حْضَامْ إِخفْ نْومْ زڭْ إِمْسڒْمَاذنْ إِسّْخَارِّيقنْ
2
1 مَاشَا ثُوغَا ذِينْ عَاوذْ جَارْ ڒْڭنْسْ إِنَابِييّنْ إِسّْخَارِّيقنْ، أَمْ مَامّشْ إِ غَا إِڒِينْ ؤُڒَا ذ إِمسْغَارنْ ن ژُورْ جَارْ أَومْ، أَذْ سِّيذْفنْ ثِيبْرِيذِينْ إِتَّاردّْدْجنْ ؤُ نْكَارنْ سِيذِي إِ ثنْ إِسْغِينْ، أَذْ سِّيوْضنْ أَمُّو أَريّبْ ذغْيَا خْ يِيخفْ نْسنْ. ▪ 2 أَطَّاسْ إِ ثنْ غَا إِضْفَارنْ ذِي ڒقْجَاحثْ نْسنْ، أَڒْ غَا إِتّْوَاشقّفْ وبْرِيذْ ن ثِيذتّْ زِي سِّيبّثْ نْسنْ. 3 س طّْمعْ ؤُ س وَاوَاڒنْ إِسَايْسنْ أَذْ زَّايْومْ سْثنْفْعنْ، مَاشَا ڒْحُوكْمْ خَاسنْ زڭْ وشْحَاڒْ ؤُيَا وَارْ إِبْضِيڒْ شَا ؤُشَا أَهلّكْ نْسنْ وَارْ إِتّْنُوذُومْ شَا. ▪ 4 مِينْزِي مَاڒَا أَربِّي وَارْ إِسَّارْ خْ لْمَالَاكَاثْ إِ يڭِّينْ دّْنُوبْ، مَاشَا إِنْضَارْ إِ-ثنْ ذِي سْنَاسڒْ ن ثَادْجسْثْ ذِي ڒَادْجَاغْ يُودْجْغنْ، ؤُشَا إِسلّمْ إِ-ثنْ حِيمَا أَذْ ذِينْ تّْوَاخمّْڒنْ أَڒْ ڒْحُوكْمْ ن ؤُعدّبْ، ▪ 5 ؤُ عَاوذْ وَارْ إِسَّارْ خْ دُّونشْثْ ن زِيشْ، مَاشَا ثُوغَا إِحْضَا نُوحْ، أَمْبَارّحْ ن ثْسڭْذَا وِيسّْ ثْمنْيَا، ڒَامِي د-إِضْڒقْ أَربِّي ڒْحمْڒثْ خْ دُّونشْثْ ن لْكُوفَّارْ، ▪ 6 ؤُ عَاوذْ ڒَامِي إِسّشْمضْ نتَّا ثِيندَّامْ ن سَاذُومْ ذ عَامُورَّا ؤُ إِحْكمْ خَاسنْثْ س ؤُنقْڒبْ، أَقَا يَارَّا إِ-ثنْ مَارَّا ذ لْمَاثَالْ إِ لْكُوفَّارْ إِ غَا يِيڒِينْ عَاذْ. ▪
7 عَاوذْ إِسّنْجمْ لُوثْ، أَمْسڭَّاذْ، ونِّي ثُوغَا إِودّْبنْ أَطَّاسْ زِي ثِيشْڒِي إِفُوشّْحنْ ن يِينِّي وَارْ غَارْ ثدْجِي شَّارِيعَا. ▪ 8 مِينْزِي أَمْسڭَّاذْ وَانِيثَا، أَمْ ثُوغَا إِزدّغْ جَارْ أَسنْ، ثُوغَا إِتّْعدَّابْ ڒعْمَارْ إِسڭّْذنْ نّسْ زڭْ وَاسّْ أَڒْ وَاسّْ ؤُمِي إِژْرَا ؤُ إِسْڒَا ثِيمڭَّا نْسنْ إِ وَارْ د-يُوسِينْ أَكْ-ذ شَّارِيعَا. ▪ 9 أَمُّو إِ إِسّنْ سِيذِي مَامّشْ إِ غَا إِسُّوفّغْ إِنِّي ث إِتّڭّْوذنْ زِي ڒْمحْنثْ، مَاشَا نتَّا إِحطَّا إِنِّي وَارْ إِسڭّْذنْ حِيمَا أَذْ تّْوَاعدّْبنْ ذڭْ وَاسّْ ن لْحِيسَابْ، ▪
10 مَاهُو قَاعْ إِنِّي إِضْفَارنْ أَرِّيمثْ ثَامذْنُوبْثْ أَمْ تّْمژّْرنْ ذِي مِينْ إِخمْجنْ، تّْبَارّْحنْ ضِيدّْ ن صُّولْطَا ن إِجنْوَانْ. أَقَا أَثنْ ذ إِمْعفَّارنْ ذ إِمْنفّْخنْ، وَارْ تَّارْجِيجنْ زَّاثْ مِينْ إِعُودْجنْ أَمْ تّْشقَّافنْ.
11 وَاخَّا لْمَالَاكَاثْ ؤُجَارنْثْ ثنْ ذِي صُّولْطَا ذ جّهْذْ، وَارْ خَاسنْ سِّيوِيضنْثْ ڒْحُوكْمْ ن سِيذِي ذِي سِّيبّثْ ن ؤُشقَّافْ.
