‏1 أَمْغَارْ إِ ثْمطُّوثْ إِتّْوَافَارْزنْ ذ ثَارْوَا نّسْ، إِنِّي تّخْسغْ س ثِيذتّْ، وَارْ إِدْجِي نشّْ وَاهَا، مَاشَا عَاوذْ قَاعْ إِنِّي إِسّْننْ ثِيذتّْ، ‏2 مِينْزِي ثِيذتّْ ثْزدّغْ ذَايْنغْ ؤُشَا أَذْ كِيذْنغْ ثِيڒِي إِ ڒبْذَا: ‏3 أَرْضَا ذ أَرّحْمثْ ذ ڒهْنَا أَذْ كِيذْنغْ إِڒِينْ زِي أَربِّي ثَابَابَاثْ ؤُ زِي سِيذِي يشُّو لْمَاسِيحْ، ثَاممِّيثْ ن ثْبَابَاثْ، ذِي ثِيذتّْ ؤُ ذِي ثَايْرِي. ^▫  

‏4 أَقَا فَارْحغْ أَطَّاسْ ؤُمِي ؤُفِيغْ جَارْ ثَارْوَا نّمْ إِنِّي إِڭُّورنْ ذِي ثِيذتّْ، أَمْ مَامّشْ تّوْصيّثْ نِّي نكْسِي زِي ثْبَابَاثْ. ‏5 ڒخُّو تّتَّارغْ أَمْ، أَ ثَامطُّوثْ، وَارْ إِدْجِي أَخْمِي ذ أَمْ ؤُرِيغْ ثَاوْصيّثْ ن جْذِيذْ، مَاشَا ثنِّي أَقَا-ت غَارْنيْ زڭْ ؤُمزْوَارُو: أجّْ أَنغْ أَذْ نخْسْ أَيَاوْيَا. ^▪   ‏6 ثَا ذ ثَايْرِي، أَقَا أَذْ نُويُورْ عْلَاحْسَابْ ثِيوصَّا نّسْ. ذ ثَا ذ ثَاوْصيّثْ أَمْ مَامّشْ إِ ثسْڒِيمْ زڭْ ؤُمزْوَارُو، أَقَا إِتّْخصَّا أَذْ ثُويُورمْ ذَايسْ. ^▪  

‏7 مِينْزِي أَطَّاسْ ن إِخدَّاعنْ ؤُذْفنْ غَارْ دُّونشْثْ، إِنِّي وَارْ إِشهّْذنْ شَا إِ ثْوَاسِيثْ ن يشُّو لْمَاسِيحْ ذِي أَرِّيمثْ. ذ وَا ذ أَخدَّاعْ ذ أَمْضِيدّْ ن لْمَاسِيحْ. ^▪   ‏8 حْضَامْ إِخفْ نْومْ، حِيمَا وَارْ ثْخسَّارْ شَا ڒْخذْمثْ نّغْ، مَاشَا أَذْ نَاوِي ڒْمُونثْ ثْمُونْ. ‏9 مَارَّا ونِّي إِ غَا إِخْضَانْ ؤُشَا وَارْ إِقِّيمْ شَا ذِي ثْغُورِي ن لْمَاسِيحْ، وَارْ ذَايسْ بُو أَربِّي. ونِّي إِ غَا إِقِّيمنْ ذِي ثْغُورِي ن لْمَاسِيحْ، أَقَا ذَايسْ ثَابَابَاثْ ذ ثْممِّيثْ.

‏10 مَاڒَا يُوسَا-د غَارْومْ شَا ن إِجّنْ ؤُشَا وَارْ د-يِيوِي شَا ثَاغُورِي أَيَا، خنِّي وَارْ ث تّْقبّْڒمْ ذِي ثَادَّارْثْ نْومْ، وَارْ زَّايسْ أَرحّْبمْ شَا س سْڒَامْ. ^▪  

‏11 مِينْزِي ونِّي خَاسْ إِ غَا يَارحّْبنْ س سْڒَامْ، غَارسْ أَمُونِي أَكْ-ذ ڒخْذَايمْ نّسْ ثِيعفَّانِينْ.

‏12 غَارِي أَطَّاسْ إِ ذ أَومْ غَا أَرِيغْ إِ كنِّيوْ، مَاشَا وَارْ خْسغْ أَذْ ث أَرِيغْ ذِي ثوْرِيقْثْ س سّْمخْ، مَاشَا سِّيثِيمغْ أَذْ غَارْومْ د-أَسغْ حِيمَا أَذْ كِيومْ سِّيوْڒغْ زڭْ ؤُقمُّومْ غَارْ ؤُقمُّومْ، حِيمَا ڒفْرَاحثْ نّغْ أَذْ ثِيڒِي ثكْمڒْ.

‏13 ثَارْوَا ن ؤُتْشْمَامْ إِتّْوَافَارْزنْ، تّْسدْجَامنْ خَامْ. أَمِينْ.