1 Uca inna AREBBI i Yaɛqub: “Kkar, geɛɛed ɣar Bayt-Il uca qqim din. Egg din ijj n uɛalṭar min xef i ɣa tessarsed taɣarṣt i Arebbi, wenni d ac dd-ibanen umi dd-tarewřed zeg uɣembub n umac Ɛisu.” ^■   2 Xenni inna Yaɛqub i řwacun n taddart nnes u i marra inni tuɣa akides: “Kksem irebbiten iɣriben nni iǧan jar awem, sizedgem ixef nwem uca beddřem arruḍ nwem. ^□   3 Ad nekkar, ad ngeɛɛed ɣar Bayt-Il. Necc ad ggeɣ din ijj n uɛalṭar i Arebbi nni xafi dd-yarrin deg wass n řeḥṣaret inu, d wenni tuɣa akidi deg webrid nni uyureɣ.” 4 Uca wcin i Yaɛqub marra irebbiten iɣriben nni tuɣa ɣarsen uřa d tixrazin deg imezzuɣen nsen uca iffar i-ten Yaɛqub sadu tcejjart n yigg i tuɣa zzat i Cakim. ^□   5 Řami fesyen iqiḍan, uyuren ssenni, tuɣa tiggʷudi n AREBBI x tneddam nni tuɣa di jjwayeh i d asen dd-innḍen ařami nitni war ḍeffaren iḥenjiren n Yaɛqub. 6 Ammu i yiweḍ Yaɛqub ɣar Luz di temmurt n Kenɛan, aqa-tt d Bayt-Il, netta d marra řgens i tuɣa akides. 7 Uca ibna din ijj n uɛalṭar uca iřaɣa i wemcan nni Il-Bayt-Il, minzi dinni i d as dd-iḍhar AREBBI, umi dd-yarweř zeg uɣembub n umas. ^■  

8 Temmut Dibura, tamesseṭṭaḍt n Rifqa uca neḍřen swadday i Bayt-Il, sadu tabeǧuḍt uca iřaɣa isem nnes ‘Allun-Bakut’, aqa-tt d ‘tabeǧuḍt n imeṭṭawen’. 9 Iḍhar as-dd ɛawed AREBBI i Yaɛqub umi dd-idweř zi Fadan-Aram uca ibark i-t. ^■  

10 Inna as AREBBI: “Isem nnek d Yaɛqub. Zi ssa d tsawent war tteggen ɛad isem nnek Yaɛqub, maca Israil, d wa i ɣa yiřin d isem nnek.” Uca isemma t Israil. ^■  

11 Inna as AREBBI: “Necc d Arebbi, Amzemmar x kuřci! Ggem řɣiǧet, temmarnyem! Zzayek i ɣa iffeɣ ijj n řgens, wah, d ijj n wegraw n řegnus ad ffɣen zzayek u ijeǧiden ad ffɣen zi tejɛinna nnek. ^■  

12 D temmurt-a i wciɣ i Ibrahim d Isḥaq, i cek umi tt i ɣa wceɣ uřa i zzariɛet nnek awarni ac ad wceɣ tammurt.”

13 Xas uca igeɛɛed AREBBI sennej zeg wemcan mani kides issiweř.

14 Yaɛqub issgeɛɛed ijj n weẓru n řidaret deg wemcan mani kis issiweř, ijj n weẓru n řidaret. Iseyyeb xas ict n tewhibt n useyyeb uca ifarreɣ zzect x uzeǧif nnes. ^■  

15 Igga Yaɛqub isem n wemcan mani kides issiweř AREBBI ‘Bayt-Il!’

16 Fesyen nitni iqiḍan nsen, ffɣen zi Bayt-Il uca umi tuɣa ggur ad awḍen ɣar Ifrata, xenni turuw-dd Raḥil u teɛdu xas tarwa teqseḥ. ^□  

17 Imsar, umi teɣɣuḍed di tarwa nnes, tenna as řqabřa: “War tteggʷed, aqa wa ɛawed ad yiři d mmim!”

18 Řami teḍřeq i buḥbeř, minzi temmut din, aqa třaɣa as Bin-Uni, maca babas iřaɣa as Binyamin. ^□  

19 Ammu i temmut Raḥil uca neḍřent tt deg webrid ɣar Ifrata, ixs ad yini Bayt-Laḥm. ^■   20 Uca igga Yaɛqub ijj n weẓru n řidaret x wenḍeř nnes. D wa d aẓru n řidaret n Raḥil x wenḍeř n Raḥil ař ass-a.

21 Xas uca ifsi Israil iqiḍan uca iwta iqiḍan nnes x uɛeddu n Majdal-Ɛidr.

22 Umi izdeɣ Israil di temmurt nni, imsar belli Rubin iruḥ iṭṭeṣ ak-d Bilha, tayya n babas, uca yiweḍ ad t ifhem Israil. Aqa di řweqt nni ayt n Yaɛqub iwḍen tenɛac. ^■   23 Tarwa n Liya tuɣa aten: Rubin, amenzu n Yaɛqub d Cimɛun d Lawi d Yahuda d Issakar d Zabulun. ^■   24 Tarwa n Raḥil tuɣa aten: Yusuf d Binyamin. 25 Tarwa n Bilha, tayya n Raḥil, tuɣa aten: Dan d Naftali. 26 Tarwa n Zilpa, tayya n Liya, tuɣa aten: Jad d Acir. Ina tuɣa aten d iḥenjiren n Yaɛqub inni d as dd-ittwaxeřqen di Fadan-Aram.

27 Uca yusa-dd Yaɛqub ɣar babas Isḥaq di Mamri, di tendint n Arbaɛ, tenni iǧan d tandint n Ḥabrun, mani tuɣa Ibrahim izeddeɣ am ubarrani, uca Isḥaq amenni řexxu. ^□   28 Iddar Isḥaq mya u-tmanyin n iseggʷusa. ^□   29 Iḍřeq Isḥaq i buḥbeř, immut uca imun ak-d řejdud nnes, iwsar, ijjiwen zi tudart uca Ɛisu d Yaɛqub, iḥenjiren nnes, neḍřen t. ^■