‏1 يَاعْقُوبْ، أَمْسخَّارْ ن أَربِّي ؤُ ن سِيذِيثْنغْ يشُّو لْمَاسِيحْ، إِ ثنْعَاشْ ن ثْقبَّاڒْ ثِينِّي إِتّْوَازدْجْعنْ جَارْ ڒڭْنُوسْ: ڒهْنَا خَاومْ! ^▪  

‏2 أَ أَيْثْمَا، مَاڒَا أَذْ خَاومْ كّنْ عْڒَامْ كُوڒْ  إِغكّْوَانْ، حسْبمْ مَانْ أَيَا مَارَّا ذ ڒفْرَاحثْ، ^▪   ‏3 مَاغَارْ كنِّيوْ ثسّْنمْ بلِّي ثَاقدْجبْثْ ن لْ-إِيمَانْ نْومْ أَذْ د-ثجّْ ضّْبَارْ. ^▪   ‏4 مَاشَا إِتّْخصَّا ضّْبَارْ أَذْ إِتّْوَاكمّڒْ حِيمَا أَذْ ثَاوْضمْ ؤُ أَذْ ثْكمّْڒمْ، ؤُشَا وَارْ كنِّيوْ إِتّْخصِّي وَالُو.

‏5 مَاڒَا شَا ن إِجّنْ زَّايْومْ ثقِّيمْ أَسْ عَاذْ ثِيغِيثْ، أَذْ ت إِتَّارْ زِي أَربِّي ونِّي إِتِّيشنْ س ثشْرِيمثْ إِ مَارَّا بْڒَا أَزَاوَارْ، ؤُشَا أَذْ أَسْ ثمّوْشْ. ^▪   ‏6 مَاشَا أجّْ إِ-ث أَذْ إِتَّارْ س لْ-إِيمَانْ، بْڒَا أَشكِّي، مِينْزِي ونِّي إِتّْشكَّانْ أَقَا نتَّا أَمْ ڒمْوَاجْ ن ڒبْحَارْ نِّي إِتّْوَاعَارّْننْ زڭْ ؤُسمِّيضْ. ‏7 وَارْ تّجِّي أَذْ أَسْ إِتّْغِيڒْ إِ بْنَاذمْ نِّي أَذْ إِكْسِي شَا زِي سِيذِي، ‏8 مَاغَارْ نتَّا س ثْنَاينْ إِزدْجِيفنْ، وَارْ يَارْسِي ذِي مَارَّا إِبْرِيذنْ نّسْ.

‏9 أجّْ ثَاوْمَاثْ إِوَاضْعنْ أَذْ ثسّمْغَارْ ذِي ڒُوعْڒَا نّسْ

‏10 ؤُ بُو-وَاڭْڒَا ذڭْ ؤُوَاضعْ نّسْ، مِينْزِي أَمشْنَاوْ ثَاوَارْذشْثْ ذِي ڒحْثِيشْ أَذْ إِفْنَا نتَّا.

‏11 ثَافُوشْثْ أَذْ ثنْقَارْ س ڒحْمُو نّسْ، أَذْ ثسّشْمضْ ڒحْثِيشْ ؤُشَا ثَاوَارْذشْثْ أَذْ ثِيسْڒَاوْ ؤُشَا أَذْ أَسْ إِرَاحْ وَاژْرِي ن وُوذمْ نّسْ. أَمُّو إِ غَا إِفْنَا عَاوذْ بُو-وَاڭْڒَا ذِي مَارَّا إِبْرِيذنْ نّسْ. ^▪  

‏12 سّعْذْ ن ورْيَازْ نِّي إِ غَا إِحمْڒنْ أَغكّْوِي، مِينْزِي مَاڒَا إِذْوڒْ ذ أَمْقدْجبْ، أَذْ إِطّفْ تَّاجْ ن ثُوذَارْثْ نِّي ثُوغَا إِوَاعْذْ زَّايسْ أَربِّي إِ ينِّي ث إِتّخْسنْ. ^▪  

‏13 وَارْ ثجِّي حذْ مَاڒَا إِتّْوَاغْوَا، أَذْ يِينِي: ”أَربِّي إِ ذ أَيِي إِغكّْوَانْ!“ أَقَا أَربِّي وَارْ إِزمَّارْ أَذْ إِتّْوَاغْوَا زِي ثُوعفّْنَا ؤُشَا نتَّا س يِيخفْ نّسْ وَارْ إِغكّْوِي ؤُڒَا ذ إِجّْ.

‏14 مَاشَا كُوڒْ إِجّْ أَذْ إِتّْوَاغْوَا زِي نّشْوثْ نّسْ ؤُشَا نّشْوثْ أَذْ ث ثطّفْ ؤُشَا أَذْ زَّايسْ إِتّْوَاغْوَا.

