أَحطُّو
5
1 مَاشَا زِي جِّيهثْ ن إِكُوذنْ ذ ثْسَاعّثِينْ، أَ أَيْثْمَا، أَقَا نْهْڒَا مَا أَذْ أَومْ د-أَرِيغْ. 2 كنِّيوْ سِيمَانْثْ نْومْ ثسّْنمْ نِيشَانْ أَقَا أَسّْ ن سِيذِيثْنغْ أَذْ د-يَاسْ أَمْ ؤُشفَّارْ ذِي دْجِيڒثْ. ▪ 3 خْمِي إِ غَا إِنِينْ نِيثْنِي: ’أَقَا ڒهْنَا ذ ڒْهُوذْنثْ!‘، ڒخْذنِّي أَذْ خَاسنْ إِكّْ وَاريّبْ ذغْيَا، أَمْ تّكّنْ ڒوْجعْ ن ثَارُوثْ خْ ثمْغَارْثْ ثنِّي س دّيْسثْ ؤُشَا وَارْ ذِينْ مَانِي إِ غَا يَاروْڒنْ. ▪ 4 مَاشَا كنِّيوْ، أَ أَيْثْمَا، وَارْ ثدْجِيمْ شَا ذِي ثَادْجسْثْ مَاحنْذْ أَذْ خَاومْ-د إِوْضَا وَاسّْ نِّي أَمْ ؤُشفَّارْ، ▪ 5 مَاغَارْ كنِّيوْ مَارَّا ذ ثَارْوَا ن ثْفَاوْثْ ذ ثَارْوَا ن وَاسّْ. وَارْ ندْجِي شَا ن دْجِيڒثْ نِيغْ ن ثَادْجسْثْ. ▪ 6 س ؤُينِّي إِتّْخصَّا أَنغْ وَارْ نتّطّصْ أَمشْنَاوْ إِنّغْنِي، مَاشَا أَذْ نِيڒِي نْفَاقْ ؤُ نحْضَا، ▪ 7 مِينْزِي إِنِّي إِتّطّْصنْ، أَقَا تّطّْصنْ ذِي دْجِيڒثْ، ؤُ إِنِّي إِسّْشَارنْ، أَقَا سّْشَارنْ س دْجِيڒثْ، 8 مَاشَا أجّْ أَنغْ إِنِّي إِدْجَانْ ن وَاسّْ، أَذْ نِيڒِي نحْضَا، أَقَا نْحزّمْ إِذْمَارنْ نّغْ س وَارُّوضْ ن وُوزَّاڒْ ن لْ-إِيمَانْ ذ ثَايْرِي، ؤُ س لْكَاسْكْ ن ؤُسِيثمْ ن ثُوذَارْثْ خْ ؤُزدْجِيفْ. ▪ 9 مِينْزِي أَربِّي وَارْ ذ أَنغْ يڭِّي إِ وغْضَابْ، مَاشَا حِيمَا أَذْ نطّفْ ثُوذَارْثْ ذِي سِيذِيثْنغْ يشُّو لْمَاسِيحْ، 10 ونِّي خَانغْ إِمُّوثنْ، حِيمَا نشِّينْ، مَا نْفَاقْ نِيغْ نطّصْ، أَذْ كِيذسْ ندَّارْ. ▪
11 س ؤُينِّي شجّْعمْ، بْنَامْ إِجّنْ ونّغْنِي أَمْ ث ثڭِّيمْ عَاوذْ.
أَوَاڒْ أَنڭَّارُو
12 مَاشَا نتَّارْ زَّايْومْ، أَ أَيْثْمَا، أَذْ ثسّْنمْ إِنِّي إِتّڭّنْ ثِيزمَّارْ أَطَّاسْ جَارْ أَومْ ذ إِنِّي إِدْجَانْ خَاومْ ذِي سِيذِيثْنغْ ذ إِنِّي كنِّيوْ إِسّڒْمَاذنْ، ▪
13 مَاحنْذْ أَذْ تّْوقَّارنْ زَّايْومْ س ثَايْرِي كْثَارْ، ؤُ إِڒِيمْ ذِي ڒهْنَا أَكِيذْسنْ زِي سِّيبّثْ ن ڒْخذْمثْ نْسنْ.
14 نعْڒمْ أَومْ، أَ أَيْثْمَا، أَذْ ثسڭّْممْ إِنِّي د-إِفّْغنْ زڭْ ؤُستّفْ، ڭّمْ ؤُڒْ ذڭْ إِنِّي وَارْ غَارْسنْ ثدْجِي ثرْيَاسْثْ، عَاوْنمْ إِنِّي إِضعْفنْ، إِڒِيمْ ذ إِصبَّارنْ أَكْ-ذ مَارَّا.
15 حْضَامْ مَاحنْذْ ؤُڒَا ذ إِجّْ وَارْ إِتّنْثِيقِيمْ ڒْغَارْ س ڒْغَارْ، مَاشَا أَرْزُومْ ڒبْذَا مِينْ إِصبْحنْ أَكْ-ذ وَايَاوْيَا ؤُشَا إِ كُوڒْشِي. ▪
16 فَارْحمْ ڒبْذَا، ▪
17 ژَّادْجمْ بْڒَا قطُّو، ▪
18 قَاذمْ ذِي مَارَّا ثِيمسْڒَايِينْ، مِينْزِي ذ مَانْ أَيَا مِينْ إِخْسْ أَربِّي ذِي يشُّو لْمَاسِيحْ إِ كنِّيوْ. ▪
19 وَارْ سّْخسّْيمْ شَا أَرُّوحْ، ▪ 20 ؤُ وَارْ سحْقَارَامْ نُّوبَاوَاثْ، 21 مَاشَا وزْنمْ قَاعْ مِينْ إِدْجَانْ ؤُشَا طّْفمْ غَارْ مِينْ إِصبْحنْ. ▪
22 أَڭّْوجمْ خْ مَارَّا مِينْ إِدْجَانْ دَّابْ ن ثُوعفّْنَا. ▪ 23 أَقَا أَربِّي ن ڒهْنَا، أَذْ كنِّيوْ إِقدّسْ مَارَّا ؤُشَا أَذْ إِحْضَا مَارَّا أَرُّوحْ ذ ڒعْمَارْ ذ أَرِّيمثْ نْومْ بْڒَا ڒْعِيبْ أَڒْ ثَاوَاسِيثْ ن سِيذِيثْنغْ يشُّو لْمَاسِيحْ. ▪ 24 أَقَا ذ ونِّي خَانغْ-د إِتّْڒَاغَانْ ذ أَمْثِيقِّي، أَقَا نتَّا أَذْ ث إِڭّْ. ▪
25 أَ أَيْثْمَا، كْسِيمْ أَنغْ ڒْمعْرُوفْ عَاوذْ.
26 سدْجْممْ خْ وَاوْمَاثنْ نّغْ س ؤُسُوذمْ إِقدّْسنْ. ▪
27 نشّْ سّْجُودْجغْ كنِّيوْ ذڭْ وُوذمْ ن سِيذِيثْنغْ مَاحنْذْ أَذْ ثْغَارمْ ثَابْرَاثْ-أَ إِ مَارَّا أَوْمَاثنْ إِمْقدَّاسنْ.
28 أَرْضَا ن سِيذِيثْنغْ يشُّو لْمَاسِيحْ أَذْ كِيومْ يِيڒِي.