‏1 مَاشَا أَرُّوحْ إِقَّارْ نِيشَانْ بلِّي ذڭْ إِكُوذنْ إِنڭُّورَا، شَا أَذْ حيّْذنْ خْ لْ-إِيمَانْ ؤُمِي غَا ضْفَارنْ ڒَارْيَاحْ إِسّْغكّْوَانْ ذ ثْغُورِي ن شّْوَاطنْ. ^▪   ‏2 نِيثْنِي سْغكّْوَانْ أَمْ سّْنِيعْمِيڒنْ إِخفْ نْسنْ، سّْخَارِّيقنْ ؤُ تّقّْذنْ ثَانفْسشْثْ نْسنْ. ‏3 نِيثْنِي أَذْ طّْفنْ ڒمْڒَاشْ ؤُشَا أَذْ ؤُمُورنْ أَسْبعّذْ خْ مَاشَّا ثنِّي د-إِتّْوَاڭّنْ زِي أَربِّي مَاحنْذْ أَذْ ثتّْوَاشّْ س ؤُقَاذِي، إِ ينِّي إِتَّامْننْ ؤُ سّْننْ ثِيذتّْ. ^▪   ‏4 مِينْزِي مَارَّا مِينْ د-إِتّْوَاخڒْقنْ زِي أَربِّي إِصْبحْ ؤُشَا وَارْ ذَايسْ مِينْ غَا نَاڭِي مَاڒَا نقْبڒْ زَّايسْ س ؤُقَاذِي، ^▪   ‏5 مِينْزِي أَذْ إِتّْوَاقدّسْ س وَاوَاڒْ ن أَربِّي ذ ثْژَادْجِيثْ.

‏6 مَاڒَا ثسّْڒمْذذْ مَانْ أَيَا إِ وَاوْمَاثنْ نّكْ، أَذْ ثِيڒِيذْ شكْ ذ أَمْسخَّارْ ن يشُّو لْمَاسِيحْ، أَمْ مَامّشْ ثتّْوَاربِّيذْ ذڭْ وَاوَاڒنْ ن لْ-إِيمَانْ ذ ثْغُورِي ن صَّاحْ، ثنِّي ذِي ثتّْوَاسّْڒمْذذْ. ^▪   ‏7 مَاشَا أَڭّْوجْ خْ ثْحُوجَا إِخْوَانْ ن ثْوسُّورَا، مَاشَا مَارّسْ إِخفْ نّكْ ذِي ثْسڭْذَا. ^▪   ‏8 مِينْزِي أَرِّييَاضَا ن أَرِّيمثْ ثتَّاوِي غَارْ نّْفَاعْ إِ ذْرُوسْ ن ڒْوقْثْ وَاهَا، مَاشَا ثَاسڭْذَا ثْنفّعْ ڒبْذَا، ؤُشَا أَقَا غَارسْ لْوَاعْذْ ن ثُوذَارْثْ إِ يِيضَا ؤُ إِ ثنِّي إِ د غَا يَاسنْ. ^▪  

‏9 وَا ذ أَوَاڒْ ذَايسْ ڒَامَانْ، إِسْذَاهدْجْ أَذْ إِتّْوَاقْبڒْ.

‏10 مِينْزِي إِ مَانْ أَيَا ؤُمِي نْخدّمْ ؤُ نتّْوَاسحْقَارَا عَاوذْ، مِينْزِي أَسِيثمْ نّغْ أَقَا-ث ذِي أَربِّي إِدَّارنْ، ونِّي إِدْجَانْ ذ ڒْعُونْصَارْ ن ثُوذَارْثْ ن مَارَّا إِوْذَانْ، أَمزْوَارُو ن يِينِّي إِتَّامْننْ.

‏11 سڒْمذْ ؤُشَا ؤُمُورْ س مَانْ أَيَا.

‏12 ؤُڒَا ذ إِجّْ وَارْ شكْ إِسّحْقِيرِي شَا خْ ثمْژِي نّكْ، مَاشَا إِڒِي ذ لْمَاثَالْ إِ ڒْمُومنِينْ س وَاوَاڒْ، س ونْذَاهْ، س ثَايْرِي، س لْ-إِيمَانْ ؤُ س ثَازْذُوڭِي. ^▪  

‏13 إِڒِي ثشْضَارذْ ذِي ثْغُورِي إِ ثْمسْمُونْثْ، ذِي طْژَادْجِيثْ ؤُ ذڭْ ؤُسڒْمذْ أَڒْ د غَا يَاسغْ.

‏14 وَارْ سْحقَّارَا شَا ثَاموْشِي إِ ذَايكْ، ثنِّي إِ ذ أَشْ إِمّوْشنْ ؤُمِي ثُوغَا تّْنَابّنْ ؤُ سَّارْسنْ إِمْغَارنْ خَاكْ إِفَاسّنْ. ^▪  

‏15 عْقڒْ خْ ثْمسْڒَايِينْ-أَ، شبَّارْ ذَايْسنْثْ، حِيمَا ثِيشْڒِي نّكْ غَارْ زَّاثْ أَذْ ثْبَانْ إِ مَارَّا.

‏16 حْضَا إِخفْ نّكْ ؤُ حْضَا خْ ؤُسڒْمذْ، صْبَارْ ذِي مَانْ أَيَا، مِينْزِي مَاڒَا ثڭِّيذْ دّڭَّا، أَذْ ثسّْنجْمذْ إِخفْ نّكْ ذ إِنِّي ذ أَشْ إِتّسْڒَانْ.