‏1 ونِّي ثُوغَا ذِينْ زڭْ ؤُمزْوَارُو، خْ ونِّي نسْڒَا ذ ونِّي نژْرَا س ثِيطَّاوِينْ نّغْ، ذ ونِّي نثْوَاڒَا ؤُ نْحَاذَا س إِفَاسّنْ نّغْ، ذ وَانِيثَا إِ ذ أَومْ نتّْبَارّحْ: نتَّا ذ أَوَاڒْ ن ثُوذَارْثْ. ^▪   ‏2 أَقَا ثُوذَارْثْ ثضْهَارْ، نشِّينْ نژْرَا إِ-ت، ؤُشَا نْشهّذْ ؤُ نتّْبَارّحْ أَومْ ثُوذَارْثْ إِتّْذُومَانْ، ثنِّي ثُوغَا أَكْ-ذ ثْبَابَاثْ ؤُشَا ثتّْوَاسَّارْڭبْ-د إِ نشِّينْ. ‏3 مِينْ نژْرَا ذ مِينْ نسْڒَا، أَذْ أَومْ ث-إِ-د-نسّْشنْ، حِيمَا عَاوذْ كنِّيوْ أَذْ ثِيڒِيمْ ذڭْ ؤُمُونِي أَكِيذْنغْ. س ثِيذتّْ، أَمُونِي نّغْ أَكْ-ذ ثْبَابَاثْ ؤُ أَكْ-ذ مِّيسْ يشُّو لْمَاسِيحْ. ‏4 أَقَا نتَّارِي-د مَانْ أَيَا إِ كنِّيوْ، حِيمَا ڒفْرَاحثْ نّغْ أَذْ ثِيڒِي ثكْمڒْ.

‏5 ذ وَا ذ ڒخْبَارْ أَصبْحَانْ إِ زَّايسْ نسْڒَا ؤُشَا أَذْ أَومْ د-نْبَارّحْ: أَربِّي ذ ثَافَاوْثْ، نتَّا وَارْ ذَايسْ بُو جُّورّثْ ن ثَادْجسْثْ. ^▪   ‏6 مَاڒَا نقَّارْ، أَقَا غَارْنغْ أَمُونِي أَكِيذسْ، ؤُشَا نڭُّورْ ذِي ثَادْجسْثْ، أَقَا نسّْخَارِّيقْ، وَارْ نضْفَارْ شَا ثِيذتّْ. ‏7 مَاشَا مَاڒَا نُويُورْ ذِي ثْفَاوْثْ، أَمْ نتَّا ذِي ثْفَاوْثْ، غَارْنغْ أَمُونِي أَكْ-ذ وَايَاوْيَا، ؤُشَا إِذَامّنْ ن يشُّو لْمَاسِيحْ مِّيسْ أَذْ أَنغْ سِّيزذْڭنْ زِي مَارَّا دّْنُوبْ نّغْ. ^▪  

‏8 مَاڒَا نقَّارْ، وَارْ خَانغْ بُو دّْنُوبْ، أَقَا نسّْخَارِّيقْ خْ يِيخفْ نّغْ ؤُشَا ثِيذتّْ وَارْ ذَايْنغْ ثدْجِي. ^▪   ‏9 مَاشَا مَاڒَا ننْعمْ س دّْنُوبْ نّغْ، أَقَا نتَّا ذ أَمْثِيقِّي ذ أَمْسڭَّاذْ حِيمَا أَذْ أَنغْ إِغْفَارْ دّْنُوبْ نّغْ ؤُشَا أَذْ أَنغْ إِسِّيزْذڭْ زِي مَارَّا مِينْ وَارْ إِسڭّْذنْ. ^▪  

‏10 مَاڒَا نقَّارْ، ’نشِّينْ وَارْ ذَايْنغْ بُو دّْنُوبْ!‘، نتَّارَّا إِ-ث ذ بُو-إِخَارِّيقنْ ؤُشَا أَوَاڒْ نّسْ وَارْ غَارْنغْ إِدْجِي.