8
1 Uca ixarreṣ AREBBI di Nuḥ d marra řmař n řexřa d marra řebhayem i tuɣa akides deg uɣarrabu. Igga AREBBI ad yekk ijj n usemmiḍ x temmurt uca arsan waman. 2 Bellɛen řɛunṣarat n waman yuǧɣen d tburjatin n ujenna uca ibedd wenẓar zeg ujenna. 3 U am dd-ttasen ttraḥen, dewřen-dd waman zi temmurt. U awarni xemsa-mya n wussan neqsen waman. 4 Deg uyur wiss sebɛa, deg wass wiss sbeɛṭac n uyur nni, yarsa uɣarrabu x idurar n Ararat. 5 Qqimen waman neqqsen ař uyur wiss ɛecra. Deg uyur wiss ɛecra, deg wass amezwaru n uyur, ḍharent-i-dd tqiccatin n idurar. 6 Awarni řami ɛdun arebɛin n wussan, yarzem Nuḥ taburjet n uɣarrabu nni dayes tuɣa igga 7 uca issekk abaɣeř. Wanita iffeɣ, iqqim ittraḥ ittas-dd ařami bdan waman ttaẓɣen x temmurt. 8 Xenni issekk ssenni tadbirt, ḥima ad iẓar, ma aman neqsen x wudem n temmurt. 9 Maca war tufi tedbirt mani i ɣa tessars tařeqqa n uḍar nnes uca teɛqeb-dd ɣares ɣar uɣarrabu, minzi aman tuɣa aten ɛad x wudem n marra tammurt. Isswiẓẓeḍ afus nnes, iṭṭef i-tt uca issidef i-tt-i-dd ɣares deg uɣarrabu.
10 Iraja ɛad sebɛa n wussan nneɣni, xenni issekk tadbirt ɛawed zeg uɣarrabu.
11 Uca tadbirt teɛqeb-dd ɣares ɣar tmeddit, u xzar, aqa afar n zzitun deg uqemmum nnes. Xenni ifhem Nuḥ belli aman neqsen zi temmurt.
12 Iraja ɛad sebɛa n wussan, xenni issekk tadbirt ɛawed uca nettat war ɣares dd-teɛqib ɛad.
13 Deg useggʷas wiss setta-mya u-waḥit, deg uyur amezwaru, deg wass amezwaru n uyur nni, uẓɣen waman x temmurt. Iksi Nuḥ aseqqaf n uɣarrabu, ixzar ɣar barra, udem n temmurt aqa yuẓeɣ.
14 Deg uyur wiss tnayen, deg wass wiss sebɛa u-ɛicrin n uyur nni, tuẓeɣ temmurt.
15 Xenni issiweř AREBBI ak-d Nuḥ, inna:
16 “Ffeɣ zeg uɣarrabu, cek d temɣart nnek d iḥenjiren nnek d temɣarin n iḥenjiren nnek akidek.
17 Marra min iddaren i iǧan akidek zi marra arrayem, zeg ijḍaḍ, zi řmař u zi marra imuddaren nni ittbuɛen x temmurt, ejj i-ten ad ffɣen akidek, ejj i-ten ad mṭarracen x temmurt, ad arren řɣiǧet uca ad mmarenyen x temmurt.” ■
18 Iffeɣ Nuḥ d iḥenjiren nnes d temɣart nnes d temɣarin n iḥenjiren nnes akides.
19 Marra řmař n řexřa, marra min ittbuɛen, d marra ijḍaḍ, d marra min ittenhezzan x temmurt ffɣen zeg uɣarrabu ɛlaḥṣab řaǧat nsen.
20 Ibna Nuḥ ijj n uɛalṭar i SIDI uca iksi zi marra řmař n řeḥřař u zi marra ijḍaḍ n řeḥřař uca iqeddem tiɣarṣa n wecmaḍ x uɛalṭar. □ ■ 21 Uca icemm SIDI řefwaḥet ittfuḥen uca inna SIDI deg wuř nnes: “War ttɛiqqibeɣ ɛad ad neɛřeɣ tammurt x ssibbet n bnadem, minzi min dd-itteffɣen zeg wuř n bnadem d aɛeffan waha zi temẓi nnes. War ttɛiqqibeɣ ɛad ad wteɣ marra min iddaren am mammec ggiɣ. ■ 22 Marra ussan i ɣa teqqim temmurt teǧa, ad tiři tyarza d tmeyra, teṣmeḍ d řeḥmu, anebdu d řmecta uca ass d ǧiřet war ttbeddin ɛemmarṣ.” □ ■