‏1 بُولُوسْ، أَمحْپُوسْ ن يشُّو لْمَاسِيحْ، ذ ثَاوْمَاثْ ثِيمُوثِييُو، إِ فِيلِيمُونْ إِعِيزّنْ ذ ؤُمْسخَّارْ أَكِيذْنغْ، ^▫  ▪   ‏2 ؤُ إِ ؤُتْشْمَاثْنغْ أَبْفِييَا إِعِيزّنْ، ؤُ إِ أَرْخِيبُّوسْ، أَشْرِيشْ أَكِيذْنغْ ذِي ڒْخذْمثْ، ؤُ إِ ثْمسْمُونْثْ ذِي ثَادَّارْثْ نّكْ: ^▪   ‏3 أَرْضَا ذ ڒهْنَا أَذْ كِيذْومْ إِڒِينْ زِي أَربِّي، بَابَاثْنغْ، ؤُ زِي سِيذِيثْنغْ يشُّو لْمَاسِيحْ.

‏4 نشّْ تّْقَاذِيغْ أَربِّي إِنُو ڒبْذَا ؤُ تّْفكَّارغْ ذَايكْ ذِي ثْژَادْجِيثِينْ إِنُو، ^▪   ‏5 - خْزَارْ، عَاذْ زڭْ وَامِي نشّْ سْڒِيغْ خْ لْ-إِيمَانْ ذ ثَايْرِي نّكْ إِ ذَايكْ إِدْجَانْ زِي جِّيهثْ ن سِيذِيثْنغْ يشُّو ؤُ زِي جِّيهثْ ن مَارَّا إِمْقدَّاسنْ - ، ‏6 حِيمَا أَذْ ذِينْ يِيڒِي إِجّْ ن ؤُقَارِّي ن لْ-إِيمَانْ نّكْ أَڒْ غَا ثَاوْيذْ ڒْغِيدْجثْ ذِي ڒخْذَايمْ ثِيصبْحَانِينْ ؤُ ذِي ثُوسّْنَا ن مَارَّا ڒْخَارْ إِ غَارْومْ ذِي يشُّو لْمَاسِيحْ. ‏7 مَاغَارْ نشِّينْ أَقَا غَارْنغْ ڒفْرَاحثْ ذ ؤُفوّجْ، مِينْزِي زِي سِّيبّثْ ن ثَايْرِي نّكْ تّْوَاسَاريّْحنْ ؤُڒَاونْ ن إِمْقدَّاسنْ.

‏8 س ؤُينِّي، وَاخَّا نشّْ غَارِي ثَارْيَاسْثْ أَطَّاسْ ذِي لْمَاسِيحْ حِيمَا أَذْ شكْ ؤُمُورغْ مِينْ إِشُووَّارنْ، ‏9 أَقَا نشّْ غَارِي حْسنْ، ذِي سِّيبّثْ ن ثَايْرِي، أَذْ زَّايكْ تَّارغْ، نشّْ بُولُوسْ، أَقَا أَيِي ذ أَوسَّارْ أَمْ مَامّشْ ثسّْنذْ، ؤُشَا ڒخُّو عَاوذْ ذ أَمحْپُوسْ ن يشُّو لْمَاسِيحْ.

‏10 نشّْ تَّارِيغْ أَشْ-د خْ مِّي ؤُنِيسِيمُوسْ، ونِّي د-جِّيغْ ذِي سْنَاسڒْ ذَا ذِي ڒحْبسْ. ^▪  

‏11 نتَّا ثُوغَا وَارْ شكْ إِنفّْعنْ زِيشْ، مَاشَا ڒخُّو أَقَا إِنفّعْ إِ شكْ ؤُ إِنفّعْ أَيِي.

‏12 نشّْ أَقَا أَرِّيغْ أَشْ ث-إِ-د غَاركْ. خنِّي قْبڒْ إِ-ث أَمْ مِّي.

