1 Deg wussan n Amrafil, ajeǧid n Cinɛar, d Ariyuc, ajeǧid n Illasar, d Kidurlaɛumer, ajeǧid n Ɛilam, d Tidal, ajeǧid n Juyim, imsar belli 2 ina ggin řbaruḍ ak-d Bira, ajeǧid n Sadum u ak-d Bircaɛ, ajeǧid n Ɛamurra, u ak-d Cinab, ajeǧid n Adma, u ak-d Cimibar, ajeǧid n Ṣabuyim, u ak-d ujeǧid n Bilaɛ, wenni iǧan d Ṣuɣar. 3 Marra ina munen di řewḍa n teɣzurt n Siddim, aqa d Řebḥar Ameǧaḥ. ^□   4 Tuɣa arebbren tenɛac n iseggʷusa i Kidurlaɛumir, maca ɣar useggʷas wiss třeṭṭac ɣewwɣen. 5 Uca deg useggʷas wiss arbeɛṭac yusa-dd Kidurlaɛumir d ijeǧiden inni iǧan akides uca ɣeřben x Irafawiyyen di Actirut-Qarnaym, x Izuziyyen di Ham, x Imitiyyen di Cawa-Qaryatayim ^□  ■   6 u x Ixuriyyen deg idurar nsen n Saɛir ař Faran, wenni iǧan zzat i řexřa. 7 Awarni aya dewřen-dd, usin-dd ɣar Ɛayn-Micfat, wenni d Qadac, uca ɣeřben x yewdan nni izeddɣen di marra tammurt n Iɛamaliqiyyen u ɛawed x Imuriyyen inni izeddɣen di Haṣṣun-Tamar. ^□  

8 Xenni iffeɣ ujeǧid n Sadum d ujeǧid n Ɛamurra d ujeǧid n Adma d ujeǧid n Ṣabuyim d ujeǧid n Bilaɛ, aqa-tt d Ṣuɣar, uca ruḥen ad kidsen ggen řbaruḍ di řewḍa n teɣzurt n Siddim 9 ak-d Kidurlaɛumir, ajeǧid n Ɛilam d Tidɛal, ajeǧid n Juyim, d Amrafil, ajeǧid n Cinɛar, d Aryuk, ajeǧid n Illasar: arebɛa n ijeǧiden ggin řbaruḍ ak-d xemsa. ^□  

10 Tuɣa řewḍa n teɣzurt n Siddim teccur s wanuten n tizeft uca arewřen ijeǧiden n Sadum d Ɛamurra uca wḍan daysen u inni iqqimen arewřen ɣar idurar.

11 Ksin marra agřa n Sadum d Ɛamurra d marra macca i xeznen uca uyuren.

12 Ksin ɛawed Luṭ, mmis n umas n Abram, d wagřa nnes uca ruḥen. Netta tuɣa izeddeɣ di Sadum.

13 Xenni yusa-dd ijjen zeg inni yarewřen uca inna i Abram, Aɛibrani, wenni tuɣa izeddɣen ɣar tcejjura n yigg n Mamri, Amuriy, umas n Ackul d Ɛanir. Nitni d arfiqen di řɛahd n Abram. ^□  ■  

14 Řami isřa Abram belli umas ṭṭfen t d ameḥbus, yiwi iryazen inni idarrben i umenɣi, inni dd-ittwaxeřqen di taddart nnes, di teřt-mya u-tmenṭac, uca iḍfar i-ten ař Dan.

15 S ǧiret bḍan xasen nitni, netta d imsexxaren nnes, uca iɣřeb xasen uca iḍfar i-ten ɣar tendint n Ḥuba, tenni iǧan x uzeřmaḍ n Dimacq.

16 Yarra-dd marra agřa uřa d umas Luṭ d wagřa nnes uřa d timɣarin d řgens.

17 Umi dd-iɛqeb, awarni řami iɣřeb netta x Kidurlaɛumir u x ijeǧiden nni tuɣa akides, iffeɣ xenni ujeǧid n Sadum ḥima ad t iřqa di Řewḍa n Teɣzurt n Cawa, tenni iǧan d Taɣzurt n Ujeǧid.

18 U Malkiṣadiq, ajeǧid n Calim, yiwi-dd aɣrum d binu. Netta tuɣa d Akehhan n Arebbi, Amɛuǧi x kuřci. ^□  ■  

19 Ibark i-t, inna as: “Ad ittwabarek Abram zi Arebbi, Amɛuǧi x kuřci, wenni iggin ajenna d temmurt. 20 Ad ittwabarek Arebbi, Amɛuǧi x kuřci, wenni isellmen iɣrimen nnek deg ifassen nnek!” Uca Abram iwca as řeɛcur n marra.

21 Uca inna ujeǧid n Sadum i Abram: “Ewc ayi marra min iddaren, maca ksi agřa i yixef nnek.” 22 Maca Abram yarra-dd x ujeǧid n Sadum: “Aqa ssgeɛɛdeɣ afus inu ɣar SIDI Arebbi, Amɛuǧi x kuřci, wenni iggin ajenna d temmurt, jjuǧeɣ 23 maḥend war kessiɣ afiřu niɣ taḥezzemt n sandaliyat uřa ca n řḥajjet zi marra min iǧan nnek, ḥima war teqqared: ‘Necc sstejjareɣ Abram!’ 24 War ɣari dayes bu tasɣɣart! Mɣir min ccin ibřiɣen d tesɣart n iryazen nni kidi iruḥen, Anir d Ickul d Mamri, ejj i-ten ad ksin tasɣart nsen!”