ثِيوصَّا ثِينڭُّورَا ذ ؤُسدْجمْ
13
1 أجّْ أَذْ ثقِّيمْ ثَايْرِي ن ثوْمَاثْ جَارَاومْ. ▪ 2 وَارْ ثتُّومْ شَا أَذْ ثَارزْممْ ثَاوَّارْثْ إِ إِبَارَّانِييّنْ، مِينْزِي س ؤُيَا أَرحّْبنْ شَا س لْمَالَاكَاثْ أَمْ وَارْ سِّيننْ. ▪ 3 عقْڒمْ خْ إِمحْبَاسْ أَخْمِي كنِّيوْ حبّْسمْ أَكِيذْسنْ، ؤُ عقْڒمْ خْ ينِّي إِتّْوَاحْسَارنْ، أَمْ خْ إِوْذَانْ أَمشْنَاوْ كنِّيوْ سِيمَانْثْ نْومْ إِنِّي يَارْضنْ أَرِّيمثْ. ▪
4 أجّْ أَذْ يِيڒِي ڒمْڒَاشْ ذ أَوقَّارْ غَارْ مَارَّا، ذ قَامَا نْسنْ ن ڒمْڒَاشْ ذ أَمزْذَاڭْ، مِينْزِي أَربِّي أَذْ إِحْكمْ خْ أَيْثْ ن فَارْقْ-شّْغڒْ ؤُ خْ ينِّي إِتّڭّنْ زِّينَا.
5 وَارْ تّڭّمْ نّيّثْ نْومْ ذِي ثنْعَاشِينْ، مَاشَا قنْعمْ س مِينْ غَارْومْ، مِينْزِي سِيذِي إِنَّا:
”نشّْ وَارْ شكْ تّجِّيغْ نِيغْ أَذْ ذَايكْ سمّْحغْ.“ ▪
6 مَانْ أَيَا إِتّْوَانَّا إِ نشِّينْ، مَاحنْذْ أَذْ نِينِي س ثَارْيَاسْثْ:
”سِيذِي ذ أَمْعَاونْ إِنُو، وَارْ تّڭّْوْذغْ شَا،
مِينْ ذ أَيِي غَا يڭّْ بْنَاذمْ؟“ ▪
7 عقْڒمْ خْ إِمْڭوَّاذنْ نْومْ، إِنِّي ذ أَومْ إِسِّيوْڒنْ أَوَاڒْ ن أَربِّي. بقّْشمْ ڒْغِيدْجثْ ن ثشْرِي نْسنْ ؤُشَا ضْفَارمْ لْ-إِيمَانْ نْسنْ. ▪
8 يشُّو لْمَاسِيحْ ذ نتَّا نتَّا، إِضنَّاضْ ذ يِيضَا ؤُ إِ ڒبْذَا.
9 وَارْ ثجِّيمْ أَذْ كنِّيوْ غَارّنْ س ثْغُورِيوِينْ إِغْرِيبنْ ذ إِبذِّيڒنْ ن ذغْيَا، مِينْزِي ڒْحَاجّثْ ن لمْلِيحْ مَاڒَا ؤُڒْ إِشبَّارْ ذڭْ أَرْضَا، وَارْ إِدْجِي ذِي مَاشَّا إِ وَارْ إِنفّْعنْ شَا إِ ينِّي ثُوغَا ذَايسْ يڒْهَانْ.▪
10 غَارْنغْ إِجّْ ن ؤُعَالْطَارْ، إِنِّي ذِينِّي إِتّْسخَّارنْ ذِي ثْزذِّيغْثْ، إِتّْخصَّا وَارْ ثتّنْ.
11 مِينْزِي أَيْسُومْ ن إِمُودَّارنْ إِنِّي إِذَامّنْ نْسنْ تّْوَاكْسِينْ غَارْ زَّاوشْثْ إِقدّْسنْ س ؤُفُوسْ ن أَرَّايْسْ ن إِكهَّاننْ، تّْوَاسَارْغنْ بَارَّا إِ ثقْسفْثْ. ▫ ▪
12 س ؤُينِّي ثُوغَا يشُّو إِمَارّثْ عَاوذْ بَارَّا إِ ثنْذِينْثْ، حِيمَا أَذْ إِقدّسْ ڒْڭنْسْ س إِذَامّنْ نّسْ، ▪
13 س ؤُينِّي أجّْ أَنغْ أَذْ نفّغْ غَارْ بَارَّا ن ثقْسفْثْ ن إِقِيضَانْ، أَمْ نَاربُّو ڒْعَارْ نّسْ.
