‏1 مِينْزِي ثُوغَا شَّارِيعَا ذ ثِيڒِي ن ڒْخَارْ إِ د غَا يَاسنْ وَاهَا، وَارْ غَارسْ صِّيفثْ ن ثْمسْڒَايِينْ سِيمَانْثْ نْسنْثْ. س ؤُينِّي وَارْ زمَّارنْثْ ثْغَارْصَا نِّي، وَاخَّا إِوْينْ ثنْثْ-إِ-د كُوڒْ أَسڭّْوَاسْ، أَذْ أَوْينْثْ ڒكْمَارثْ خْ ينِّي ثنْثْ د-إِتّْقَارَّابنْ. ^▪   ‏2 مِينْزِي مَاڒَا إِبَانْ-د أَقَا ثتَّاوْينْثْ غَارْ ڒكْمَارثْ، أَذْ ثِيڒِي تّْوَاسْبدّنْ نِيثْنِي زڭْ ؤُوهّبْ ن ثْغَارْصَا نْسنْ أَطَّاسْ زڭْ وَامِي، مِينْزِي وَارْ ثتّْوَاكّْوُورْ عَاذْ ثْنفْسشْثْ نْسنْ س دّنْبْ، أَوَارْنِي ڒَامِي تّْوَاسِّيزذْڭنْ إِشْثْ ن ثْوَاڒَا. ‏3 مَاشَا س مَانْ أَيَا تّْوَاسْفكَّارنْ أَسنْ-د دّْنُوبْ نْسنْ كُوڒْ أَسڭّْوَاسْ، ‏4 مِينْزِي إِذَامّنْ ن إِفُونَاسنْ ذ إِغَايْضنْ وَارْ زمَّارنْ أَذْ سِّيزْذْڭنْ زِي دّْنُوبْ. ^▪  

‏5 س ؤُينِّي ڒَامِي د-يُوذفْ غَارْ دُّونشْثْ، إِنَّا:

”ثَاغَارْصْثْ نِيغْ ثِيوْهِيبِينْ وَارْ ثنْثْ ثخْسذْ،

مَاشَا أَقَا ثسّْيَارْضذْ أَيِي إِشْثْ ن أَرِّيمثْ. ^▪  

‏6 ثِيغَارْصِينْ ن وشْمَاضْ ن ڒهْنَا إِ دّْنُوبْ

وَارْ ثنْثْ ثتَّارذْ.“

‏7 ڒخْذنِّي نِّيغْ:

”خْزَارْ، أَذْ د-أَسغْ،

غَارْ بدُّو ن إِذْلِيسنْ إِتّْوَارِي خَافِي،

حِيمَا أَذْ ڭّغْ مِينْ ثخْسذْ شكْ، أَ أَربِّي!“ ^▪  

‏8 ثُوغَا إِنَّا قْبڒْ: ”ثِيغَارْصِينْ ذ ثْموْشَا ذ ثْغَارْصِينْ س ثْمسِّي ذ ثْغَارْصِينْ إِ دّْنُوبْ وَارْ ثنْثْ ثخْسذْ نِيغْ وَارْ خَاسنْثْ ثخْسذْ!“، وَاخَّا أَقَا أَثنْثْ تّْوَاقدّْمنْثْ عْلَاحْسَابْ شَّارِيعَا. ‏9 أَوَارْنِي مَانْ أَيَا إِنَّا: ”خْزَارْ، ؤُسِيغْ-د حِيمَا أَذْ ڭّغْ مِينْ ثخْسذْ شكْ، أَ أَربِّي.“ إِكّسْ أَمزْوَارْ، حِيمَا أَذْ إِسّْڭعّذْ وِيسّْ ثْنَاينْ.

‏10 مَاغَارْ س مَانْ أَيَا، س ڒْخَاضَارْ نّسْ، أَقَا نتّْوَاقدّسْ ذڭْ إِشْثْ ن ثْوَاڒَا س ثْغَارْصْثْ ن أَرِّيمثْ ن يشُّو لْمَاسِيحْ. ^▪  

‏11 مَاغَارْ كُوڒْ أَكهَّانْ إِ ثُوغَا إِتّْسخَّارْ كُوڒْ أَسّْ، أَقَا إِوهّبْ أَطَّاسْ ن ثْوَاڒَاوِينْ سِيمَانْثْ ن ثْغَارْصَا، ثِينِّي وَارْ إِزمَّارنْ أَذْ سِّيزذْڭنْثْ زِي دّْنُوبْ.

