‏1 شِيمْعُونْ بُوطْرُوسْ، أَمْسخَّارْ ذ رَّاسُولْ ن يشُّو لْمَاسِيحْ، إِ ينِّي إِسّْذَاهدْجنْ لْ-إِيمَانْ س ثْسڭْذَا ن سِيذِيثْنغْ ذ ؤُمْسنْجمْ نّغْ يشُّو لْمَاسِيحْ عْلَاحْسَابْ شَّانْ ذ إِجّنْ أَكِيذْنغْ. ^▫   ‏2 ڒْخَاضَارْ ذ ڒهْنَا أَذْ خَاومْ مَّارنْينْ س ثُوسّْنَا ن سِيذِيثْنغْ يشُّو لْمَاسِيحْ، ^▪  

‏3 أَمْ ونِّي إِوْشِينْ مَارَّا ثِيمسْڒَايِينْ ثِينِّي زِي جّهْذْ ن أَربِّي، مَاحنْذْ أَذْ إِڒِينْثْ إِ ثُوذَارْثْ ؤُ إِ ثِيڭّْوُوذِي زِي أَربِّي س ثُوسّْنَا ن ونِّي ذ أَنغْ د-إِڒَاغَانْ غَارْ ؤُعُودْجِي نّسْ ذ لْعَاضَامَا نّسْ. ‏4 أَقَا ذ نتَّا إِ ذ أَومْ إِوْشِينْ زَّايْسنْ لْوُوعُوذْ إِغْڒَانْ إِمْغَارنْ أَطَّاسْ، حِيمَا أَذْ زَّايْسنْ ثِيڒِيمْ ذ إِمشْرَاشْ ذِي طّْبِيعثْ ن أَربِّي، أَمْ ثتّْرَاكّْوَارنْ زِي نّشْوَاثْ إِغشّنْ إِ يدْجَانْ ذِي دُّونشْثْ. ^▪  

‏5 س ؤُينِّي إِڒِيمْ ثشْضَارمْ ؤُشَا أَرْنِيمْ إِ لْ-إِيمَانْ نْومْ ثْشُونِي، ؤُ إِ ثْشُونِي نْومْ ثُوسّْنَا، ‏6 ؤُشَا إِ ثُوسّْنَا ضّبْطْ ن نّفْسْ، ؤُشَا إِ ضّبْطْ ن نّفْسْ ضّْبَارْ ؤُشَا إِ ضّْبَارْ ثِيڭّْوُوذِي زِي أَربِّي، ‏7 ؤُشَا إِ ثِيڭّْوُوذِي زِي أَربِّي ثَايْرِي إِ وَاوْمَاثنْ ؤُ إِ ثَايْرِي إِ وَاوْمَاثنْ ثَايْرِي. ‏8 مَاڒَا تّْوَافنْثْ ذَايْومْ ثِيمسْڒَايِينْ-أَ ؤُشَا أَذْ ذَايْومْ فيّْضنْثْ، وَارْ كنِّيوْ تّجِّينْثْ ثخْوَامْ نِيغْ بْڒَا ڒْغِيدْجثْ ذِي ثُوسّْنَا ن سِيذِيثْنغْ يشُّو لْمَاسِيحْ. ^▪  

‏9 مِينْزِي ونِّي وَارْ غَارْ دْجِينْثْ ثِيمسْڒَايِينْ-أَ، أَقَا إِدَّارْغڒْ، مِينْزِي إِتُّو أَسِيزْذڭْ ن دّْنُوبْ نّسْ إِنِّي ثُوغَا غَارسْ زِيشْ. ^▪  

‏10 س ؤُينِّي، أَ أَيْثْمَا، شْضَارمْ كْثَارْ حِيمَا أَذْ ثْضمْنمْ ثَاڒَاغِيثْ ذ ؤُسِيخْضَارْ نْومْ س ڒخْذَايمْ ثِيصبْحَانِينْ، مِينْزِي مَاڒَا ثڭّمْ أَيَا، خنِّي عمَّارْصْ أَذْ ثنْقَارْضمْ.

‏11 مِينْزِي أَمُّو إِ ذ أَومْ غَا إِمَّارْنِي س وَاطَّاسْ وَاذَافْ إِشْنَانْ غَارْ ثْڭلْذِيثْ إِتّْذُومَانْ ن سِيذِيثْنغْ يشُّو لْمَاسِيحْ.