‏13 نشّْ مْڒِي ؤُفِيغْ إِڒِي أَقَا جِّيغْ ث ذَانِيثَا أَكِيذِي مَاحنْذْ أَذْ خَافِي إِسخَّارْ ذڭْ ومْشَانْ نّكْ مِينْ ذَا غَا كّغْ ذِي سْنَاسڒْ خْ سِّيبّثْ ن ڒخْبَارْ أَصبْحَانْ.

‏14 مَاشَا نشّْ وَارْ خْسغْ شَا أَذْ ڭّغْ وَالُو بْڒَا مَا إِ غَا مْشَاوَارغْ أَكِيذكْ، حِيمَا ثْشُونِي إِ ثڭِّيذْ وَارْ ثتِّيڒِي س ؤُغِيڒْ، مَاشَا س ڒْخَاضَارْ.

‏15 مِينْزِي أَذْ ثَاغْ ثُوغَا إِمْسبْضَا خَاكْ إِ ذْرُوسْ ن ڒْوقْثْ حِيمَا أَذْ غَاركْ يِيڒِي عَاوذْ إِ ڒبْذَا،

‏16 وَارْ إِدْجِي عَاذْ أَمشْنَاوْ أَمْسخَّارْ، مَاشَا أَمشْنَاوْ إِجّنْ إِ إِدْجَانْ كْثَارْ زڭْ ؤُمْسخَّارْ، أَمْ ؤُمَا إِنُو إِعِيزّنْ، إِ نشّْ بعْذَا، مَاهُو إِ شكْ، ذِي أَرِّيمثْ ؤُڒَا ذِي سِيذِيثْنغْ!

‏17 مَاڒَا ثْحسْبذْ أَيِي ذ أَمْعَاشَارْ إِنُو ذِي لْ-إِيمَانْ، قبْڒْ إِ-ث أَمشْنَاوْ نشّْ.

‏18 مَاڒَا نتَّا ثُوغَا إِضَّارِّي شكْ نِيغْ زعْمَا ذَايسْ أَمَارْوَاسْ، أڭّْ إِ-ث خَافِي!

‏19 نشّْ، بُولُوسْ، ؤُرِيغْ س ؤُفُوسْ إِنُو، أَقَا أَذْ ث خدْجْصغْ! مَاحنْذْ وَارْ قَّارغْ شَا، أَقَا ؤُڒَا ذ شكْ ثتُّورْسذْ أَيِي إِخفْ نّكْ. ‏20 وَاهْ، أَ ثَاوْمَاثْ إِنُو، أَقَا تّْوَاسَّاريّْحغْ زَّايكْ ذِي سِيذِيثْنغْ، سَاريّحْ ؤُڒْ إِنُو ذِي لْمَاسِيحْ.

‏21 نشّْ تِّيقّغْ أَذْ أَيِي ثسْڒِيذْ. ؤُرِيغْ أَشْ-د، ؤُشَا سّْنغْ أَقَا شكْ أَذْ ثڭّذْ مَاهُو مِينْ ذ أَشْ إِنِيغْ. ‏22 سوْجذْ أَيِي أَمْشَانْ مَانِي غَا زذْغغْ، مِينْزِي سِّيثِيمغْ أَذْ غَارْومْ د-أَرزْفغْ س ثْژَادْجِيثْ نْومْ. ^▪  

‏23 إِبَافْرَاسْ، ونِّي أَكِيذِي ذَا ذِي ڒحْبسْ ذِي يشُّو لْمَاسِيحْ، أَقَا إِسدْجمْ خَاكْ س ڒهْنَا، ^▪   ‏24 ؤُڒَا ذ مَارْكُوسْ ذ أَرِيسْثَارْخُوسْ ذ ذِيمَاسْ ذ لُوكَا إِنِّي ذ أَيِي إِتِّيشّنْ أَفُوسْ. ^▪  

‏25 أَرْضَا ن سِيذِيثْنغْ يشُّو لْمَاسِيحْ أَذْ يِيڒِي أَكْ-ذ بُوحْبڒْ نْومْ. أَمِينْ!