14 مِينْزِي وَارْ غَارْنغْ ذَا ثَانْذِينْثْ ن ڒبْذَا، مَاشَا نَارزُّو خْ ثنِّي إِ د غَا يَاسنْ. ▪
15 أجّْ أَنغْ أَذْ زَّايسْ نْقدّمْ ثِيوْهِيبِينْ ن ؤُسمْغَارْ إِ أَربِّي، ڒْغِيدْجثْ ن إِينْشِيشنْ نِّي إِشهّْذنْ س يِيسمْ نّسْ. ▪
16 وَارْ تّتُّومْ شَا أَذْ ثڭّمْ مِينْ إِصبْحنْ ؤُڒَا ذ ثشْرِيمثْ، مِينْزِي أَربِّي يَارْضَا خْ ثْموْشَا أَمْ ثِينَا. ▪
17 طَاعمْ إِ ينِّي إِ كنِّيوْ إِتّْڭوَّاذنْ، ڭّمْ أَسنْ أَرَّايْ، - مِينْزِي نِيثْنِي تّْعسَّانْ خْ ڒعْمُورْ نْومْ أَمشْنَاوْ إِنِّي إِتّڭّنْ ڒحْسَابْ خَاومْ -، حِيمَا أَذْ ت ڭّنْ س ڒفْرَاحثْ، وَارْ إِدْجِي س ؤُوحْوحْ، مِينْزِي مَانْ أَيَا وَارْ كنِّيوْ إِنفّعْ. ▪
18 ژَتدْجمْ خَانغْ مِينْزِي غَارْنيْ تِّيقّثْ بلِّي غَارْنغْ ثَانفْسشْثْ ثشْنَا، أَمْ ذَايْنغْ مژْرِي حِيمَا أَذْ ندَّارْ نِيشَانْ ذِي مَارَّا.
19 تّْزَاوْڭغْ كنِّيوْ س جّهْذْ أَذْ ثڭّمْ أَمُّو، حِيمَا خنِّي نشّْ ذغْيَا أَذْ غَارْومْ د-ذوْڒغْ.
20 أَربِّي ن ڒهْنَا ونِّي د-إِسّْنكَّارنْ أَمكْسَا أَمقّْرَانْ ن وُودْجِي، يشُّو لْمَاسِيحْ، سِيذِيثْنغْ، زِي ثَادَّارْثْ ن إِمتِّيننْ س إِذَامّنْ ن ڒْعَاهْذْ إِ ڒبْذَا، ▪ 21 أَذْ كنِّيوْ إِكمّڒْ ذِي كُوڒْ ڒْخذْمثْ إِشْنَانْ حِيمَا أَذْ ثڭّمْ مِينْ إِخْسْ نتَّا. نتَّا أَذْ ذَايْنغْ إِڭّْ مِينْ إِدْجَانْ إِ أَرْضَا نّسْ س يشُّو لْمَاسِيحْ وِي غَارْ إِدْجْ ؤُعُودْجِي إِ ڒبْذَا قَاعْ. أَمِينْ. ▪
22 خنِّي تّْزَاوْڭغْ زَّايْومْ، أَ أَيْثْمَا إِنُو، قبْڒمْ أَوَاڒْ-أَ ن ؤُسنْهَارْ س تَّاسِيعْ ن ڒْخَاضَارْ، مِينْزِي ؤُرِيغْ أَومْ-د س ذْرُوسْ.
23 سْنمْ أَقَا أَرْخُونْ ؤُمَاثْنغْ ثِيمُوثِييُو. مَاڒَا يُوسَا-د ذغْيَا، أَذْ كنِّيوْ ژَترغْ أَكِيذسْ.
24 سدْجْممْ خْ مَارَّا إِنِّي إِ كنِّيوْ إِتّْڭوَّاذنْ س ڒحْنَا ؤُ خْ مَارَّا إِمْقدَّاسنْ. إِنِّي ن إِطَالْيَا تّْسدْجَامنْ-د خَاومْ س ڒهْنَا.
25 أَرْضَا أَذْ كِيذْومْ يِيڒِي مَارَّا. أَمِينْ.