‏1 س ؤُينِّي نشِّينْ عَاوذْ، ؤُمِي ذ أَنغْ د-نّْضنْ مَارَّا ڒشْهُوذْ-أَ أَمْ إِسيْنُوثنْ، أَذْ ننْضَارْ مَارَّا دّْقڒْ ن دّنْبْ إِ ذ أَنغْ د-إِسّْوجْذنْ إِ ڒبْذَا. أجّْ أَنغْ أَذْ نُويُورْ س ضّْبَارْ أَمْحِيزْوَارْ نِّي خْ أَنغْ د-إِمَّارْسنْ غَارْ زَّاثْ. ^▪   ‏2 أجّْ أَنغْ أَذْ ننْضَارْ ثِيطَّاوِينْ ذِي يشُّو، أَمْڭوَّاذْ ذ ؤُمْكمّڒْ ن لْ-إِيمَانْ نّغْ، ونِّي، زِي سِّيبّثْ ن ڒفْرَاحثْ إِ غَارسْ، يَارْپُو صَّالِيبْ، وَارْ ث إِشْقِي ؤُبهْذڒْ، ؤُشَا إِقِّيمْ خْ يفُّوسْ ن ڒْعَارْشْ ن أَربِّي. ^▫  ▪   ‏3 خْزَارمْ مْلِيحْ، مشْحَاڒْ إِ إِكْسِي نتَّا زڭْ إِمذْنَابْ، إِنِّي ذ إِغْرِيمنْ ن ڒعْمُورْ ن يِيخفْ نْسنْ، حِيمَا وَارْ ثتِّيحْڒمْ ؤُ وَارْ ثَارخُّومْ شَا ذِي ڒعْمَارْ نْومْ.

‏4 أَقَا كنِّيوْ، وَارْ ثْرُوحمْ شَا ثِيڭّْوجمْ أَكْ-ذ دّنْبْ، وَارْ ثمّْعَاڒِيمْ شَا أَڒْ ؤُسِيزّڒْ ن إِذَامّنْ نْومْ، ^▪   ‏5 ثتُّومْ ثَاغُورِي إِ خَاومْ إِسَّاوَاڒنْ أَمْ إِحنْجِيرنْ:

”مِّي إِنُو، وَارْ تّڭّْ شَا س وعْرُورْ خْ تَّارْبِييّثْ ن سِيذِي،

وَارْ تِّيڒِي شَا ذ أَمَارْخُو ذِي ڒعْمَارْ نّكْ،

خْمِي إِ غَا ثتّْوَاوبّْخذْ زَّايسْ. ^▪  

‏6 مِينْزِي ونِّي إِتّخْسْ سِيذِي،

يَاربَّا ث س ؤُقسَّاحْ،

ؤُشَا إِحنْجِيرنْ نّسْ إِ خَاسْ إِعِيزّنْ،

إِكْسِي ثنْ كُوڒْ إِجّْ زَّايْسنْ غَارْ ؤُغزْذِيسْ.“ ^▪  

‏7 مَاڒَا ثكْسِيمْ تَّارْبِييّثْ، أَربِّي إِتّڭّْ أَومْ أَمْ إِحنْجِيرنْ نّسْ. مِينْزِي مَانْ مِّيسْ ونِّي بَابَاسْ وَارْ ث يَاربِّي شَا س ؤُقسَّاحْ؟ ‏8 مَاشَا مَاڒَا أَقَا كنِّيوْ بْڒَا تَّارْبِييّثْ إِ ذِي شَّارْشنْ مَارَّا، ڒخْذنِّي كنِّيوْ ذ ثَارْوَا ن فَارْقْ-شّْغڒْ، وَارْ إِدْجِي ذ أَرَّاوْ. ‏9 مَاڒَا نكْسِي تَّارْبِييّثْ زِي بَابَاثْنغْ عْلَاحْسَابْ أَرِّيمثْ ؤُشَا نْوقَّارْ إِ-ثنْ، مشْحَاڒْ ذ أَنغْ إِتّْخصَّانْ أَذْ نْطَاعْ إِ بَابَاثْنغْ عْلَاحْسَابْ أَرُّوحْ ؤُشَا أَذْ ندَّارْ!