‏15 مَاڒَا نّشْوثْ ثكْسِي س ؤُعذِّيسْ، أَذْ د-ثَارُووْ دّْنُوبْ ؤُشَا خْمِي إِ غَا إِمْغَارْ دّْنُوبْ، أَذْ د-يَاوِي ڒْموْثْ.

‏16 أَ أَيْثْمَا إِعِيزّنْ، وَارْ ثتّْودَّارمْ!

‏17 كُوڒْ ثَاوْهِيبْثْ ثَاصبْحَانْثْ ذ إِكمّْڒنْ ثْهكّْوَا-د زِي سنّجْ، زِي ثْبَابَاثْ ن ثْفَاوِينْ إِ وَارْ غَارْ إِدْجِي ؤُبدّڒْ نِيغْ ثِيڒِي ن دّوْڒَانْ. ^▪  

‏18 يُوسَا-د أَسْ خْ ڒْخَاضَارْ مَاحنْذْ أَذْ أَنغْ د-يجّْ س وَاوَاڒْ ن ثِيذتّْ حِيمَا أَذْ نِيڒِي ذ ثَامزْوَارُوثْ زِي مَارَّا مِينْ إِ د-إِخڒْقنْ. ^▪  

‏19 سْنمْ أَيَا، أَ أَيْثْمَا إِعِيزّنْ، أجّْ كُوڒْ بْنَاذمْ أَذْ إِقدْجقْ حِيمَا أَذْ إِسڒْ، وَارْ ثْقدْجِيقمْ شَا غَارْ وَاوَاڒْ نِيغْ غَارْ ثفْقحْثْ. ^▪   ‏20 مِينْزِي ثَافْقحْثْ ن ورْيَازْ وَارْ د-إِتِّيوِي شَا ثَاسڭْذَا زَّاثْ إِ أَربِّي. ‏21 س ؤُينِّي سَّارْسمْ خَاومْ قَاعْ ثَاخْمُوجِي ذ وَاطَّاسْ ن ثُوعفّْنَا، ؤُشَا قبْڒمْ س ثمْهِينْثْ أَوَاڒْ إِ إِتّْوَاژُّونْ ذِي طّْبِيعثْ نّغْ نِّي إِزمَّارنْ أَذْ إِسّنْجمْ ڒعْمُورْ نْومْ. ^▪  

‏22 إِڒِيمْ ذ إِنِّي إِتّڭّنْ أَوَاڒْ، وَارْ إِدْجِي ذ إِنِّي إِتّسْڒَانْ وَاهَا، وَارْ شمْثمْ إِخفْ نْومْ! ^▪   ‏23 مِينْزِي مَاڒَا حذْ إِسْڒَا إِ وَاوَاڒْ، مَاشَا وَارْ زَّايسْ إِڭِّي، أَقَا نتَّا أَمشْنَاوْ إِجّْ ن ورْيَازْ إِ إِخزَّارنْ ذِي ثِيسِيثْ ذڭْ ؤُغمْپُوبْ نّسْ. ^▪   ‏24 أَقَا إِتّْوَاڒَا إِخفْ نّسْ، إِرُوحْ، ؤُشَا ڒخْذنِّي أَذْ إِتُّو مَامّشْ ثُوغَا إِدْجْ. ‏25 مَاشَا ونِّي إِ غَا إِخْزَارنْ ذِي شَّارِيعَا إِكمّْڒنْ ن ثْڒلِّي ؤُشَا إِقِّيمْ إِخزَّارْ ذَايسْ، وَارْ إِدْجِي أَمْ إِجّنْ إِتّسْڒَا ڒخْذنِّي إِثتُّو ذغْيَا، مَاشَا أَمْ إِجّنْ ونِّي ت إِتّڭّنْ س ثِيذتّْ، أَقَا وَانِيثَا أَذْ إِتّْوَابَاركْ ذِي مِينْ إِتّڭّْ. ^▪  

‏26 مَاڒَا ذِينْ ونِّي ؤُمِي إِتّْغِيڒْ أَقَا نتَّا إِتّْسخَّارْ إِ أَربِّي أَمْ وَارْ إِحطِّي إِڒسْ نّسْ، مَاشَا إِخدّعْ ؤُڒْ نّسْ، خنِّي أَقَا ثَاسخَّارْثْ نّسْ بَاطڒْ. ^▪   ‏27 مَاغَارْ ثَاسخَّارْثْ ثَامزْذَاڭْثْ ثَامْقدَّاسْثْ قِيبَاتْشْ إِ أَربِّي، ثَابَابَاثْ، أَقَا-ث ذ ثَا: أَذْ ثْصُونذْ إِيُوجِيڒنْ ذ ثِيجَّاڒْ ذِي ڒْمحْنثْ نْسنْثْ ؤُشَا أَذْ ثسّْحيّْذذْ إِخفْ نّكْ زِي دُّونشْثْ بْڒَا ڒْغشّْ.