1 Xenni ibarek AREBBI Nuḥ d iḥenjiren nnes uca inna asen: “Jjem-dd řɣiǧet, marenyem u ɛemmarem tammurt! ^■   2 Tiggʷudi d řɛurret zi kenniw ad iřint x marra řmař n řexřa, x marra ijḍaḍ n ujenna u x marra min ittbuɛen x temmurt u x marra iseřman n řebḥar: aqa mmewcen deg ufus nwem. 3 Marra min ittbuɛen, min iddaren, ad awem yiři d macca. Necc ad awem t wceɣ marra, am d awem wciɣ uřa d afsu aziza, ^■   4 maca ddat ak-d buḥbeř nnes i iǧan d idammen nnes, war t ttᵉttem. ^■   5 D tidett ad ttareɣ idammen nwem n řeɛmur nwem, ad ten ttareɣ zeg ifassen n marra imuddaren, uřa zeg ifassen n bnadem, u zeg ifassen n umas n kuř bnadem ad ttareɣ řeɛmar n bnadem. ^■   6 Wi i ɣa issizzřen idammen n bnadem, idammen nnes ad ten ssizzřen s ufus n bnadem, minzi AREBBI igga bnadem di ṣṣifet nnes. ^■   7 U kenniw, jjem-dd řɣiǧet, iřim de waṭṭas, mṭarrcem di temmurt uca iřim deg waṭṭas xas.” ^■  

8 Uca issiweř AREBBI ak-d Nuḥ d iḥenjiren nnes nni ɣares, inna: 9 “Necc, xzar Necc tteggeɣ Řɛahd inu akidwem u ak-d zzariɛet nwem awarni awem ^■  

10 u ak-d marra buḥbeř iddaren nni iǧan akidwem, ak-d ijḍaḍ, ak-d řmař uca ak-d marra řmař n řexřa x temmurt inni akidwem, wah zi marra min dd-iffɣen zeg uɣarrabu ař marra min iddaren x temmurt.

11 Ad ggeɣ Řɛahd inu akidwem, aqa marra arrayem s řeɛmar war ggur ad ittwakkes ɛad s waman n sseḥřet u war ggur ad din tiři ɛad sseḥřet i ɣa yareddǧen tammurt.”

12 Xenni inna AREBBI: “D ta ad tiři d řeɛřamet n Řɛahd tenni i ɣa ggeɣ jar ayi d kenniw d marra řeɛmar iddaren akidwem, i marra jjiřat i řebda.

13 Ad ggeɣ řqews inu deg iseynuten u wanita ad yiři d řeɛřamet n Řɛahd jar ayi d temmurt.

14 Xmi i ɣa bḍiɣ iseynuten x temmurt, xenni ggur ad imsar belli řqews-a ad dd-iḍhar deg iseynuten.

15 Xenni ad idareɣ Řɛahd inu jar ayi d kenniw d marra řeɛmar iddaren n marra arrayem. War dd-ddikkʷiřen waman d sseḥřet ɛawed maḥend ad ssɣarqen marra arrayem.

16 Ad dd-iḍhar řqews-a deg iseynuten, ad t ẓareɣ ad idareɣ Řɛahd i řebda jar AREBBI d marra řeɛmar iddaren jar marra arrayem i iǧan x temmurt.”

17 Uca inna AREBBI i Nuḥ: “D ta d řeɛřamet n Řɛahd inu wenni i ɣa ggeɣ jar ayi d marra arrayem i iǧan x temmurt.”

18 Tarwa n Nuḥ inni dd-iffɣen zeg uɣarrabu tuɣa aten d Cam d Ḥam d Yafat. Ḥam tuɣa d babas n Kenɛan. ^□  ■  

19 Ina d třata n iḥenjiren n Nuḥ. Zzaysen ttwabezzɛen iwdan di marra tammurt. 20 Ibda Nuḥ ixeddem am ufeǧaḥ, igga ijj n umarjuɛ n uḍiř iẓẓu dayes tizayarin. 21 Umi iswa binu, iscar uca iɛarra ixef nnes di řwest n uqiḍun nnes. 22 Iẓra Ḥam, babas n Kenɛan, tuɛɛaryent n babas uca inna t i tnayen n aytmas di barra. 23 Ksin Cam d Yafat ca n werruḍ, ssarsen t x tɣarḍin nsen uca uyuren ɣar ḍeffar, dřin tuɛɛaryent n babatsen. Arrin aɣembub nsen ɣar ḍeffar, war ẓrin ca tuɛɛaryent n babatsen. 24 Ifaq-dd Nuḥ zi ssekra nnes uca idweř yargeb x min d as igga mmis amaẓuẓ. 25 Inna: “D amenɛuř i yeǧa Kenɛan! Ad yiři d amsexxar qaɛ n imsexxaren i aytmas!” 26 Uca inna: “Ad ittwabarek SIDI, AREBBI n Cam. Kenɛan ad yiři d amsexxar i nitni. 27 Zeɛma ad iwesseɛ AREBBI tazeddiɣt i Yafat, iři ad izdeɣ deg iqiḍan n Cam u Kenɛan ad asen yiři d amsexxar.” 28 Awarni i sseḥřet iddar Nuḥ ɛad teřt-mya u-xemsin n iseggʷusa. 29 Ammu i iddar Nuḥ tesɛa-mya u-xemsin n iseggʷusa, xenni immut.