‏10 مِينْزِي نِيثْنِي وبّْخنْ أَنغْ شَا ن وُوسَّانْ عْذُونْ أَمْ مَامّشْ ذ أَسنْ إِتّْغِيڒْ مْلِيحْ، مَاشَا أَربِّي إِڭَّا إِ-ت إِ ثِيزِي نّغْ، حِيمَا أَذْ نْشَارْشْ ذِي ثْقدَّاسْثْ نّسْ.

‏11 أَقَا وَارْ ذِينْ ؤُڒَا ذ إِشْثْ ن تَّارْبِييّثْ س ؤُقسَّاحْ إِتّْبَاننْ ذ ڒفْرَاحثْ مَاشَا ذ ڒحْرِيقْ، مَاشَا أَوَارْنِي أَسْ ثِيوِي-د ڒْغِيدْجثْ ن ڒهْنَا ذ ثْسڭْذَا إِ ينِّي زَّايسْ إِتّْوَاذَارّْبنْ.

‏12 س ؤُينِّي سْڭعّْذمْ خنِّي إِفَاسّنْ يَارْخُونْ ذ إِفَادّنْ يَارهْفنْ، ^▪  

‏13 ؤُشَا ڭّمْ نِيشَانْ إِصُورَافْ ن إِضَارنْ نْومْ حِيمَا مِينْ إِدْجَانْ ذ أَنعْضَابْ وَارْ إِتّفْرِيغْ شَا، مَاشَا أَذْ إِڭّنْفَا.

‏14 ضْفَارمْ-د ڒهْنَا أَكْ-ذ مَارَّا ذ ثُوقدّْسِي، ثنِّي بْڒَا زَّايسْ وَارْ إِژَارْ حذْ سِيذِيثْنغْ. ^▪  

‏15 غَارْومْ أَقَا ؤُڒَا ذ إِجّْ جَارْ أَومْ أَذْ إِتّْوَافْ إِنْقسْ أَسْ أَرْضَا ن أَربِّي، نِيغْ أَقَا أَذْ إِغْمِي وژْوَارْ ن ثَارْزُوڭِي، أَذْ كنِّيوْ إِضَارّْ ؤُشَا خنِّي أَذْ زَّايسْ تّْوَاخمْجنْ أَطَّاسْ، ^▪  

‏16 نِيغْ وَارْ إِتّْوِيفّْ حذْ جَارَاومْ ونِّي ذ بُو-فَارْقْ-شّْغڒْ نِيغْ ذ أَمقْجُوحْ أَمشْنَاوْ عِيسُو، ونِّي إِزّنْزنْ ڒْحقّْ ن ؤُمنْزُو نّسْ خْ إِجّْ ن مَاشَّا. ^▪  

‏17 مِينْزِي أَقَا ثسّْنمْ، بلِّي أَوَارْنِي مَانْ أَيَا ثُوغَا يَارزُّو عَاذْ أَذْ إِوَارْثْ لْبَارَاكَا، مَاشَا يُوڭِي أَسْ، مَاغَارْ وَارْ يُوفِي شَا تَّاسِيعْ إِ وعْذَاڒْ، وَاخَّا يَارزُّو ث س إِمطَّاونْ. ^▪  

‏18 مِينْزِي كنِّيوْ وَارْ ثِيوِيضمْ شَا غَارْ وذْرَارْ ونِّي نْزمَّارْ أَذْ نْحَاذَا ؤُ غَارْ ثْمسِّي يَارْغِينْ ذ ثْبَارْشَانْثْ ذ ثَادْجسْثْ ذ ثْحَارْيَاضْثْ، ^▪  

