1 Inna SIDI i Abram: “Ffeɣ zi temmurt nnek, zi temmurt mani dd-txeřqed u zi taddart n babac, ruḥ ɣar temmurt i d ac ɣa ssecneɣ. ^■   2 Ad zzayek dd-ssuffɣeɣ ijj n řgens imɣar, ad cek barkeɣ u ad ssemɣareɣ isem nnek uca iři d cek ɛawed d lbaraka. 3 Ad barkeɣ wenni cek i ɣa ibarken d wenni cek i ɣa ineɛřen, ad t neɛřeɣ. Dayek i ɣa ttwabarkent marra tiqebbař n temmurt.” ^■  

4 Uca iruḥ Abram am mammec d as inna SIDI, uca iruḥ Lut akides. Tuɣa Abram ɣares xemsa u-sebɛin n iseggʷusa umi dd-iffeɣ zi Ḥaran. 5 Uca indeh Abram Saray tamɣart nnes, d Luṭ mmis n umas, d marra agřa i yarebḥen, d iwadan d řmař nni dd-kesben di Ḥaran. Ffɣen zi Ḥaran ḥima ad raḥen ɣar temmurt n Kenɛan uca iwḍen ɣar temmurt n Kenɛan. ^■   6 Iẓwa Abram zi temmurt nni ɣar wemcan n Cakim ař tacejjart n yigg n Mura. Di řweqt nni tuɣa Ikenɛaniyyen zeddɣen di temmurt. ^□  ■   7 Iban-dd SIDI i Abram, inna as: “I zzariɛet nnek umi i ɣa wceɣ tammurt-a.” Uca ibna din ijj n uɛalṭar min xef issars taɣarṣt i SIDI wenni d as dd-ibanen. ^□  ■  

8 Xenni iɛdu ssenni ɣar idurar i iǧan x ccarq n Bayt-Il uca iwta dinni iqiḍan nnes. Ijja Bayt-Il x jjihet n řɣarb u Ɛay x ccarq. Din ibna ijj n uɛalṭar i SIDI uca iřaɣa Isem n SIDI. ^□  

9 Awarni man aya ifsi Abram iqiḍan nnes, immuṭṭi zeg wemcan ɣar wemcan, ɣar Temmurt n Ljanub.

10 Idweř řaẓ di temmurt uca ikemmeř Abram x webrid nnes ɣar Miṣra ḥima ad izdeɣ din am ubarrani, minzi tuɣa řaẓ imɣar di temmurt.

11 Řami dd-tiweḍ řweqt nni umi tuɣa ittadef ɣar Miṣra, inna i Saray, tamɣart nnes: “Xzar, aqa ssneɣ belli cem d temɣart dayes aẓri.

12 Xmi cem i ɣa ẓaren Imiṣriyyen, zemmaren ad inin: ‘Ta d tamɣart nnes!’, ad ayi nɣen uca ad cem jjen di tudart.

13 Ini aqa cem d učma, ḥima ad ayi yiři řxir di ṭṭweɛ nnem uca ad iqqim řeɛmar inu iddar i cem.” ^■  

14 Imsar umi yudef Abram ɣar Miṣra, ẓrin Imiṣriyyen belli tamɣart teṣbeḥ aṭṭas.

15 Uřa d řḥukkam n Firɛun ẓrin tt uca ssemɣaren tt ɣar Firɛun uca iwyen tt ɣar taddart n Firɛun.

16 Uca imṣuref Firɛun mlih ak-d Abram di ṭṭweɛ nnes. Ammu i iksi uǧi d ifunasen d tfunasin d yeɣyař d isemɣan d tiyya d teɣyař d iřeɣman. ^□  

17 Maca SIDI iwta Firɛun d aytbab n taddart nnes s jjrayeḥ mɣarent di řesbab n Saray, tamɣart n Abram. ^■  

18 Xenni Firɛun iřaɣa-dd i Abram, inna as: “Manawaya i dayi teggid? Maɣar war d ayi tennid belli nettat d tamɣart nnek?

19 Mayemmi tennid: ‘Nettat d učma!’, ařami tt ggiɣ necc d tamɣart i yixef inu? Řexxu xzar, aqa ac tamɣart nnek, ksi tt, tbeɛɛded!” 20 Yumur Firɛun iryazen nnes xas uca ssqebbḍen t ak-d temɣart nnes u ak-d marra min tuɣa ɣares.