‏1 بُولُوسْ، س ڒْخَاضَارْ ن أَربِّي أَقَا-ث ذ رَّاسُولْ ن يشُّو لْمَاسِيحْ، ذ ثَاوْمَاثْ ثِيمُوثِييُو، ^▫   ‏2 إِ إِنِّي إِدْجَانْ ذِي كُولُوسِّي، أَوْمَاثنْ إِمْقدَّاسنْ ذ ڒْمُومِينِينْ ذِي يشُّو لْمَاسِيحْ: ڒهْنَا ذ أَرْضَا أَذْ كِيومْ إِڒِينْ زِي أَربِّي، بَابَاثْنغْ. ^▪  

‏3 ڒبْذَا نتّْقَاذَا أَربِّي، ثَابَابَاثْ ن سِيذِيثْنغْ يشُّو لْمَاسِيحْ، ؤُشَا نژُّودْجْ خَاومْ. ^▪   ‏4 خْزَارْ، نسْڒَا خْ لْ-إِيمَانْ نْومْ ذِي يشُّو لْمَاسِيحْ ؤُ خْ ثَايْرِي نْومْ إِ مَارَّا إِمْقدَّاسنْ، ‏5 خْ سِّيبّثْ ن ؤُسِيثمْ إِ ذ أَومْ إِسّْوجْذنْ ذڭْ إِجنْوَانْ، إِ خْ ثِيزَّارمْ ثسْڒَامْ زڭْ ؤُمزْوَارُو س وَاوَاڒْ ن ثِيذتّْ ن ڒخْبَارْ أَصبْحَانْ ^▪   ‏6 إِ ذ أَومْ إِتّْوَابَارّْحنْ ؤُ إِ دُّونشْثْ مَارَّا، ؤُشَا إِڭمَّا ؤُشَا إِتَّاوِي-د ڒْغِيدْجثْ، أَقَا ذِينِّي عَاوذْ جَارْ أَومْ زڭْ وَاسّْ ؤُمِي ث ثسْڒِيمْ ؤُ ثسّْنمْ أَرْضَا ن أَربِّي ذِي ثِيذتّْ، ^▪   ‏7 أَمْ مَامّشْ ث ثْفهْممْ زِي إِبَافْرَاسْ، ونِّي ذ أَمْسخَّارْ نّغْ إِعِيزّنْ ن لْمَاسِيحْ إِ كنِّيوْ. ^▪   ‏8 نتَّا إِسَّارْڭبْ أَنغْ-د خْ ثَايْرِي نْومْ ذِي أَرُّوحْ.

‏9 س ؤُينِّي، ؤُڒَا ذ نشِّينْ، زڭْ وَاسّْ ؤُمِي نسْڒَا خْ مَانْ أَيَا، وَارْ نسّْبذِّي شَا ثَاژَادْجِيثْ خَاومْ، نتّتَّارْ أَذْ ثْذوْڒمْ ثشُّورمْ س ثُوسّْنَا ذ ڒفْرَاحثْ ن أَربِّي، ذِي مَارَّا ثِيغِيثْ ذ ڒفْهَامثْ ن أَرُّوحْ، ^▪  

‏10 حِيمَا أَذْ ثُويُورمْ أَمْ مَامّشْ إِسْذَاهدْجْ، أَذْ ثَارْضَامْ أَربِّي ذِي مَارَّا ڒخْذَايمْ ثِيصبْحَانِينْ، أَذْ د-ثَاوْيمْ ڒْغِيدْجثْ ؤُشَا أَذْ ثيْمَامْ ذِي ثُوسّْنَا ن أَربِّي، ^▫  ▪  

‏11 ؤُ أَذْ تّْوَاسّْجهْذمْ س مَارَّا جّهْذْ، عْلَاحْسَابْ ڒمْغَارثْ ن ؤُعُودْجِي نّسْ، س مَارَّا ضّْبَارْ ذ تَّاسِيعْ ن ڒْخَاضَارْ ذ ڒفْرَاحثْ،

‏12 أَمْ ثْقَاذَامْ أَربِّي، ثَابَابَاثْ، ونِّي إِ ذ أَنغْ إِسّْوجْذنْ حِيمَا نْزمَّارْ أَذْ نْشَارْشْ ذِي ڒْوَارْثْ ن إِمْقدَّاسنْ ذِي ثْفَاوْثْ.

‏13 نتَّا إِسّنْجمْ أَنغْ زِي صُّولْطَا ن ثَادْجسْثْ ؤُ إِسّْمُوطِّييْ أَنغْ غَارْ ثْڭلْذِيثْ ن مِّيسْ نّسْ إِعِيزّنْ، ^▪  

‏14 ونِّي ذَايسْ غَارْنغْ أَصْڒَاحْ ذ وغْفَارْ ن دّْنُوبْ. ^▪  

‏15 وَانِيثَا ذ صِّيفثْ ن أَربِّي إِ وَارْ نتّْوِيڒِي شَا، أَمنْزُو خْ مَارَّا مِينْ د-إِتّْوَاخڒْقنْ، ^▫  ▪  

‏16 زَّايسْ د-إِتّْوَاخْڒقْ مَارَّا مِينْ إِدْجَانْ ذڭْ إِجنْوَانْ ذ مِينْ إِدْجَانْ ذِي ثمُّورْثْ، مِينْ نتّْوَاڒَا ذ مِينْ وَارْ نتّْوِيڒِي شَا: ڒكْرَاسِي ن إِجدْجِيذنْ نِيغْ ثِيصدْجَاضِينْ نِيغْ ڒحْكَامَاثْ ؤُڒَا ذ صُّولَاطَاثْ، مَارَّا مِينْ إِدْجَانْ أَقَا إِتّْوَاخْڒقْ-د س ؤُفُوسْ نّسْ ؤُ زَّايسْ نتَّا. ^▪  

‏17 نتَّا ثُوغَا-ث قْبڒْ مَارَّا مِينْ إِدْجَانْ ؤُشَا مَارَّا مِينْ إِدْجَانْ أَقَا-ث زَّايسْ.