12 نِيثْنِي أَمشْنَاوْ إِمُودَّارنْ إِڭْنَاونْ إِنِّي إِضفَّارنْ طّْبِيعثْ، أَقَا تّْوَارْونْ-د حِيمَا أَذْ تّْوَاغَارْصنْ س ڒْمُوسْ ؤُ أَذْ تّْوَاردّْدْجنْ، مِينْزِي تّْشقَّافنْ ذِي مِينْ ذِي وَارْ فهّْمنْ. أَذْ تّْوَاهلّْكنْ كُوڒْشِي ذِي ڒْغشّْ نْسنْ. ▫ ▪
13 إِنَا ذ إِنِّي إِحسّْبنْ ڒْمُوعْصِييّثْ ذ ڒْمُونثْ إِ ڒْمُوعْصِييّثْ نْسنْ. إِتّْغِيڒْ أَسنْ ذ أَبَارّعْ ؤُمِي ضفَّارنْ شّهْوَاثْ نْسنْ س ؤُزِيڒْ، أَقَا نِيثْنِي شُّورنْ س إِبقِّيضنْ، تّْهِيلَّانْ ذڭْ وشْمَاثْ نْسنْ خْمِي تّْنشْطنْ.
14 ثِيطَّاوِينْ نْسنْ شُّورنْثْ س زِّينَا، أَقَا نِيثْنِي وَارْ بدّنْ شَا مَاحنْذْ أَذْ خْضَانْ، نِيثْنِي غكّْوَانْ ڒعْمُورْ ن يِينِّي وَارْ إِبدّنْ نِيشَانْ ؤُشَا غَارْسنْ ؤُڒْ إِتّْوَاربَّانْ خْ طّْمعْ، أَقَا نِيثْنِي ذ ثَارْوَا ن نّعْڒثْ،
15 فّْغنْ زڭْ وبْرِيذْ إِسڭّْمنْ، ودَّارنْ، ؤُشَا ضْفَارنْ أَبْرِيذْ ونِّي إِكَّا بَالْعَامْ، مِّيسْ ن فَاغُورْ، ونِّي ثُوغَا إِتّخْسنْ ڒْمُونثْ ن ڒْغشّْ. ▪
16 مَاشَا نتَّا إِكْسِي أَوبّخْ إِ ڒْمُوعْصِييّثْ نّسْ، مِينْزِي زَّايْڒثْ ثَاڭْنَاوْثْ ثسِّيوڒْ غَارسْ س إِشْثْ ن ثْمِيجَّا ن إِوْذَانْ، ثمْنعْ ثُوبُّوهڒْيَا ن ؤُنَابِي. ▪
17 نِيثْنِي ذ ڒْعُونْصَارَاثْ وَارْ ذَايسْ بُو وَامَانْ، ذ إِسيْنُوثنْ تّْوَاعَارّْننْ س ثْحَارْيَاضْثْ، أَقَا ثُوبَّارْشنْثْ ن ثَادْجسْثْ ثتّْوَاسوْجذْ أَسنْ. ▪
18 مَاغَارْ مَاڒَا سِّيوْڒنْ س نّْعِي ن ڒْحَارْضْ نْسنْ إِخْوَانْ، أَقَا نِيثْنِي سّْغكّْوَانْ س نّشْوَاثْ إِخمْجنْ ن أَرِّيمثْ إِنِّي إِڭُّورنْ أَذْ أَروْڒنْ زڭْ إِنِّي إِسلّْمنْ إِخفْ نْسنْ إِ ؤُغكّْوِي.
19 وَاعْذنْ ثنْ س ثِيڒلِّي، وَاخَّا نِيثْنِي سِيمَانْثْ نْسنْ ذ إِمْسخَّارنْ ن ڒْغشّْ. مِينْزِي وِي إِ زِي إِتّْوَاغلّبْ ورْيَازْ، أَقَا إِ نتَّا أَذْ يِيڒِي ذ أَمْسخَّارْ. ▪
20 مَاغَارْ أَوَارْنِي ڒَامِي د-أَروْڒنْ نِيثْنِي زِي ڒخْمجْ ن دُّونشْثْ س ثُوسّْنَا ن سِيذِيثْنغْ ذ أَمْسنْجمْ نّغْ، يشُّو لْمَاسِيحْ، أَقَا ذوْڒنْ-د ذِي ثخْشفْثْ نّسْ عَاوذْ ؤُشَا تّْوَاغلّْبنْ زَّايسْ، أَقَا خنِّي أَنڭَّارْ نْسنْ أَذْ أَسنْ ث يُورَا مَاهُو خْ ؤُمزْوَارْ. ▪ 21 أَقَا حْسنْ أَسنْ مَاعْلِيكْ قِّيمنْ وَارْ سِّيننْ أَبْرِيذْ ن ثْسڭْذَا زِي مِينْ سّْننْ، ؤُشَا ڒخْذنِّي أَذْ فّْغنْ عَاوذْ خْ ثوْصيّثْ إِقدّْسنْ إِ ذ أَسنْ د-إِتّْوَاسلّْمنْ. 22 أَقَا ثمْسَارْ أَسنْ أَمْ إِنَّا وَاوَاڒْ-أَ ن ثِيذتّْ: ”أَقْزِينْ أَقَا إِذْوڒْ-د خْ مِينْ ثُوغَا د-إِعُوقّْ!“ نِيغْ مَامّشْ ذ أَسْ قَّارنْ إِنّغْنِي: ”ثِيڒفْثْ إِصْفَانْ ثذْوڒْ-د ثتّْمَارَّاغْ ذڭْ ؤُبَارْيُوضْ نّسْ!“ ▪