‏1 وَارْ ثِيڒِيذْ ثوْعَارذْ إِ ؤُوسَّارْ، مَاشَا نسْحْ إِ-ث أَمْ إِجّْ ن ثْبَابَاثْ ؤُشَا إِبْڒِيغنْ أَمْ وَاوْمَاثنْ، ^▪   ‏2 ؤُ ثِيوسُّورَا أَمشْنَاوْ خْ ثْيمَّاثِينْ ؤُشَا ثِيعزْرِييِّينْ أَمشْنَاوْ خْ ثْوتْشْمَاثِينْ س مَارَّا ڒصْفَايثْ.

‏3 وقَّارْ ثِيجَّاڒْ، ثِينِّي ذ ثِيذتّْ دْجَانْثْ ذ ثِيجَّاڒْ. ‏4 ؤُشَا مَاڒَا شَا ن ثَاجَّاتْشْ غَارسْ إِحنْجِيرنْ نِيغْ أَيَّاونْ، أجّْ إِ-ثنْ أَذْ ڒمْذنْ ذ أَمزْوَارْ مَاحنْذْ أَذْ ڭّنْ مِينْ إِتّْڒِيقنْ ذِي طّْوعْ ن ڒَادْجْ نْسنْ، أَذْ د-أَرّنْ إِ لْوَالِيذِينْ مِينْ تُّورْسنْ، مِينْزِي دّڭَّا يُوسَا-د خْ ڒْخَاضَارْ ن أَربِّي. ^▪   ‏5 مَاشَا ثَاجَّاتْشْ نِيشَانْ ذ ثنِّي إِدْجَانْ وحّْذسْ، ثسِّيثِيمْ إِ أَربِّي ؤُشَا ثْصبَّارْ ذِي ثُوثْرَا ذ ثْژَادْجِيثِينْ، دْجِيڒثْ ذ وَاسّْ. ^▪   ‏6 مَاشَا ثنِّي إِوْضَانْ ذِي ثُوذَارْثْ ن نّشْوثْ، أَقَا ثمُّوثْ وَاخَّا ثدَّارْ. ‏7 ؤُمُورْ ثِيمسْڒَايِينْ-أَ، حِيمَا أَذْ إِڒِينْثْ بْڒَا ڒْعِيبْ. ‏8 مِينْزِي مَاڒَا شَا ن يِيجّْ وَارْ إِتّْهِيلِّي شَا ذِي وِي إِدْجَانْ نّسْ، ذ أَمزْوَارُو إِ إِنِّي يُومْننْ ن أَيْثْبَابْ ن ثَادَّارْثْ، أَقَا وَانِيثَا إِمّنْضَارْ لْ-إِيمَانْ ؤُشَا نتَّا مَاهُو خْ ينِّي وَارْ يُومِيننْ شَا. ^▪  

‏9 إِخْضَارْ خنِّي إِشْثْ ن ثَاجَّاتْشْ، ثنِّي وَارْ ثِيوِيضْ ستِّينْ ن إِسڭّْوُوسَا، ثنِّي ثُوغَا ذ ثَامْغَارْثْ ن إِجّْ ن ورْيَازْ،

‏10 ثنِّي غَارْ إِدْجْ شّْهَاذثْ أَقَا ثڭَّا ڒخْذَايمْ ثِيصبْحَانِينْ: نِيغْ ثسّيْمِي ثَارْوَا نّسْ، نِيغْ ثَارحّبْ س إِبَارَّانِييّنْ، نِيغْ ثسِّيرذْ إِضَارنْ ن إِمْقدَّاسنْ، نِيغْ ثوْشَا فُوسْ إِ ينِّي إِتّْوَاحْصَارنْ، نِيغْ أَقَا ثڭَّا مَارَّا ڒْخذْمثْ ثَاصبْحَانْثْ. ^▪  

‏11 مَاشَا وَارْ قبّڒْ ثِيجَّاڒْ ثِيمژْيَانِينْ، مِينْزِي نِيثنْثِي إِڭّْوجنْثْ خْ لْمَاسِيحْ، أَرزُّونْثْ خْ إِجّْ ن ورْيَازْ.

‏12 أَقَا شّْرعْ نْسنْثْ إِمْثنْ مِينْزِي سَّارْسنْثْ لْ-إِيمَانْ نْسنْثْ أَمزْوَارْ غَارْ ؤُغزْذِيسْ.