‏12 مَاشَا وَانِيثَا، أَوَارْنِي ڒَامِي إِقدّمْ إِشْثْ ن ثْغَارْصْثْ خْ دّْنُوبْ، أَقَا إِقِّيمْ خْ يفُّوسْ ن أَربِّي إِ ڒبْذَا. ^▪  

‏13 زِي ڒخْذنِّي إِتّْرَاجَا أَڒْ ذ أَسْ تّْوَاڭّنْ ڒْعذْيَانْ نّسْ ذ ثَانبْذَاثْ سَاذُو إِضَارنْ نّسْ.

‏14 مِينْزِي س إِشْثْ ن ثْغَارْصْثْ أَقَا يِيوِي إِ ڒبْذَا ڒكْمَارثْ غَارْ مَارَّا إِنِّي زَّايسْ إِتّْوَاقدّْسنْ.

‏15 أَرُّوحْ إِقدّْسنْ عَاوذْ إِشْهذْ إِ نشِّينْ، إِقَّارْ:

‏16 ”ذ وَا ذ ڒْعَاهْذْ إِ ذ أَسنْ غَا وْشغْ

أَوَارْنِي إِ وُوسَّانْ نِّي، إِقَّارْ سِيذِي:

’أَذْ ڭّغْ شَّارِيعَا إِنُو ذِي ڒعْقڒْ نْسنْ،

أَذْ ت أَرِيغْ عَاوذْ ذڭْ وُوڒَاونْ نْسنْ. ^▪  

‏17 ؤُشَا دّْنُوبْ نْسنْ ذ إِخطَّانْ نْسنْ،

عمَّارْصْ أَذْ ذَايْسنْ فكَّارغْ عَاذْ.‘ “ ^▪  

‏18 مَانِي إِتِّيڒِي وغْفَارْ إِ دّْنُوبْ، وَارْ ذِينْ إِقِّيمْ عَاذْ ثْغَارْصْثْ خْ دّْنُوبْ.

‏19 س ؤُينِّي، أَ أَيْثْمَا، أَقَا غَارْنغْ تِّيقّثْ مَاحنْذْ أَذْ نَاذفْ غَارْ زَّاوشْثْ إِقدّْسنْ س إِذَامّنْ ن يشُّو، ^▪   ‏20 خْ وبْرِيذْ ن جْذِيذْ إِدَّارنْ إِ ذ أَنغْ إِسّوْجذْ أَمْ د-إِكَّا زڭْ ؤُڒحَّافْ، ونِّي ذ أَرِّيمثْ نّسْ، ‏21 ؤُشَا أَقَا غَارْنغْ أَرَّايْسْ ن إِكهَّاننْ خْ ثَادَّارْثْ ن أَربِّي. ‏22 أجّْ أَنغْ خنِّي أَذْ د-نْقَارّبْ س وُوڒْ ن ثِيذتّْ، ذِي تِّيقّثْ ن لْ-إِيمَانْ، أَمْ تّْوَارُوشَّانْ ؤُ تّْوَاسِّيزْذَاڭنْ وُوڒَاونْ نّغْ زِي ثْنفْسشْثْ ثَاعفَّانْثْ، ؤُ أَمْ تّْوَاسِّيرْذنْثْ أَرِّيمَاثْ نّغْ س وَامَانْ إِصْفَانْ. ^▪   ‏23 أجّْ أَنغْ أَذْ نْشبَّارْ ذِي شّْهَاذثْ ن ؤُسِيثمْ نّغْ بْڒَا مَا أَذْ نَارْجِيجْ، مِينْزِي ذ ونِّي ذ أَنغْ إِوْشِينْ لْوَاعْذْ ذَايسْ ڒَامَانْ. ‏24 أجّْ أَنغْ أَذْ نحْضَا حِيمَا أَذْ نڭّْ ؤُڒْ ذڭْ وَايَاوْيَا غَارْ ثَايْرِي ؤُ غَارْ ڒخْذَايمْ ثِيصبْحَانِينْ. ‏25 وَارْ نتّجِّي شَا ثَامسْمُونْثْ نّغْ أَمْ مَامّشْ نُّومنْ شَا، مَاشَا أَذْ نسّمْحضْ إِجّنْ ونّغْنِي، مَاهُو عَاذْ خْمِي إِ غَا ثْژَارمْ أَقَا أَسّْ نِّي يِيوضْ-د.

