1 Řami bdan iwdan ad ktaren di temmurt uca urwent asen-dd yessitsen, ^□   2 aqa ẓrin arrawen n AREBBI belli yessis n bnadem cnant uca ksin timɣarin i yixef nsen zi marra tinni ixḍaren nitni. ^□   3 Xenni inna SIDI: “War ittɣimi Arruḥ inu ittmenɣa řebda ak-d bnadem, aqa-t d ddat zi ssibbet n uweddar nnes. Ad iřin wussan n tudart nnes mya u-ɛicrin n iseggʷusa.” ^□  

4 Deg wussan nni tuɣa ‘nifilim’, ‘inni iwḍan’, di temmurt uca awarni man aya ɛawed, umi dd-udfen arraw n AREBBI ɣar yessis n iwdan uca urwent asen-dd. Nitni d ‘jjwaheř’ n zman nni, d iryazen s yisem. ^□   5 Iẓra SIDI belli řɣar n bnadem d aṭṭas x temmurt uca marra řemwayař n uxarreṣ n wuř nnes d aɛeffan kuř ass. ^■   6 Uca indem SIDI umi igga bnadem di temmurt uca iqqes as wuř nnes. 7 Inna SIDI: “Ad mḥiɣ x wudem n temmurt bnadem i dd-xeřqeɣ, bnadem ak-d řebhayem d imuddaren ittbuɛen uřa d ijḍaḍ n ujenna, minzi nedmeɣ umi ten ggiɣ.” 8 Maca Nuḥ yufa arḍa di tiṭṭawin n SIDI.

9 Ina d imezruyen n yinni dd-ittwaxeřqen zi Nuḥ. Tuɣa Nuḥ d aryaz d amsegged ikmeř jar marra jjiřat nni iddaren akides. Yuyur Nuḥ ak-d AREBBI. ^■  

10 Uca ijja-dd Nuḥ třata n iḥenjiren: Cam d Ḥam d Yafat. ^□  

11 Tuɣa tammurt d ict n řxarbet di tiṭṭawin n AREBBI u tuɣa temmurt teccur s lɛunf.

12 Ixzar AREBBI ɣar temmurt, u xzar, aqa-tt d řxarbet, maɣar marra ddat tuɣa txarreb abrid nnes x temmurt. ^□  

13 Inna AREBBI i Nuḥ: “Aneggar n marra ddat aqa-t zzat i wudem inu, minzi tammurt teccur s lɛunf zzaysen. Aqa ad ten teḥḥiɣ ak-d temmurt.

14 Egg i yixef nnek ijj n uɣarrabu s ukeccuḍ n umerzi uca egg ixxamen am řeɛcuc deg uɣarrabu. Ɣeǧef aɣarrabu zi daxeř u zi barra s tizeft. ^□  

15 Ammu ittxeṣṣa ad t tegged: tuzzeggart n uɣarrabu ad tiři teřt-mya n iɣaǧen u tiru n uɣarrabu ad tiři xemsin n iɣaǧen u řuɛřa nnes ad yiři třatin n iɣaǧen. ^□  

16 Ittxeṣṣa ad tegged ict n tburjet i tfawt sennej i uɣarrabu uca ad tt tkemmřed anect n ijj n uɣiř zi sennej. Ad tegged tawwart n uɣarrabu deg uɣezdis nnes. Ad tegged tizeddaɣ n wadday d tinni n wiss tnayen di řwest d tinni n wiss třata sennej.

17 Aqa Necc ad ssekkeɣ sseḥřet n waman x temmurt ḥima ad teḥḥiɣ sadu ujenna marra ddat i di iǧa arruḥ n tudart. Marra min iǧan di temmurt ad iḍřeq i buḥbeř.

18 Maca ad ssbeddeɣ Řɛahd inu akidek uca cek ad tadfed ɣar uɣarrabu, cek d iḥenjiren nnek d temɣart nnek d temɣarin n iḥenjiren nnek akidek. ^■  

19 Uca zi marra min iddaren, zi kuř ddat, ad tessidfed ɣar uɣarrabu tyuya, ḥima ad ddaren akidek: ittxeṣṣa ad yiři d awtem d tewtemt. 20 Ad ɣarek dd-tas tyuya zi marra ḥima ad teḥḍid tudart nsen: zeg ijḍaḍ ɛlaḥsab markat nsen, zi řebhayem ɛlaḥsab markat nsent u zi marra imuddaren nni ittbuɛen x temmurt ɛlaḥsab markat nsen. 21 Uca cek, ksi i yixef nnek zi marra macca i ittwaccan uca smun i-t ɣarek, ḥima ad ac yiři d macca uca uřa i nitni.” 22 Uca igga Nuḥ am mammec marra i xef t iweṣṣa AREBBI, ammu i t igga. ^■