‏1 مَاشَا غَارْ ؤُمزْوَارْ ثُوغَا ذِينْ ڒفْرُوضْ إِ ثْسخَّارْثْ ؤُ ثُوغَا ذِينْ إِشْثْ ن زَّاوشْثْ إِقدّْسنْ ذِي دُّونشْثْ-أَ. ‏2 مِينْزِي ثَازذِّيغْثْ ثَامزْوَارُوثْ إِ ثتّْوَاڭّْ، ثُوغَا ذَايسْ ڒْقنْذِيڒْ ذ ثْزوْضَا ذ وغْرُومْ ن وسْشَانْ ؤُشَا قَّارنْ أَسْ: ’أَقدَّاسْ‘. ^▪   ‏3 مَاشَا ثَازذِّيغْثْ ن ذَاخڒْ، أَوَارْنِي إِ ؤُڒحَّافْ وِيسّْ ثْنَاينْ، قَّارنْ أَسْ ’أَقدَّاسْ خْ ؤُقدَّاسْ‘. ^▫   ‏4 أَقَا ذَايسْ ثَامجْمَارْثْ ن وُورغْ إِ ڒبْخُورْ ذ تَّاپُوثْ ن ڒْعَاهْذْ إِغدْجْفنْ س وُورغْ غَارْ مَارَّا إِغزْذِيسنْ. ثُوغَا ذَايسْ إِجّْ ن ؤُزنْبِيڒْ ن وُورغْ ذَايسْ ’مَانَّا‘، ؤُ ذَايسْ ؤُڒَا ذ ثَاغَّارْشْثْ ن هَارُونْ ثنِّي إِتّْوَانُووّْشنْ ذ ثڒْوِيحِينْ ن وژْرُو ن ڒْعَاهْذْ. ^▪   ‏5 سنّجْ إِ مَانْ أَيَا أَقَا ذِينْ ’إِخِيرُوبنْ‘ ن ڒْعزّْ، إِنِّي إِدّْڒِينْ ثَاقبَّارْثْ ن وصْڒَاحْ إِ إِدْجَانْ خْ تَّاپُوثْ س ثِيڒِي ن وَافْرِيونْ نْسنْ. مَاشَا وَارْ غَارْنغْ بُو ڒْوقْثْ ڒخُّو حِيمَا أَذْ نسِّيوڒْ خْ كُوڒْ إِشْثنْ زِي ثْمسْڒَايِينْ-أَ إِ إِتّْوَاسّْوجْذنْ أَمُّو. ^▪   ‏6 إِكهَّاننْ ثُوغَا تَّاذْفنْ ڒبْذَا غَارْ ثْزذِّيغْثْ نِّي غَارْ بَارَّا، ثنِّي ذ ثَامزْوَارُوثْ، حِيمَا أَذْ ذَايسْ كمّْڒنْ ثْسخَّارْثْ نْسنْ. ^▪   ‏7 مَاشَا أَرَّايْسْ ن إِكهَّاننْ ثُوغَا إِتَّاذفْ إِشْثْ ن ثْوَاڒَا ذڭْ ؤُسڭّْوَاسْ غَارْ ثْزذِّيغْثْ ن ذَاخڒْ أَكْ-ذ إِذَامّنْ إِ إِقدّمْ خْ يِيخفْ نّسْ ؤُڒَا خْ ؤُودَّارْ ن ڒْڭنْسْ. ^▪   ‏8 س ثبْرِيذْثْ-أَ إِسّْشنْ أَرُّوحْ إِقدّْسنْ مْلِيحْ بلِّي أَبْرِيذْ إِقدّْسنْ عَاذْ وَارْ د-إِتّْوَامضْهَارْ، ؤُمِي عَاذْ ثَازذِّيغْثْ ثَامزْوَارُوثْ ثْبدّْ. ^▪   ‏9 مَانْ أَيَا ذ أَمذْيَا إِ ڒْوقْثْ نِّي ذِي ثُوغَا تّْقدَّامنْ ضّْذَاقِي ذ ثْغَارْصِينْ نِّي وَارْ زمَّارنْثْ أَذْ أَوْينْثْ ڒكْمَارثْ غَارْ ثْنفْسشْثْ ن ونِّي إِ-ثنْثْ إِقدّْمنْ.