‏13 مَاغَارْ نِيثنْثِي سّْڒمْذنْثْ إِنّغْنِي ڒعْقزْ، أَمْ ڭُّورنْثْ خْ ثُوذْرِينْ، ؤُ وَارْ إِدْجِي سّْڒمْذنْثْ وَاهَا ڒعْقزْ، مَاشَا نِيثنْثِي تّْعَاوَاذنْثْ ڒخْپُورَاثْ، تَّاذْفنْثْ ذِي شْغُوڒَاثْ ن مِيدّنْ، قَّارنْثْ مِينْ وَارْ إِشُووَّارنْ. ^▪  

‏14 س ؤُينِّي خْسغْ أَذْ مڒْشنْثْ ثِيجَّاڒْ ثِيمژْيَانِينْ، أَذْ د-جّنْثْ إِحنْجِيرنْ، أَذْ سُّويُورنْثْ ثَادَّارْثْ، وَارْ تّجِّينْثْ شَا إِ ڒعْذُو سِّيبّثْ حِيمَا أَذْ ذَايْسنْثْ إِشقّفْ. ^▪  

‏15 مِينْزِي أَقَا شَا زَّايْسنْثْ بْذَانْثْ أَذْ فّْغنْثْ أَبْرِيذْ، ضفَّارنْثْ شِّيطَانْ.

‏16 مَاڒَا ذِينْ ثِيمْغَارِينْ يُومْننْ ثِيجَّاڒْ غَارْ يرْيَازنْ يُومْننْ، أجّْ إِ-ثنْ أَذْ زَّايْسنْثْ كُوننْ مَاحنْذْ وَارْ إِتِّيڒِي دّْقڒْ عَاذْ خْ ثْمسْمُونْثْ، حِيمَا ثَامسْمُونْثْ أَذْ غَارسْ يِيڒِي مَاهنْذْ أَذْ ثْعَاونْ ثِينِّي إِدْجَانْ ذ ثِيجَّاڒْ نِيشَانْ.

‏17 إِمْغَارنْ نِّي إِتّْضبَّارَانْ مْلِيحْ، سْذَاهْدْجنْ أَوقَّارْ ثْنَاينْ ن إِمُورنْ، أَبعْذَا إِنِّي إِخدّْمنْ ذڭْ وَاوَاڒْ ؤُ ذڭْ ؤُسڒْمذْ. ^▪  

‏18 مِينْزِي ثِيرَا إِقدّْسنْ قَّارنْ: ”وَارْ تّڭّْ ثَاشْمَانْثْ إِ ؤُينْذُوزْ إِسَّارْوَاثنْ!“، ؤُ: ”أَخدَّامْ إِسْذَاهدْجْ ڒْمُونثْ نّسْ!“ ^▪  

‏19 وَارْ قبّڒْ شَا ثَانْفُوتْشْ ضِيدّْ إِ ؤُمْغَارْ مْغِيرْ خْ ؤُقمُّومْ ن ثْنَاينْ نِيغْ ن ثْڒَاثَا ن ڒشْهُوذْ. ^▪   ‏20 إِنِّي إِخْضَانْ، عيّبْ إِ-ثنْ زَّاثْ إِ مَارَّا، حِيمَا إِنّغْنِي أَذْ ڭّْوذنْ عَاوذْ. ‏21 زِييَّارغْ خَاكْ زَّاثْ إِ أَربِّي ذ سِيذِيثْنغْ يشُّو لْمَاسِيحْ ذ لْمَالَاكَاثْ نّسْ إِتّْوَافَارْزنْ، أَذْ ثحْضِيذْ مَانْ أَيَا بْڒَا ڒْفَارْزْ، وَارْ ثڭّْ ؤُڒَا ذ إِشْثْ ن ثْمسْڒَاشْثْ عْلَاحْسَابْ إِغمْبَابْ. ^▪   ‏22 وَارْ سّْرُوسَا إِفَاسّنْ نّكْ خْ حذْ س ؤُقدْجقْ، وَارْ شَارّشْ ذِي دّْنُوبْ ن إِنّغْنِي، حْضَا إِخفْ نكّْ ذِي ڒصْفَايثْ. ^▪  

‏23 وَارْ سسّْ أَمَانْ وَاهَا، مَاشَا سُو ذْرُوسْ ن بِينُو إِ سْثُومَاغُو نّكْ ؤُ إِ ڒحْڒَاشْ نّكْ أَزِيرَارْ. ^▪  

‏24 أَقَا ذِينْ شَا ن إِوْذَانْ دّْنُوبْ نْسنْ بَاننْ مْلِيحْ ذغْيَا، أَقَا دّْنُوبْ نْسنْ تِّيزَّارنْ أَسنْ غَارْ شّْرعْ، ؤُشَا أَقَا ذِينْ شَا نّغْنِي ضفَّارنْ ثنْ دّْنُوبْ نْسنْ. ^▪   ‏25 أَمُّو د-بَاننْثْ ؤُڒَا ذ ڒخْذَايمْ ثِيصبْحَانِينْ، مَاشَا مَاڒَا وَارْ إِدْجِي أَمُّو، وَارْ زمَّارنْثْ نِيثنْثِي أَذْ قِّيمنْثْ نُّوفَّارنْثْ.