2 إِثِيسَّالُونِيكِييّنْ
أَسدْجمْ غَارْ ؤُمزْوَارُو
1
1 بُولُوسْ ذ سِيلْوَانُوسْ ذ ثِيمُوثِييُو، إِ ثْمسْمُونْثْ ن إِثِيسَّالُونِيكِييّنْ، ثنِّي إِدْجَانْ ذِي أَربِّي، بَابَاثْنغْ، ؤُ ذِي سِيذِيثْنغْ يشُّو لْمَاسِيحْ. 2 أَرْضَا ذ ڒهْنَا زِي أَربِّي، بَابَاثْنغْ، ؤُ زِي سِيذِيثْنغْ يشُّو لْمَاسِيحْ أَذْ كِيومْ إِڒِينْ. ▪ أَقَاذِي ذ ثْژَادْجِيثْ ن بُولُوسْ
3 إِشُووَّارْ أَذْ نْقَاذَا أَربِّي إِ كنِّيوْ ڒبْذَا، أَ أَيْثْمَا، أَمْ مَامّشْ إِتّْڒِيقْ، مِينْزِي لْ-إِيمَانْ نْومْ إِمقَّارْ أَطَّاسْ ؤُشَا ثَايْرِي ن كُوڒْ إِجّنْ زَّايْومْ مَارَّا إِ ونّغْنِي ثَارنِّي ثْمقَّارْ كْثَارْ، ▪ 4 أَڒْ إِ غَا نتّْفيّشْ خَاومْ أَطَّاسْ ذِي ثْمسْمُونِينْ ن أَربِّي خْ سِّيبّثْ ن ضّْبَارْ نْومْ ذ لْ-إِيمَانْ نْومْ ذِي مَارَّا أَذَارّشْ نْومْ ؤُ ذِي ڒمْحَايمْ نِّي ثكْسِيمْ. ▪ 5 مَانْ أَيَا ذ لْپُورْهَانْ ن ڒْحُوكْمْ إِسّڭّْذنْ ن أَربِّي، أَقَا ثتّْوَاحَاسْبمْ ثسْذَاهدْجمْ ثَاڭلْذِيثْ ثنِّي إِ خفْ ثكْسِيمْ أَمَارّثْ. ▫ ▪ 6 ؤُ مِينْزِي ذ ڒْحقّْ زَّاثْ إِ أَربِّي ؤُمِي غَا إِخدْجصْ س ڒحْصَارثْ إِ ينِّي كنِّيوْ إِحصَّارنْ، ▪ 7 خنِّي أَذْ أَومْ إِسّدَّارْ، كنِّيوْ إِنِّي إِتّْوَاحْصَارنْ أَكِيذْنغْ، غَارْ ؤُسَارْڭبْ ن سِيذِيثْنغْ يشُّو زڭْ ؤُجنَّا أَكْ-ذ لْمَالَاكَاثْ نّسْ، ▪ 8 خْ مِينِّي إِ غَا إِنْثَاقمْ ذِي ثْمسِّي إِتّحْذُوذُوقنْ خْ ينِّي وَارْ إِسِّيننْ شَا أَربِّي ؤُ خْ ينِّي وَارْ إِسْڒِينْ إِ ڒخْبَارْ أَصبْحَانْ ن سِيذِيثْنغْ يشُّو لْمَاسِيحْ. ▪ 9 مِينْزِي إِنَا أَذْ تّْوَاعَاقْبنْ ذِي ڒْحُوكْمْ س ؤُهلّكْ إِ ڒبْذَا، أَذْ إِڒِينْ إِڭّْوجنْ خْ وُوذمْ ن سِيذِيثْنغْ ؤُ خْ ؤُعُودْجِي ن جّهْذْ نّسْ، ▪
10 خْمِي د غَا يَاسْ نتَّا حِيمَا أَذْ إِتّْوَاعُودْجِي ذڭْ وَاسّْ نِّي ذِي مَارَّا إِمْقدَّاسنْ نّسْ ؤُ حِيمَا أَذْ إِسّْشنْ ڒعْجَايبْ نّسْ س ينِّي ذَايسْ يُومْننْ، مِينْزِي ثُومْنمْ زِي شّْهَاذثْ نّغْ إِ كنِّيوْ ذڭْ وَاسّْ نِّي. ▪
11 س ؤُينِّي نْكسِّي أَومْ ڒْمعْرُوفْ ڒبْذَا، حِيمَا أَربِّي نّغْ أَذْ كنِّيوْ يڭّْ أَذْ ثِيڒِيمْ ثسْذَاهْدْجمْ ثَاڒَاغِيثْ نْومْ ؤُ حِيمَا أَذْ إِكمّڒْ ذَايْومْ س جّهْذْ مَارَّا أَرْضَا ذِي ثْشُونِي ؤُ ذِي ڒخْذَايمْ ن لْ-إِيمَانْ،
12 حِيمَا أَذْ ذَايْومْ إِتّْوَاعُودْجِي إِسمْ ن سِيذِيثْنغْ يشُّو، ؤُشَا ؤُڒَا ذ كنِّيوْ ذَايسْ، عْلَاحْسَابْ أَرْضَا ن أَربِّي نّغْ ؤُ ن سِيذِيثْنغْ يشُّو لْمَاسِيحْ.