7
1 Inna SIDI i Nuḥ: “Adef cek d marra řaǧ n taddart nnek deg uɣarrabu, minzi ẓriɣ cek d amsegged zzat i wudem inu di jjiř-a. ■ 2 Zi marra řebhayem n řeḥřař ad ɣarek teksid sebɛa, sebɛa, awtem d tewtemt nnes, u zi řebhayem n řeḥram tyuya, awtem d tewtemt nnes. ■ 3 Uřa zeg ijḍaḍ n ujenna ittxeṣṣa ad teksid sebɛa d sebɛa, awtem d tewtemt, ḥima ad teḥḍid zzariɛet nsen i tudart di marra tammurt, 4 minzi xmi i ɣa ɛdun ɛad sebɛa n wussan Necc ad jjeɣ anẓar ad iwwet x temmurt arebɛin n wussan d arebɛin n ǧyaři uca ad teḥḥiɣ zeg wudem n temmurt marra min iǧan, d min ggiɣ Necc.” 5 Uca igga Nuḥ am mammec kuřci i xef t iweṣṣa SIDI. ■ 6 Tuɣa Nuḥ d mmis n setta-mya n iseggʷusa řami dd-tusa sseḥřet n waman x temmurt. 7 Uca yudef Nuḥ ɣar uɣarrabu di ssibbet n waman n sseḥřet, netta d iḥenjiren nnes d temɣart nnes d temɣarin n iḥenjiren nnes akides. ■ 8 Zi řebhayem n řeḥřař u zi řebhayem n řeḥram u zeg ijḍaḍ u zi marra min ittbuɛen x wudem n temmurt 9 tudef tyuya s tyuya ɣar Nuḥ deg uɣarrabu, awtem d tewtemt am mammec iweṣṣa AREBBI Nuḥ.
10 Awarni sebɛa n wussan imsar belli aman n sseḥřet usin-dd x temmurt.
11 Deg useggʷas wiss setta-mya zi tudart n Nuḥ, deg uyur wiss tnayen, deg wass wiss sbeɛṭac n uyur nni, deg wass-a nnit, tuɣa ssefyen-dd marra řɛunṣarat n waman yuǧɣen uca ttwarezment tburjatin n ujenna.
12 Tuɣa anẓar iqqim iccat s jjehd x temmurt arebɛin n wussan d arebɛin n ǧyaři.
13 Deg wass nni nnit tuɣa Nuḥ yudef ɣar uɣarrabu ak-d Cam d Ḥam d Yafat, ayt n Nuḥ, uřa d tamɣart n Nuḥ ak-d třata n temɣarin n iḥenjiren nnes akidsen,
14 nitni d marra markat n řmař n řexřa d marra markat n řebhayem d marra markat n imuddaren inni ittbuɛen x temmurt d marra markat n ijḍaḍ, marra ajḍiḍ d marra min ɣar iǧa afriwen.
15 Zi marra ddat i di iǧa arruḥ n tudart, tudef tyuya s tyuya ɣar Nuḥ ɣar uɣarrabu.
16 U zi marra ddat i dd-yusin, yudef ijj n wewtem d ict n tewtemt am mammec t yumur AREBBI. Uca iqqen SIDI tawwart awarni as.
17 Tuɣa sseḥřet x temmurt arebɛin n wussan uca geɛɛden waman uca ssgeɛɛden aɣarrabu ařami igeɛɛed sennej i wudem n temmurt.
18 Gaɛɛden waman uca mmarenyen-dd aṭṭas sennej i temmurt uca yuyur uɣarrabu x wudem n waman.
19 Gaɛɛden aman aṭṭas s waṭṭas, ařami marra idurar yuɛřan i din iǧan sadu marra ajenna, dewřen dřin. 20 Uřyen waman xemmesṭac n iɣaǧen sennej i idurar uca dřin idurar. 21 Marra ddat i ittenhezzan x temmurt iḍřeq i buḥbeř nnes, ijḍaḍ d řebhayem, řmař n řexřa, marra imuddaren ittbuɛen, inni ittbuɛen x wudem n temmurt u marra iwdan. ■ 22 Marra min di iǧa řeɛwin n arruḥ n tudart ɣarsen deg wenzaren nsen zi marra min din iǧan x řbarr, immut. 23 Uca marra min din iǧan x wudem n temmurt ittwamḥa, zi bnadem ař řmař d imuddaren inni ittbuɛen d ijḍaḍ n ujenna. Ina ttwateḥḥan zi temmurt. Nuḥ weḥḥdes i iqqimen d marra min kides i iǧan deg uɣarrabu. ■ 24 Gaɛɛden waman x temmurt mya u-xemsin n wussan.