‏18 نتَّا ذ أَزدْجِيفْ ن أَرِّيمثْ، ثنِّي إِدْجَانْ ذ ثَامسْمُونْثْ. نتَّا ذ أَزدْجِيفْ ذ مِّيسْ أَمنْزُو إِ د-إِتّْوَاخڒْقنْ زِي ثَادَّارْثْ ن إِمتِّيننْ، حِيمَا أَذْ يِيڒِي ذ أَمزْوَارْ ذِي كُوڒْشِي. ^▪  

‏19 مِينْزِي ثُوسَا أَسْ-د إِ ڒْخَاضَارْ مَاحنْذْ مَارَّا ڒكْمَارثْ أَذْ إِزْذغْ ذَايسْ. ^▪   ‏20 زَّايسْ إِسّصْڒحْ مَارَّا مِينْ إِدْجَانْ أَكْ-ذ يِيخفْ نّسْ، أَمْ مِينْ إِدْجَانْ ذِي ثمُّورْثْ أَمْ مِينْ إِدْجَانْ ذڭْ إِجنْوَانْ، أَمْ إِڭَّا ڒهْنَا س إِذَامّنْ ن صَّالِيبْ نّسْ. ^▪  

‏21 ؤُڒَا إِ كنِّيوْ، إِنِّي ثُوغَا قْبڒْ ذ إِبَارَّانِييّنْ ذ ڒْعذْيَانْ ذڭْ إِخَارِّيصنْ نْومْ زِي سِّيبّثْ ن ڒخْذَايمْ نْومْ ثِيعفَّانِينْ، إِوْشَا ڒخُّو ڒهْنَا ‏22 س أَرِّيمثْ ن ويْسُومْ نّسْ ؤُ ن ڒْموْثْ نّسْ، حِيمَا أَذْ كنِّيوْ إِسّْبدّْ ذ إِمْقدَّاسنْ قِيبَاتْشْ نّسْ، بْڒَا مَا أَذْ ذَايْومْ إِتّْوَافْ ڒَا ذ إِجّْ نْ ڒخْمجْ ؤُڒَا ذ إِجّْ ن ڒْعِيبْ، ^▪   ‏23 مَاڒَا ثقِّيممْ ثُويُورمْ ذِي لْ-إِيمَانْ نْومْ، أَمْ ذْسَاسْ نْومْ إِقِّيمْ إِمْثنْ، ؤُ وَارْ ثْسمّْحمْ شَا ذڭْ ؤُسِيثمْ ن ڒخْبَارْ أَصبْحَانْ إِ ثسْڒِيمْ نِّي زِي إِتّْوَابَارّحْ غَارْ مَارَّا مِينْ د-إِتّْوَاخڒْقنْ نِّي إِدْجَانْ سَاذُو ؤُجنَّا، ونِّي زِي ذوْڒغْ نشّْ، بُولُوسْ، ذ أَمْسخَّارْ. ^▪  

‏24 أَقَا أَيِي فَارْحغْ أَمْ كسِّيغْ ثَامَارَا خَاومْ ؤُ تّْكمّْڒغْ ذِي أَرِّيمثْ إِنُو مِينْ إِقِّيمنْ زِي ڒمْحَايمْ ن لْمَاسِيحْ ذِي طّْوعْ ن أَرِّيمثْ نّسْ ثنِّي ذ ثَامسْمُونْثْ، ^▪  

‏25 إِ زِي ذوْڒغْ ذ أَمْسخَّارْ عْلَاحْسَابْ أَوكّڒْ إِ ذ أَيِي إِمّوْشنْ خَاومْ زِي أَربِّي، حِيمَا أَذْ ذَايْومْ أَرّغْ أَوَاڒْ ن أَربِّي أَذْ يِيوضْ غَارْ ڒكْمَارثْ، ^▪   ‏26 سِّيرّْ إِ ثُوغَا إِنُّوفَارنْ إِ يِيجّْ ن ڒْمِيجَاڒْ ذ أَزِيرَارْ ن إِكُوذنْ ن ڒْوقْثْ ذ ڒشْيُورْ، مَاشَا إِتّْوَانُّورْزمْ ڒخُّو إِ إِمْقدَّاسنْ نّسْ، ^▪   ‏27 إِنِّي ؤُمِي إِخْسْ أَربِّي أَذْ أَسنْ إِسّْشنْ إِڭڒْوَانْ ن ؤُعُودْجِي ن سِّيرّْ-أَ جَارْ ڒڭْنُوسْ، ونِّي إِدْجَانْ ذ لْمَاسِيحْ ذَايْومْ، أَسِيثمْ ن ؤُعُودْجِي نّغْ. ^▪   ‏28 أَقَا نتّْبَارّحْ زَّايسْ، ڒَامِي نعْڒمْ إِ كُوڒْ بْنَاذمْ ؤُشَا نسّڒْمذْ كُوڒْ بْنَاذمْ ذِي مَارَّا ثِيغِيثْ، حِيمَا أَذْ نسّْبدّْ كُوڒْ بْنَاذمْ نِيشَانْ قِيبَاتْشْ إِ يشُّو لْمَاسِيحْ. ‏29 إِ مَانْ أَيَا ؤُمِي جهّْذغْ ؤُ تّْمنْغِيغْ س ؤُفُوسْ ن جّهْذْ نِّي ذ أَيِي إِمّوْشنْ.