‏10 أَقَا أَثنْثْ مْغِيرْ ذ مَاشَّا ذ ثْسسِّي ذ شّْكلْ ن ڒُوضُو ؤُشَا س ڒفْرُوضْ إِ إِتّْهِيمَّانْ أَرِّيمثْ ثَامذْنُوبْثْ وَاهَا، تّْوَامُورنْثْ أَڒْ ڒْوقْثْ ن وعْذَاڒْ ن ثْسڭْذَا. ^▪  

‏11 مَاشَا لْمَاسِيحْ إِ د-يُوسِينْ، أَقَا إِذْوڒْ ذ أَرَّايْسْ ن إِكهَّاننْ خْ ڒْخَارْ إِ إِڭَّا. نتَّا يُوذفْ غَارْ ثْزذِّيغْثْ ثَامقّْرَانْثْ إِكمّْڒنْ ثنِّي وَارْ إِتّْوَاڭّنْ شَا س إِفَاسّنْ، وَارْ ثدْجِي زِي مِينْ د-إِتّْوَاخڒْقنْ. ^▪  

‏12 وَارْ يُوذِيفْ شَا أَكْ-ذ إِذَامّنْ ن إِغَايْضنْ ذ إِعجْميّنْ ن إِجّْ ن ؤُسڭّْوَاسْ، مَاشَا أَقَا يُوذفْ إِشْثْ ن ثْوَاڒَا أَكْ-ذ إِذَامّنْ ن يِيخفْ نّسْ غَارْ زَّاوشْثْ إِقدّْسنْ، ؤُ أَمُّو إِ د-يِيوِي أَصْڒَاحْ إِتّْذُومَانْ. ^▪  

‏13 مِينْزِي مَاڒَا إِذَامّنْ ن إِغَايْضنْ ذ إِينْذُوزنْ ؤُ إِغّضْ ن ؤُينْذُوزْ أَزڭّْوَاغْ إِ إِتّْوَارُوشّنْ خْ ينِّي إِتّْوَاخمْجنْ، أَقَا قدّْسنْ ؤُ سِّيزْذِيڭنْ ثنْ زِي جِّيهثْ ن أَرِّيمثْ، ^▪  

‏14 مشْحَاڒْ عَاذْ إِذَامّنْ ن لْمَاسِيحْ، ونِّي إِوْشِينْ إِخفْ نّسْ إِ أَربِّي س أَرُّوحْ ن ڒبْذَا ذ ثَاغَارْصْثْ وَارْ ذَايسْ بُو ڒْعِيبْ، إِ غَا إِسِّيزذْڭنْ ثَانفْسشْثْ نّغْ زِي ڒخْذَايمْ إِمُّوثنْ حِيمَا أَذْ نخْذمْ أَربِّي إِدَّارنْ؟ ^▪  

‏15 س ؤُينِّي أَقَا نتَّا ذ أَمْسصْڒَاحْ ن ڒْعَاهْذْ ن جْذِيذْ، مَاغَارْ س ڒْموْثْ نّسْ إِذْوڒْ نتَّا ذ أَصْڒَاحْ إِ ينِّي إِخطَّانْ ضِيدّْ ڒْعَاهْذْ أَمزْوَارْ، حِيمَا نشِّينْ، إِنِّي إِتّْوَاڒَاغَانْ إِ ڒْوَارْثْ ن ڒبْذَا، أَذْ طّْفنْ لْوَاعْذْ. ^▪  

‏16 مِينْزِي مَانِي إِدْجْ ڒْعَاهْذْ، إِتّْخصَّا أَذْ ثتّْوَاسَارْڭبْ ڒْموْثْ ن ونِّي إِڭِّينْ ڒْعَاهْذْ،

‏17 مِينْزِي ڒْعَاهْذْ أَذْ إِذْوڒْ إِصْڒحْ وَاهَا خْمِي إِ غَا إِمّثْ حذْ، وَارْ إِتِّيڒِي شَا عَاذْ نِيشَانْ مِينْ غَا يكّْ إِدَّارْ ونِّي إِڭِّينْ ڒْعَاهْذْ. ^▪  

‏18 س ؤُينِّي ؤُڒَا ذ ڒْعَاهْذْ أَمزْوَارْ وَارْ إِتّْوَاضْمنْ شَا بْڒَا إِذَامّنْ،

