‏1 لْمُوفِيذْ زِي مَارَّا مَانْ أَيَا، أَقَا غَارْنغْ أَرَّايْسْ ن إِكهَّاننْ، ونِّي إِقِّيمنْ غَارْ يفُّوسْ ن ڒْعَارْشْ ن لْعَاضِيمْ ذڭْ إِجنْوَانْ. ^▪   ‏2 نتَّا ذ أَمْسخَّارْ ن زَّاوشْثْ إِقدّْسنْ ؤُ ن ثْزذِّيغْثْ إِقدّْسنْ ذ ثِيذتّْ نِّي إِسّْڭعّذْ أَربِّي، وَارْ إِدْجِي ذ بْنَاذمْ.

‏3 مِينْزِي كُوڒْ أَرَّايْسْ ن إِكهَّاننْ إِتّْوَاسْڭعّذْ حِيمَا أَذْ إِوْشْ ثِيوْهِيبِينْ ذ ثْغَارْصِينْ. س ؤُينِّي ثُوغَا إِتّْخصَّا أَسْ إِ وَانِيثَا عَاوذْ أَذْ غَارسْ يِيڒِي شَا حِيمَا أَذْ ث إِوْشْ. ^▪   ‏4 مَاعْلِيكْ إِدْجْ ذِي ثمُّورْثْ، نتَّا وَارْ إِتِّيڒِي ذ أَكهَّانْ، مِينْزِي أَقَا ذِينْ إِكهَّاننْ عَاذْ إِنِّي إِتّْقدَّامنْ ثِيوْهِيبِينْ عْلَاحْسَابْ شَّارِيعَا. ‏5 نِيثْنِي سخَّارنْ إِ ؤُمذْيَا ذ ثِيڒِي ن مِينْ إِدْجَانْ ذڭْ ؤُجنَّا، أَمشْنَاوْ مَامّشْ إِتّْوَانَّا إِ مُوسَا ؤُمِي ثُوغَا إِڒْهَا أَكْ-ذ ؤُقِيضُونْ إِقدّْسنْ: ”حْضَاثْ، أَذْ ثڭّذْ مَارَّا أَمشْنَاوْ لْمَاثَالْ ونِّي ذ أَشْ سّشْنغْ خْ وذْرَارْ.“ ^▪  

‏6 مَاشَا ڒخُّو يشُّو لْمَاسِيحْ إِكْسِي ثَاسخَّارْثْ ثشْنَا، مِينْزِي ڒْعَاهْذْ إِ زِي إِذْوڒْ نتَّا ذ أَمْسصْڒَاحْ، أَقَا حْسنْ قَاعْ ؤُشَا إِمّوْشْ س لْوُوعُوذْ إِشْنَانْ. ^▪   ‏7 مِينْزِي مَاڒَا ثُوغَا ڒْعَاهْذْ أَمزْوَارُو بْڒَا ڒْعِيبْ، وَارْ إِتِّيڒِي عَاذْ ومْشَانْ إِ ونِّي ذ وِيسّْ ثْنَاينْ. ‏8 مَاغَارْ نتَّا يُوفَا ذَايْسنْ ڒْعِيبْ، خنِّي إِنَّا:

”خْزَارْ، أَذْ د-أَسنْ وُوسَّانْ، إِنَّا سِيذِي،

خْمِي إِ غَا ڭّغْ إِجّْ ن ڒْعَاهْذْ ن جْذِيذْ ذِي ڒكْمَارثْ،

خْ ڒَادْجْ ن ثَادَّارْثْ ن إِسْرَائِيل

ؤُ خْ ڒَادْجْ ن ثَادَّارْثْ ن يَاهُوذَا،^▪  

‏9 وَارْ إِدْجِي أَمشْنَاوْ ڒْعَاهْذْ نِّي وْشِيغْ إِ ڒجْذُوذْ نْسنْ،

ذڭْ وَاسّْ مِينْ ذِي ثنْ طّْفغْ زڭْ ؤُفُوسْ،

ڭوّْذغْ ثنْ زِي ثمُّورْثْ ن مِيصْرَا.

مِينْزِي نِيثْنِي وَارْ قِّيمنْ شَا خْ ڒْعَاهْذْ إِنُو،

نْضَارغْ ثنْ، إِقَّارْ سِيذِي.

‏10 مِينْزِي ذ وَا ذ ڒْعَاهْذْ إِ غَا وْشغْ إِ ڒَادْجْ ن ثَادَّارْثْ ن إِسْرَائِيل:

’أَوَارْنِي إِ وُوسَّانْ نِّي، إِنَّا سِيذِي،

أَذْ ڭّغْ إِزرْفَانْ إِنُو ذِي ڒعْقڒْ نْسنْ

ؤُشَا أَذْ ثنْ أَرِيغْ ذڭْ وُوڒَاونْ نْسنْ،

ؤُشَا نشّْ أَذْ أَسنْ إِڒِيغْ ذ أَربِّي،

نِيثْنِي أَذْ أَيِي إِڒِينْ ذ ڒْڭنْسْ.

‏11 ؤُڒَا ذ إِجّنْ أَذْ إِسّڒْمذْ مِّيسْ ن ثمُّورْثْ نِيغْ ؤُمَاسْ،

أَذْ يِينِي: سّنْ سِيذِي!،

مِينْزِي مَارَّا أَذْ أَيِي سّْننْ،

زڭْ ؤُمژْيَانْ نْسنْ أَڒْ إِمقّْرَاننْ نْسنْ. ^▪  

‏12 مِينْزِي نشّْ أَذْ ثنْ سِّيزْذڭغْ زِي ڒْمُوعْصِييّثْ نْسنْ،

ؤُشَا دّْنُوبْ نْسنْ وَارْ ذَايْسنْ تّْفكَّارغْ عَاذْ.‘ “ ^▪  

‏13 ڒَامِي إِنَّا: ’جْذِيذْ!‘، أَقَا إِڭَّا ڒْعَاهْذْ أَمزْوَارُو ذ أَقْذِيمْ، ؤُشَا مِينْ يَارْشَانْ ؤُ إِدُّويْسَارْ، أَقَا إِڭُّورْ أَذْ إِفْنَا.