1 Yuyur xenni Abram zi Miṣra ɣar Temmurt n Ljanub n Kenɛan, netta d temɣart nnes, ak-d marra min ɣares, d Luṭ akides. 2 Abram tuɣa ɣares aṭṭas n wagřa d řebhayem d nnuqart d wureɣ. 3 Uca immuṭṭi zeg wemcan ɣar wemcan zi Temmurt n Ljanub ɣar Bayt-Il ař amcan mani tuɣa iǧa uqiḍun nnes qbeř, jar Bayt-Il d Ɛay, ^■   4 ař amcan n uɛalṭar i tuɣa igga qbeř, min xef issars tiɣarṣa d tewhibin, uca dinni i iřaɣa Abram Isem n SIDI. ^■   5 Uca Luṭ, wenni yuyuren ak-d Abram, tuɣa ɣares ɛawed uǧi d ifunasen d tfunasin d iqiḍan. 6 Tammurt war d asen tiriw ḥima ad zedɣen jmiɛ, minzi agřa nsen imɣar aṭṭas ař war zemmaren ad din zedɣen jmiɛ. ^■   7 Uca imsar umcubbec jar imeksawen n řebhayem n Abram d imeksawen n řebhayem n Luṭ. Tuɣa Ikenɛaniyyen d Ifiriziyyen zeddɣen řexdenni di temmurt.^□  ■   8 Inna Abram i Luṭ: “War ittiři ɛad umcubbec jar ayi d cek, jar imeksawen inu d imeksawen nnek, minzi neccin d iryazen awmaten. 9 Ma war din ttwaseɛ n temmurt zzatec? Ttzawgeɣ cek ad xafi tebḍiḍ, ma x uzeřmaḍ, niɣ x yefus! Mařa cek truḥed x yeffus, necc ad raḥeɣ x uzeřmaḍ.” ^■  

10 Issgeɛɛed Luṭ tamuɣři nnes uca iẓra adewwar n yeɣzar n L'Urdun tuɣa marra iswa. Qbeř areddeǧ zi SIDI tuɣa Sadum d Ɛamurra amecnaw jjennet n SIDI, amecnaw tammurt n Miṣra xmi dd ɣa tased ɣar Ṣuɣar.

11 Uca ixḍar Luṭ i yixef nnes marra adewwar n yeɣzar n L'Urdun u ifsi Luṭ iqiḍan nnes uca yuyur ɣar ccarq. Ammu i msebḍan nitni ijjen x wenneɣni.

12 Abram izdeɣ di temmurt n Kenɛan u Luṭ izdeɣ di tneddam n udewwar n L'Urdun, iwta iqiḍan nnes ař Sadum.

13 Iryazen n Sadum tuɣa aten d iɛeffanen d imednab ak-d SIDI ař ṭṭarf. ^■  

14 Awarni řami xas imsebḍa Luṭ, inna SIDI i Abram: “Sarreḥ řexxu tiṭṭawin nnek, texzared zeg wemcan mani teǧid ɣar ccamal, ɣar ljanub, ɣar ccarq u ɣar řɣarb,

15 minzi marra tammurt i tᵉttwařid, ad ac tt wceɣ, i cek d zzariɛet nnek i řebda. ^■  

16 Ad ggeɣ zzariɛet nnek amecnaw taɛejjajt n temmurt, ḥima, mařa ḥed izemmar ad iḥseb taɛejjajt n temmurt, uřa d zzariɛet nnek tzemmar ɛawed ad tᵉttwaḥseb. ^■  

17 Kkar, cuq di temmurt di tuzzeggart nnes d tiru nnes, minzi i cek umi tt i ɣa wceɣ.”

18 Xenni ikkes Abram iqiḍan nnes uca yuyur ad izdeɣ ɣar tcejjura n yigg n Mamri, inni iǧan di Ḥabrun. Dinni ibna ijj n uɛalṭar i SIDI. ^■