‏1 أَ إِحنْجِيرنْ إِنُو، ؤُرِيغْ أَيَا إِ كنِّيوْ، حِيمَا وَارْ ثْخطِّيمْ شَا. ؤُشَا مَاڒَا إِخْضَا شَا ن إِجّنْ، أَقَا غَارْنغْ أَمفْذِي غَارْ ثْبَابَاثْ، يشُّو لْمَاسِيحْ، أَمْسڭَّاذْ. ^▪   ‏2 نتَّا ذ ثَاغَارْصْثْ ن وصْڒَاحْ خْ دّْنُوبْ نّغْ، وَارْ إِدْجِي خْ دّْنُوبْ نّغْ وَاهَا، مَاشَا عَاوذْ إِ ينِّي ن دُّونشْثْ مَارَّا. ^▪  

‏3 س مَانْ أَيَا إِ نتّْوَاڒَا بلِّي أَقَا نسّنْ إِ-ث، مَاڒَا نطّفْ ذِي ثْوصَّا نّسْ. ‏4 ونِّي إِقَّارنْ: ”نشّْ سّْنغْ ث!“، مَاشَا وَارْ إِطِّيفْ شَا ذِي ثْوصَّا نّسْ، نتَّا ذ بُو-إِخَارِّيقنْ ؤُشَا ثِيذتّْ وَارْ ذَايسْ ثدْجِي. ^▪   ‏5 مَاشَا ونِّي إِتّطّْفنْ ذڭْ وَاوَاڒْ نّسْ، أَذْ ذَايسْ ثْكمّڒْ ثَايْرِي ن أَربِّي س ثِيذتّْ. س مَانْ أَيَا نسّنْ، بلِّي أَقَا نشِّينْ ذَايسْ. ^▪   ‏6 ونِّي إِقَّارنْ: ”نشّْ ذَايسْ!“، إِتّْخصَّا أَذْ يُويُورْ أَمْ مَامّشْ ثُوغَا إِڭُّورْ نتَّا. ^▪  

‏7 أَ إِمْعِيزّنْ إِنُو، وَارْ ذ أَومْ تَّارِيغْ شَا ثَاوْصيّثْ ن جْذِيذْ، مَاشَا ثَاوْصيّثْ ثَاقْذِيمْثْ إِ ثُوغَا غَارْومْ زڭْ ؤُمزْوَارُو. ثَاوْصيّثْ-أَ ثَاقْذِيمْثْ ذ أَوَاڒْ إِ ثُوغَا ثسْڒِيمْ. ^▪   ‏8 وَاخَّا أَمنِّي أَذْ أَومْ د-أَرِيغْ ثَاوْصيّثْ ن جْذِيذْ ثنِّي إِدْجَانْ ذ ثِيذتّْ ذَايسْ ؤُ ذَايْومْ، مِينْزِي ثَادْجسْثْ ثعْذُو ؤُشَا ثَافَاوْثْ ن ثِيذتّْ أَقَا ثتّضْهَارْ-د ڒخُّو. ^▪  

‏9 ونِّي إِقَّارنْ بلِّي أَقَا-ث ذِي ثْفَاوْثْ أَمْ إِشَارْهْ ؤُمَاسْ، نتَّا أَقَا-ث ذِي ثَادْجسْثْ أَڒْ إِضَا.

‏10 ونِّي إِتّخْسنْ ؤُمَاسْ، أَذْ إِقِّيمْ ذِي ثْفَاوْثْ ؤُشَا وَارْ ذَايسْ بُو ڒفْضِيحثْ. ^▪  

‏11 مَاشَا ونِّي إِشَارّْهنْ ؤُمَاسْ، أَقَا-ث ذِي ثَادْجسْثْ ؤُشَا إِڭُّورْ ذِي ثَادْجسْثْ، وَارْ إِسِّينْ مَانِي إِ غَا إِرَاحْ، مِينْزِي ثَادْجسْثْ ثسّْذَارْغڒْ ثِيطَّاوِينْ نّسْ.

‏12 أَذْ أَومْ د-أَرِيغْ، أَ إِحنْجِيرنْ، مِينْزِي دّْنُوبْ نْومْ غْفَارنْثْ أَومْ ذِي طّْوعْ ن يِيسمْ نّسْ. ^▪  

‏13 أَذْ أَومْ د-أَرِيغْ، أَ إِبَابَاثنْ، مِينْزِي أَقَا ثسّْنمْ ونِّي إِدْجَانْ زڭْ ؤُمزْوَارُو.

أَذْ أَومْ د-أَرِيغْ، أَ إِبْڒِيغنْ، مِينْزِي أَقَا ثْغلّْبمْ خْ ؤُمْعفَّانْ.

أَقَا ؤُرِيغْ أَومْ-د، أَ إِحنْجِيرنْ، مِينْزِي ثسّْنمْ ثَابَابَاثْ.

‏14 أَقَا ؤُرِيغْ أَومْ-د، أَ إِبَابَاثنْ، مِينْزِي ثسّْنمْ ونِّي إِدْجَانْ زڭْ ؤُمزْوَارُو.

أَقَا ؤُرِيغْ أَومْ-د، أَ إِبْڒِيغنْ، مِينْزِي أَقَا كنِّيوْ ثْجهْذمْ ؤُشَا أَوَاڒْ ن أَربِّي إِتّْغِيمَا ذَايْومْ ؤُشَا ثْغلّْبمْ خْ ؤُمْعفَّانْ.

