1 Wa d adlis n imezruyen n yinni dd-ittwaxeřqen zi Adam. Ass min di igga AREBBI Adam, igga i-t di ṣṣifet n AREBBI. ^■   2 Awtem d tewtemt ixřeq i-ten-dd. Ibark i-ten uca iřaɣa asen s yisem ‘Adam’, bnadem, deg wass i di ten dd-ixřeq. ^□  ■  

3 Awarni řami iddar Adam mya u-třatin n iseggʷusa, ijja-dd aḥenjir deg warwas nnes u di ṣṣifet nnes uca iřaɣa as Cit. ^□   4 Awarni řami dd-ijja Cit, iddar Adam ɛad temn-mya n iseggʷusa, ijja-dd iḥenjiren d tḥenjirin. ^■   5 Ammu i iddar Adam tesɛa-mya u-třatin n iseggʷusa uca immut.

6 Awarni řami iddar Cit mya u-xemsa n iseggʷusa, ijja-dd Anuc. ^□  ■   7 Awarni řami dd-ijja Anuc, iddar Cit ɛad temn-mya u-sebɛa n iseggʷusa, ijja-dd iḥenjiren d tḥenjirin. 8 Ammu i iddar Cit tesɛa-mya u-tenɛac n iseggʷusa uca immut.

9 Awarni řami iddar Anuc tesɛin n iseggʷusa, ijja-dd Qinan. ^□  ■  

10 Awarni řami dd-ijja Qinan, iddar Anuc ɛad temn-mya u-xemmesṭac n iseggʷusa, ijja-dd iḥenjiren d tḥenjirin.

11 Ammu i iddar Anuc tesɛa-mya u-xemsa n iseggʷusa uca immut.

12 Awarni řami iddar Qinan sebɛin n iseggʷusa, ijja-dd Mahalal-Il. ^□  

13 Awarni řami dd-ijja Mahalal-Il, iddar Qinan ɛad temn-mya u-rebɛin n iseggʷusa, ijja-dd iḥenjiren d tḥenjirin.

14 Ammu i iddar Qinan tesɛa-mya u-ɛecra n iseggʷusa uca immut.

15 Awarni řami iddar Mahalal-Il xemsa u-settin n iseggʷusa, ijja-dd Yarad. ^□  

16 Awarni řami dd-ijja Yarad, iddar Mahalal-Il ɛad temn-mya u-třatin n iseggʷusa, ijja-dd iḥenjiren d tḥenjirin.

17 Ammu i iddar Mahalal-Il temn-mya u-xemsa u-tesɛin n iseggʷusa uca immut.

18 Awarni řami iddar Yarad mya u-tnayen u-settin n iseggʷusa, ijja-dd Ḥanux. ^□  ■  

19 Awarni řami dd-ijja Ḥanux, iddar Yarad ɛad temn-mya n iseggʷusa, ijja-dd iḥenjiren d tḥenjirin. 20 Ammu i iddar Yarad tesɛa-mya u-tnayen u-settin n iseggʷusa uca immut.

21 Awarni řami iddar Ḥanux xemsa u-settin n iseggʷusa, ijja-dd Matucalaḥ. ^□  ■   22 Awarni řami dd-ijja Matucalaḥ, yuyur Ḥanux ak-d AREBBI teřt-mya n iseggʷusa, ijja-dd iḥenjiren d tḥenjirin. ^■   23 Ammu i iddar Ḥanux teřt-mya u-xemsa u-settin n iseggʷusa. 24 Yuyur Ḥanux ak-d AREBBI uca war ittwif ɛad minzi AREBBI iksi i-t. ^■  

25 Awarni řami iddar Matucalaḥ mya u-sebɛa u-tmanyin n iseggʷusa, ijja-dd Lamak. ^□   26 Awarni řami dd-ijja Lamak, iddar Matucalaḥ ɛad sebɛa-mya u-tnayen u-tmanyin n iseggʷusa uca ijja-dd iḥenjiren d tḥenjirin. 27 Ammu i iddar Matucalah tesɛa-mya u-tesɛa u-settin n iseggʷusa uca immut.

28 Awarni řami iddar Lamak mya u-tnayen u-tmanyin n iseggʷusa, ijja-dd aḥenjir. 29 Iřaɣa isem nnes Nuḥ uca inna: “Wa ad aneɣ issfewwej x řxedmet nneɣ d tamara n ifassen nneɣ, minzi SIDI aqa inɛeř tammurt!” ^□   30 Awarni řami dd-ijja Nuḥ, iddar Lamak ɛad xemsa-mya u-xemsa u-tesɛin n iseggʷusa uca ijja-dd iḥenjiren d tḥenjirin. 31 Ammu i iddar Lamak sebɛa-mya u-sebɛa u-sebɛin n iseggʷusa uca immut.

32 Tuɣa Nuḥ iddar xemsa-mya n iseggʷusa, uca xenni Nuḥ ijja-dd Cam d Ḥam d Yafat.