‏19 نِيغْ غَارْ زّْهِيرْ ن ڒْپُوقْ ذ ڒْحسّْ ن وَاوَاڒنْ ذِي سِّيبّثْ نّسْ إِنِّي ذ أَسْ إِسْڒِينْ زَاوْڭنْ مَاحنْذْ وَارْ كِيذْسنْ سِّيوِيڒنْ عَاذْ. ^▪   ‏20 س مِينْزِي وَارْ زمَّارنْ خْ دّْقڒْ ن ثْوصَّا: ”وَاخَّا مَاڒَا غَارْ إِحَاذَا ؤُمُودَّارْ أَذْرَارْ، أَذْ إِتّْوَارْجمْ نتَّا.“ ^▫  ▪   ‏21 ڒَامِي ت ژْرِينْ، ثُوذفْ إِ-ثنْ ثِيڭّْوُوذِي، أَڒَامِي مُوسَا إِنَّا: ”أَقَا ڭّْوذغْ ؤُ أَرْجِيجغْ!“ ^▪  

‏22 مَاشَا كنِّيوْ ثِيوْضمْ غَارْ وذْرَارْ ن صِيهْيُونْ، غَارْ ثنْذِينْثْ ن أَربِّي إِدَّارنْ، ؤُرْشَالِيمْ ن ؤُجنَّا ؤُ غَارْ عشْرَا ن ڒُوڒُوفَاثْ ن لْمَالَاكَاثْ، ^▪   ‏23 غَارْ ثْمسْمُونْثْ ن إِمنْزَا، إِنِّي إِتّْوَازمّمنْ ذڭْ إِجنْوَانْ، ؤُ غَارْ أَربِّي، ڒْقَاضِي خْ مَارَّا ؤُ غَارْ أَرُّوحَاثْ ن إِمْسڭَّاذنْ نِّي إِوْضنْ غَارْ ڒكْمَارثْ، ^▪   ‏24 ؤُ غَارْ يشُّو، أَمْسصْڒَاحْ ن ڒْعَاهْذْ ن جْذِيذْ ؤُ غَارْ إِذَامّنْ ن ؤُرُوشِّي، إِنِّي إِسَّاوَاڒنْ حْسنْ زڭْ إِنِّي ن هَابِيلْ. ^▪  

‏25 غَارْومْ وَارْ ثَاڭِيمْ شَا ونِّي إِسَّاوَاڒنْ، مِينْزِي مَاڒَا إِنِّي وَارْ إِتّْوَاسْنجْمنْ ڒَامِي ؤُڭِينْ ونِّي إِسَّاوَاڒنْ ذِي ثمُّورْثْ، مَاهُو عَاذْ نشِّينْ، مَاڒَا نْحيّذْ زڭْ ونِّي إِدْجَانْ زڭْ إِجنْوَانْ، ^▪   ‏26 ونِّي ثْمِيجَّا نّسْ ثُوغَا ثسّنْهزَّا ثَامُّورْثْ، مَاشَا ڒخُّو أَقَا إِوَاعْذْ نتَّا، إِقَّارْ:

”عَاذْ إِشْثْ ن ثْوَاڒَا عَاوذْ أَذْ سّنْهزّغْ

مَاشِي ثَامُّورْثْ وَاهَا، أَقَا ؤُڒَا ذ أَجنَّا.“ ^▪  

‏27 أَوَاڒْ-أَ: ’إِشْثْ ن ثْوَاڒَا!‘، أَقَا إِمْڒَا بلِّي أَذْ إِتّْوَاكّسْ مِينْ إِتّنْهزَّانْ مِينْزِي مَانْ أَيَا إِتّْوَاڭّْ، حِيمَا أَذْ قِّيمنْثْ ثْمسْڒَايِينْ وَارْ تّنْهزِّينْثْ.

‏28 س ؤُينِّي أَمْ نطّفْ ثَاڭلْذِيثْ وَارْ إِتّنْهزِّينْ، أَذْ نطّفْ ذِي أَرْضَا إِ زِي نتّْسخَّارْ ؤُ نسَّارْضَا أَربِّي س ؤُوقَّارْ ذ ثِيڭّْوُوذِي. ^▪   ‏29 مِينْزِي أَربِّي نّغْ ذ ثِيمسِّي إِتّتّنْ. ^▪