Qayin d Habil
4
1 Issen Adam Ḥawwa, tamɣart nnes, uca teysi s ddeyset uca turuw-dd Qayin, tenna “Jjiɣ-dd aryaz, d SIDI!”    2 Xenni ɛawed turuw-dd umas Habil. Tuɣa Habil d ameksa n wuǧi u Qayin iruḥ ixeddem tammurt.   
3 Uca awarni ussan imsar belli Qayin iqeddem ict n tewhibt zi řɣiǧet n temmurt i SIDI. 4 Iqeddem Habil ɛawed zeg imenza n wuǧi nnes, zeg yenni ɣar iǧa tadunt aṭṭas. Ixzar SIDI ɣar Habil d tewhibt nnes.    5 Maca ɣar Qayin d tewhibt nnes war d as yarri ca taynit. Uca ixeyyeq Qayin aṭṭas, inneqřeb as uɣembub. 6 Inna SIDI i Qayin: “Mayemmi txeyyqed? Mayemmi i d ac inneqřeb uɣembub? 7 Mařa teggid mliḥ ma war din ittiři usgeɛɛed uca mařa war teggid mliḥ, ddenb aqa-t izzeř ɣar tewwart. Meẓri nnes ɣarek, maca ittxeṣṣa cek ad xas tseǧed.” 8 Issiweř Qayin ak-d Habil umas. Uca imsar am ǧan nitni deg iyyar, belli Qayin ikkar ɣar umas Habil uca inɣa i-t.   
9 Inna SIDI i Qayin: “Mani iǧa umac Habil?” Inna: “War ssineɣ. Ma necc d ameḥday x uma?”
10 Uca inna Netta: “Min teggid? Aqa tmijja n idammen n umac sɣuyyun-dd ɣari zi temmurt.   
11 Řexxu, aqa cek d menɛuř zi temmurt tenni yarezmen aqemmum nnes ḥima ad teqbeř idammen n umac zeg ifassen nnek.
12 Xmi i ɣa txedmed x temmurt, war tdikkʷiř ad ac tewc marra jjehd nnes uca cek ad tiřid d amennejru d ametluɛ di temmurt.”   
13 Xenni inna Qayin i SIDI: “Lɛiqab inu imɣar aṭṭas x tzemmar inu”.
14 Aqa Cek ass-a tuẓẓřed xafi zeg uɣembub n temmurt-a uca zeg uɣembub nnek ad ttwaffareɣ, ad iřiɣ d amennejru d ametluɛ di temmurt uca ad yiři marra wenni d ayi ɣa yafen ad ayi ineɣ.”   
15 Xenni inna as SIDI: “S uya marra wenni i ɣa inɣen Qayin, ad zzayes ntaqmen sebɛa n twařawin.” Uca igga SIDI řeɛřamet i Qayin belli marra wenni t ɣa yafen war t ineqq.
 
Tarwa n Qayen
16 Xenni iffeɣ-dd Qayin zeg wudem n SIDI uca iruḥ izeddeɣ di temmurt n Nud, ccarq n Ɛadn.   
17 Issen Qayin tamɣart nnes uca teysi s ddeyset uca turuw-dd Ḥanux. Tuɣa Qayen ibna ict n tendint uca iřaɣa as i tendint amecnaw isem n mmis Hanux.   
18 Ittwaruw-dd Ɛirad i Ḥanux u Ɛirad ijja-dd Miḥuya’il u Miḥuya’il ijja-dd Matuca’il u Matuca’il ijja-dd Lamak.   
19 Imřec Lamak tnayen n temɣarin. Icten qqaren as Ɛada, tenneɣni qqaren as Tsilla.    20 Turuw-dd Ɛada Yabal. Netta idweř d babatsen i imezdaɣ n iqiḍan u i imeksawen n řebhayem.    21 Isem n umas tuɣa d Yubal wenni tuɣa d babatsen i marra inni ittiraren řgambri d temja.    22 Tsilla turuw-dd ɛawed Tubal-Qayin, amziř n imziřen n marra inni ixeddmen s nnḥas d wuzzař. Učmas n Tubal-Qayin tuɣa-tt d Naɛma.   
23 Inna Lamak i temɣarin nnes, Ɛada d Tsilla: “Sřent i tmijja inu, a timɣarin n Lamak! Sřent ɣar min ɣa iniɣ. Aqa nɣiɣ aryaz i uyezzim inu d uḥenjir i uyeddim inu.    24 Aqa ad nntaqmen zi Qayin sebɛa n twařawin, maca zi Lamak sebɛa u-sebɛin n twařawin.”   
 
Axřaq n Cit
25 Yudef Adam ɛawed x tamɣart nnes uca turuw-dd nettat aḥenjir. Třaɣa as Cit, minzi tenna: “AREBBI iwca ayi zzariɛet nneɣni deg wemcan n Habil, minzi Qayin inɣa i-t.”    26 I Cit ɛawed, uřa i netta, ittwaxřeq-dd useymi uca igga as Anuc. Řexdenni ibda bnadem s uřaɣi x Yisem n SIDI.