‏19 مِينْزِي أَوَارْنِي ڒَامِي كُوڒْ ثَاوْصِييّثْ نِّي إِدْجَانْ ذِي شَّارِيعَا، أَقَا إِوصَّا إِ ڒْڭنْسْ س ؤُفُوسْ ن مُوسَا، إِكْسِي نتَّا إِذَامّنْ ن ؤُينْذُوزْ أَكْ-ذ وَامَانْ ؤُڒَا ذ ثَاضُوفْثْ ثَازڭّْوَاغْثْ ذ ثْعلْدْجثْ، ؤُشَا إِرُوشّْ إِ-ثنْ خْ إِذْلِيسنْ ؤُ خْ مَارَّا ڒْڭنْسْ، ‏20 إِنَّا أَسنْ:

”إِنَا ذ إِذَامّنْ ن ڒْعَاهْذْ،

إِ ذ أَومْ يُومُورْ أَربِّي.“ ^▪  

‏21 ثُوغَا إِرُوشّْ عَاوذْ ثَازذِّيغْثْ إِقدّْسنْ ذ مَارَّا ڒقْشُوعْ ن ثْسخَّارْثْ ذِي ثْزذِّيغْثْ س إِذَامّنْ. ‏22 مَاغَارْ مَارَّا ثِيمسْڒَايِينْ نِّي إِدْجَانْ ذِي شَّارِيعَا تّْوَاسِيزذْڭنْثْ س إِذَامّنْ ؤُشَا بْڒَا أَسِيزّڒْ ن إِذَامّنْ وَارْ ذِينْ إِدْجِي شَا وغْفَارْ.

‏23 ثُوغَا قَاعْ إِتّْخصَّا أَذْ تّْوَاسِيزْذڭنْ ڒمْثُوڒْ ن ثِيمسْڒَايِينْ إِ إِدْجَانْ ذڭْ إِجنْوَانْ، مَاشَا مِينْ إِدْجَانْ ن ؤُجنَّا سِيمَانْثْ نّسْ س ثْغَارْصِينْ إِشْنَانْ زِي ثِينَا. ^▫   ‏24 مِينْزِي لْمَاسِيحْ وَارْ يُوذِيفْ شَا ذِي زَّاوشْثْ إِقدّْسنْ إِ إِتّْوَاڭّنْ س إِفَاسّنْ، ذ ونِّي نتَّا ذ لْمَاثَالْ ن مِينْ إِدْجَانْ ذ ثِيذتّْ، مَاشَا ذڭْ ؤُجنَّا سِيمَانْثْ نّسْ، حِيمَا أَذْ د-إِضْهَارْ غَارْنغْ قِيبَاتْشْ إِ أَربِّي. ‏25 وَارْ إِدْجِي حِيمَا أَذْ إِقدّمْ إِخفْ نّسْ أَطَّاسْ ن ثْوَاڒَاوِينْ أَمْ مَامّشْ ثُوغَا إِتَّاذفْ أَرَّايْسْ ن إِكهَّاننْ كُوڒْ أَسڭّْوَاسْ غَارْ زَّاوشْثْ إِقدّْسنْ س إِذَامّنْ وَارْ إِدْجِينْ نّسْ، ^▪   ‏26 - مِينْزِي مَاڒَا أَمُّو إِ إِدْجْ، إِڒِي إِتّْخصَّا أَذْ إِودّبْ أَطَّاسْ ن ثْوَاڒَاوِينْ زِي بدُّو ن دُّونشْثْ - ، مَاشَا ڒخُّو، غَارْ ؤُنڭَّارْ ن إِكُوذنْ، إِوْشَا نتَّا إِخفْ نّسْ إِشْثْ ن ثْوَاڒَا حِيمَا أَذْ إِبطّڒْ دّْنُوبْ س ثْغَارْصْثْ نّسْ.

‏27 أَمشْنَاوْ مَامّشْ ذ إِتّْوَاسَّارْسْ إِ إِوْذَانْ أَذْ مّْثنْ إِشْثْ ن ثْوَاڒَا، ؤُشَا خنِّي أَوَارْنِي إِ ڒْموْثْ نْسنْ أَذْ د-يَاسْ ڒْحُوكْمْ، ‏28 أَمُّو عَاوذْ إِمّوْشْ لْمَاسِيحْ إِشْثْ ن ثْوَاڒَا ذ ثَاغَارْصْثْ، إِوْشَا ذڭْ يِيخفْ نّسْ ثَاغَارْصْثْ ن دّْنُوبْ ن وَاطَّاسْ، مَاشَا غَارْ ثْوَاسِيثْ نّسْ إِ ثْوَاڒَا وِيسّْ ثْنَاينْ أَذْ إِتّْوَاژَارْ بْڒَا دّنْبْ إِ ثُوذَارْثْ ن يِينِّي ث إِتّْرَاجَانْ. ^▪