren, tenni kidi teggid umi d ayi tejjid ddareɣ. Maca war zemmareɣ ad arewřeɣ ɣar idurar, qbeř ma ad ayi iṭṭef řɣar uca ad mmteɣ! 20 Xzar řexxu, tandint-a aqa tudes-dd aṭṭas, aqa zemmareɣ ad dinni arewřeɣ. Nettat d tameɛnanuct. Ejj ayi ad arewřeɣ řexxu dinni. Ma war teǧi d ict n tendint d tameɛnanuct? Xenni ad zemmareɣ ad qqimeɣ ddareɣ.” 21 Yarra-dd xas: “Xzar, tiweḍ ayi-dd ɛawed tzawegt nnek x uya, war ttareddǧeɣ ca tandint min xef tessiwřed. 22 Qeǧeq, arweř din, minzi war zemmareɣ ad ggeɣ walu ař dd ɣa tawḍed ɣar dinni.” S uya semman isem n tendint nni Ṣuɣar. ^□   23 Ařami yiweḍ Luṭ ɣar Ṣuɣar, tenqar-dd tfuct x temmurt.

24 Ijja SIDI ad iwwet wenẓar x Sadum u x Ɛamurra, d řecbareyyet d tmessi zeg ujenna zi ɣar SIDI. ^□  ■   25 Yareddeǧ Netta tineddam nni d marra adewwar nni, ak-d marra imezdaɣ n tneddam nni uřa d aɣemmuy n temmurt. 26 Tamɣart nnes, tenni tuyur ɣar ḍeffar nnes, texzar awarni as, uca tedweř d ijj n uqellij n tmeǧaḥt. ^■  

27 Ɣar ṣṣbeḥ zic ikkar Ibrahim, yuyur ɣar wemcan mani tuɣa ibedd zzat i wudem n SIDI. 28 Isweḍ ɣar Sadum d Ɛamurra u ɣar marra tammurt n udewwar nni, uca iẓra belli ddexxan ittgeɛɛad zi temmurt amecnaw ddexxan n ict n tefqunt. 29 Ařami yareddeǧ AREBBI tineddam n udewwar nni, ifekkar AREBBI di Ibrahim uca issekk Luṭ barra zi řwest n uceřwaw, umi iqřeb tineddam i di izdeɣ Luṭ. ^□  

30 Igeɛɛed Luṭ zi Ṣuɣar uca iruḥ izdeɣ ak-d tnayen n yessis deg idurar, minzi iggʷed ad iqqim izeddeɣ di Ṣuɣar. Uca izdeɣ deg ifri ak-d tnayen n yessis. 31 Tenna tmenzut i tmaẓuẓt: “Babatneɣ d awessar, war iqqim uɛezri di temmurt ad xaneɣ dd-yadef am mammec teggur di marra ddunect. 32 Zid, ejj aneɣ ad newc binu i babatneɣ ad issu uca ad kis nezzeř, maḥend ad nejj jjiř ad iqqim iddar zi babatneɣ.” ^□   33 Di ǧiřet nni wcint binu i babatsent, iswa. Xenni tudef tmenzut, tᵉṭṭeṣ ak-d babas aqa netta war yuci ca belli tezzeř akides niɣ tekkar ɛawed. 34 Tiwecca nnes tenna tmenzut i tmaẓuẓt: “Aqa necc zzřeɣ ǧiret iɛdun ak-d baba, ad as newc ad issu binu ɛawed ǧiret-a. Xenni ad tadfed cem ad akides tezzřed, maḥend ad dd-nejj jjiř ad iqqim iddar zi babatneɣ.” 35 Wcint binu i babatsent ɛawed di ǧiret nni, iswa. Xenni tekkar tmaẓuẓt uca tᵉṭṭeṣ ak-d babas uca netta war yuci ca belli tezzeř akides niɣ tekkar ɛawed. 36 Ammu ksint tnayen n yessis n Luṭ s ddeyset zi babatsent. 37 Uca turuw-dd tmenzut aseymi, třaɣa isem nnes Mu’ab. Wa d babatsent n Imu’abiyyen ɣar ass-a. ^□   38 Tamaẓuẓt ɛawed turuw-dd aseymi uca třaɣa isem nnes Ben-Ɛammi. Netta d babatsen n iḥenjiren n Ɛammun ɣar ass-a. ^□