‏15 وَارْ تّخْسمْ شَا دُّونشْثْ ؤُڒَا ذ مِينْ إِدْجَانْ ذِي دُّونشْثْ، مِينْزِي مَاڒَا شَا ن إِجّنْ إِتّخْسْ دُّونشْثْ، ثَايْرِي ن ثْبَابَاثْ وَارْ ذَايسْ ثدْجِي. ^▪  

‏16 مِينْزِي مَارَّا مِينْ إِدْجَانْ ذِي دُّونشْثْ، أَقَا-ث ذ نّشْوثْ ن دَّاثْ ذ نّشْوثْ ن ثِيطَّاوِينْ ذ ثُوفّثْ ن دُّونشْثْ-أَ، وَارْ د-تِّيسنْثْ شَا زِي ثْبَابَاثْ، مَاشَا زِي دُّونشْثْ.

‏17 دُّونشْثْ ثْعدُّو ؤُڒَا ذ نّشْوَاثْ نّسْ، مَاشَا ونِّي إِتّڭّنْ مِينْ إِخْسْ أَربِّي، أَذْ إِقِّيمْ إِ ڒبْذَا. ^▪  

‏18 أَ إِحنْجِيرنْ إِنُو، أَقَا إِكُوذنْ إِنڭُّورَا إِوْضنْ-د، ؤُشَا أَمْ ثسْڒِيمْ بلِّي أَذْ د-يَاسْ لْمَاسِيحْ أَفَالْسُو، أَمنِّي ڒخُّو ضْهَارنْ-د أَطَّاسْ ن إِمَاسِيحنْ إِسّْخَارِّيقنْ. س ؤُينِّي نسّنْ بلِّي ڒْوقْثْ ثَانڭَّارُوثْ أَقَا ثِيوضْ-د. ^▫  ▪  

‏19 فّْغنْ-د زَّايْنغْ، مَاشَا وَارْ ثنْ ثُوغِي زَّايْنغْ. مَاعْلِيكْ نِيثْنِي ثُوغَا زَّايْنغْ، أَذْ إِڒِي قِّيمنْ أَكِيذْنغْ. مَاشَا نِيثْنِي فّْغنْ-د زَّايْنغْ، حِيمَا أَذْ إِبَانْ بلِّي نِيثْنِي مَارَّا وَارْ دْجِينْ شَا زَّايْنغْ. ^▪   ‏20 أَقَا غَارْومْ أَذْهَانْ ن ؤُمْقدَّاسْ ؤُشَا ثسّْنمْ أَذْ ثْفَارْزمْ كُوڒْ إِجّْ ن بْنَاذمْ. ^▪   ‏21 وَارْ ذ أَومْ ؤُرِيغْ مِينْزِي وَارْ ثسِّينمْ شَا ثِيذتّْ، مَاشَا مِينْزِي أَقَا ثتّسّْنمْ ت، ؤُشَا ؤُڒَا ذ إِجّْ ن ؤُخَارِّيقْ وَارْ د-إِتّفّغْ شَا زِي ثِيذتّْ. ‏22 وِي إِدْجَانْ ذ بُو-إِخَارِّيقنْ مْغِيرْ ونِّي إِنْكَارنْ بلِّي يشُّو ذ لْمَاسِيحْ! ذ وَا ذ لْمَاسِيحْ أَفَالْسُو، ونِّي إِنْكَارنْ ثَابَابَاثْ ذ ثَاممِّيثْ. ^▫   ‏23 مَارَّا ونِّي إِنْكَارنْ ثَاممِّيثْ، وَارْ يُومِينْ عَاوذْ ذِي ثْبَابَاثْ. مَاشَا ونِّي إِشهّْذنْ إِ ثْممِّيثْ، إِشهّذْ عَاوذْ إِ ثْبَابَاثْ. ^▪   ‏24 أجّْ أَذْ ذَايْومْ إِقِّيمْ مِينْ ثسْڒِيمْ زڭْ ؤُمزْوَارُو. مَاڒَا إِقِّيمْ ذَايْومْ مِينْ ثسْڒِيمْ زڭْ ؤُمزْوَارُو، أَذْ ثقِّيممْ كنِّيوْ عَاوذْ ذِي ثْبَابَاثْ ؤُ ذِي ثْممِّيثْ. ‏25 ثَا ذ ثِيكّسْثْ ن وَاوَاڒْ إِ ذ أَنغْ إِوْشَا: ثُوذَارْثْ إِتّْذُومَانْ.

‏26 مَانْ أَيَا ؤُرِيغْ أَومْ-ث-إِ-د خْ ينِّي كنِّيوْ إِخدّْعنْ. ‏27 مَاڒَا أَذْهَانْ إِ زَّايسْ ثطّْفمْ، أَذْ إِقِّيمْ ذَايْومْ، وَارْ ثحْذَاجمْ أَذْ كنِّيوْ إِسّڒْمذْ حذْ. مِينْزِي أَذْهَانْ ن أَربِّي، أَذْ كنِّيوْ إِسّڒْمَاذْ ذِي مَارَّا، ؤُشَا نتَّا ذ ثِيذتّْ وَارْ ذَايسْ دْجِينْ إِخَارِّيقنْ. خنِّي قِّيممْ ذِي مِينْ ذ أَومْ إِسّڒْمذْ. ^▪  

‏28 خنِّي ڒخُّو، أَ إِحنْجِيرنْ إِنُو، قِّيممْ ذَايسْ، حِيمَا وَارْ نتّْسضْحِي شَا قِيبَاتْشْ نّسْ خْ مِينِّي د غَا إِضْهَارْ، مَاشَا أَذْ غَارْنغْ ثِيڒِي تِّيقّثْ غَارْ ثْوَاسِيثْ نّسْ. ^▪   ‏29 مَاڒَا ثسّْنمْ، بلِّي نتَّا ذ أَمْسڭَّاذْ، سْنمْ عَاوذْ بلِّي مَارَّا وِي إِتّڭّنْ ثَاسڭْذَا، أَقَا إِتّْوَاخْڒقْ-د زَّايسْ.