‏12 س ؤُينِّي وَارْ ثجِّيغْ أَذْ كنِّيوْ سّْعقْڒغْ زِي مَانْ أَيَا ڒبْذَا، وَاخَّا كنِّيوْ ثسّْنمْ ؤُ أَقَا كنِّيوْ ثْبدّمْ خْ ذْسَاسْ ن ثِيذتّْ ثَانِيثَا.

‏13 مَاشَا إِتّْغِيڒْ أَيِي نِيشَانْ، مِينْ غَا كّغْ عَاذْ ذِي أَرِّيمثْ-أَ، حِيمَا أَذْ كنِّيوْ سّْفَاقغْ أَمْ سّْعقْڒغْ كنِّيوْ، ^▪  

‏14 مِينْزِي سّْنغْ، أَقَا ثَاكسِّيثْ ن أَرِّيمثْ إِنُو أَذْ د-ثَاسْ ذغْيَا، أَمْ مَامّشْ ذ أَيِي إِسَّارْڭبْ سِيذِيثْنغْ يشُّو لْمَاسِيحْ. ^▪  

‏15 مَاشَا أَذْ ڭّغْ ثِيزمَّارْ حِيمَا أَذْ ثْعقْڒمْ خْ ثْمسْڒَايِينْ-أَ أَوَارْنِي ؤُفُّوغْ إِنُو.

‏16 مِينْزِي نشِّينْ وَارْ نضْفَارْ شَا ثِيحُوجَا إِسَايْسنْ، ؤُمِي ثُوغَا ذ أَومْ نتّْبَارّحْ جّهْذْ ذ ثْوَاسِيثْ ن سِيذِيثْنغْ يشُّو لْمَاسِيحْ، مَاشَا أَقَا نشْهذْ س ثِيطَّاوِينْ نّغْ خْ لْعَاضَامَا نّسْ. ^▪  

‏17 مِينْزِي نتَّا أَقَا إِطّفْ زِي أَربِّي ثَابَابَاثْ شَّانْ ذ ؤُعُودْجِي ؤُمِي ذ أَسْ د-ثُوسَا ثْمِيجَّا نِّي زڭْ ؤُعُودْجِي إِ د-إِتّْڒِيقنْ أَكْ-ذ لْعَاضَامَا نّسْ: ”وَا ذ مِّي إِنُو إِعِيزّنْ ونِّي ذَايسْ ؤُفِيغْ أَرْضَا إِنُو.“ ^▪  

‏18 ؤُڒَا ذ نشِّينْ نسْڒَا ثْمِيجَّا أَيَا زڭْ ؤُجنَّا، ؤُمِي ثُوغَا إِسَّاوَاڒْ أَكِيذسْ، ڒَامِي ندْجْ أَكِيذسْ خْ وذْرَارْ إِقدّْسنْ.

‏19 ؤُڒَا ذ نشِّينْ غَارْنغْ أَوَاڒْ ذ ثِيذتّْ ن إِنَابِييّنْ ؤُ كنِّيوْ أَذْ ثڭّمْ مْلِيحْ مَاڒَا ثوْشِيمْ أَسنْ ثَايْنِيثْ أَمْ إِ يِيجّْ ن ڒفْنَارْ يَارقّنْ ذڭْ إِجّْ ن ومْشَانْ إِبُّوبّسْ، أَڒْ غَا إِدُّوقّزْ وَاسّْ ؤُشَا أَذْ ثنْقَارْ ثْفُوشْثْ ذڭْ وُوڒَاونْ نْومْ. ^▪   ‏20 أَمزْوَارْ إِتّْخصَّا كنِّيوْ أَذْ ثسّْنمْ أَقَا وَارْ ذِينْ أَوَاڒْ إِ زَّايسْ نبَّانْ إِوْذَانْ إِ إِبدّْ وحّْذسْ وَارْ إِقِّينْ أَكْ-ذ ثِيرَا إِقدّْسنْ. ‏21 مِينْزِي نُّوپُووَا وَارْ د-تّفّغْ عمَّارْصْ زِي مِينْ إِخْسْ بْنَاذمْ، مَاشَا ثُوسَا-د س يرْيَازنْ إِقدّْسنْ ن أَربِّي نِّي إِسِّيوْڒنْ أَمْ ذ أَسنْ د-إِنْذهْ أَرُّوحْ إِقدّْسنْ. ^▪