‏26 مِينْزِي مَاڒَا إِخْضَا شَا ن إِجّْ نعْمَاذَا أَوَارْنِي مَا إِطّفْ ثُوسّْنَا ن ثِيذتّْ، خنِّي وَارْ ثقِّيمْ عَاذْ ثْغَارْصْثْ خْ دّْنُوبْ، ^▪   ‏27 مَاشَا أَرَاجِي ن لْحِيسَابْ إِسّْنخْڒْعنْ ذ ڒْعَاپُوقْ ن ثْمسِّي، ثنِّي إِ غَا إِشّنْ ڒْعذْيَانْ. ‏28 مَاڒَا حذْ إِخْضَا أَكْ-ذ شَّارِيعَا ن مُوسَا، إِتّْخصّْ أَسْ أَذْ إِتّْوَانغْ بْڒَا أَرّحْمثْ خْ ؤُقمُّومْ ن ثْنَاينْ نِيغْ ثْڒَاثَا ن ڒشْهُوذْ. ^▪   ‏29 مشْحَاڒْ كْثَارْ إِتّْخصَّا أَذْ إِهْوَا لْعِيقَابْ خْ ؤُزدْجِيفْ ن ونِّي إِعفّْسنْ خْ مِّيسْ ن أَربِّي ؤُ ثُوغَا إِحسّبْ إِذَامّنْ ن ڒْعَاهْذْ إِ زِي ثُوغَا إِتّْوَاقدّسْ ذ ثَاخْمُوجِي، ؤُ خنِّي إِسّحْقَارْ أَرُّوحْ ن أَرْضَا؟ ‏30 مِينْزِي نسّنْ ذ ونِّي إِنَّانْ:

”أَنْثَاقمْ إِ نشّْ ؤُمِي إِدْجْ، نشّْ أَذْ ث خدْجْصغْ!“

ؤُشَا عَاوذْ:

”سِيذِي أَذْ إِحْكمْ ڒْڭنْسْ نّسْ.“ ^▪  

‏31 سّعْذْ ذ أَبَارْشَانْ إِ ونِّي إِ غَا إِوْضَانْ ذڭْ إِفَاسّنْ ن أَربِّي إِدَّارنْ.

‏32 س ؤُيَا فكَّارمْ ذڭْ وُوسَّانْ إِمزْوُورَا ڒَامِي ثتّْوَاسّْغضْصمْ ؤُ ثُوغَا ثَاربُّومْ أَمنْغِي أَمقّْرَانْ أَمْ مَامّشْ خَاومْ ثكَّا ڒفْضِيحثْ ذ ڒْمحْنثْ. ‏33 ثْذوْڒمْ ذ إِجّْ ن أَفُورّجْ ؤُ ثْشَارْشمْ أَكْ-ذ إِنّغْنِي ؤُمِي ذَايْسنْ إِتّْوَاڭّْ أَمُّو كِيفْكِيفْ. ‏34 مِينْزِي ثكْسِيمْ أَمْنُوسْ خْ ينِّي إِتّْوَاحبّْسنْ، ؤُشَا ثْقبْڒمْ أَكشّضْ ن وَاڭْڒَا نْومْ س ڒفْرَاحثْ، ثسّْنمْ بلِّي غَارْومْ أَڭْڒَا إِمْغَارْ إِ وَارْ إِفنِّينْ ذڭْ إِجنْوَانْ. ^▪  

‏35 وَارْ نطَّارمْ شَا ثَارْيَاسْثْ نْومْ نِّي غَارْ ثدْجْ إِشْثْ ن ڒْمُونثْ ثمْغَارْ. ‏36 مِينْزِي إِتّْخصَّا كنِّيوْ ضّْبَارْ، حِيمَا أَذْ ثطّْفمْ لْوَاعْذْ أَمْ ثتّڭّمْ مِينْ إِخْسْ أَربِّي. ^▪  

‏37 ”مِينْزِي ذْرُوسْ ن ڒْوقْثْ إِ ذِينِّي

ؤُشَا ونِّي د غَا يَاسنْ أَذْ إِخشّْ،

وَارْ إِتّْعطَّاڒْ شَا. ^▪  

‏38 مَاشَا أَمْسڭَّاذْ س لْ-إِيمَانْ إِنُو أَذْ إِدَّارْ،

مَاشَا مَاڒَا إِسْمحْ،

وَارْ زَّايسْ إِفَارّحْ ڒعْمَارْ إِنُو.“ ^▪  

‏39 وَارْ غَارْنغْ مِينْ غَا نڭّْ س ثَارخُّوثْ إِتَّاوْينْ غَارْ ثْخسَّارْثْ، مَاشَا لْ-إِيمَانْ إِ إِتَّاوْينْ غَارْ ؤُسنْجمْ ن ڒعْمَارْ.