‏1 بُولُوسْ ذ ثِيمُوثِييُو، إِمْسخَّارنْ ن يشُّو لْمَاسِيحْ، إِ مَارَّا إِمْقدَّاسنْ ذِي يشُّو لْمَاسِيحْ إِنِّي إِدْجَانْ ذِي فِيلِيبِّي أَكْ-ذ إِمحْضَاينْ ذ إِمْسخَّارنْ: ‏2 أَرْضَا ذ ڒهْنَا أَذْ كِيومْ إِڒِينْ زِي أَربِّي بَابَاثْنغْ، ؤُ زِي سِيذِيثْنغْ يشُّو لْمَاسِيحْ. ^▪  

‏3 تّْقَاذِيغْ أَربِّي إِنُو ڒَامِي ذَايْومْ تّْفكَّارغْ ڒبْذَا، ^▪   ‏4 مَاغَارْ ذِي كُوڒْ ثِيژَادْجِيثِينْ إِنُو خَاومْ، أَقَا كْسِيغْ س ڒْمعْرُوفْ س ڒفْرَاحثْ ‏5 ذِي سِّيبّثْ ن ثْمُونْثْ نْومْ أَكْ-ذ ڒخْبَارْ أَصبْحَانْ زڭْ وَاسّْ أَمزْوَارُو أَڒْ إِضَا. ‏6 أَقَا تِّيقّغْ بلِّي ونِّي ذَايْومْ إِبْذَانْ ڒْخذْمثْ إِصبْحنْ، أَذْ ت إِكمّڒْ أَڒْ أَسّْ ن سِيذِيثْنغْ يشُّو لْمَاسِيحْ. ^▪   ‏7 إِشْنَا أَيِي أَذْ فكَّارغْ ذَايْومْ مَارَّا أَمُّو، مِينْزِي أَقَا كنِّيوْ غَارِي ذڭْ وُوڒْ إِنُو خْمِي دْجِيغْ ذِي سْنَاسڒْ ؤُڒَا خْمِي إِ غَا أَوْثغْ خْ ثِيذثْ ن ڒخْبَارْ أَصبْحَانْ، مِينْزِي كنِّيوْ ثْشَارْشمْ أَكِيذِي ذِي أَرْضَا. ^▪   ‏8 مِينْزِي أَربِّي ذ أَشهَّاذْ إِنُو مشْحَاڒْ كنِّيوْ وحّْشغْ س ڒحْنُونشْثْ يُودْجْغنْ ن يشُّو لْمَاسِيحْ. ^▪  

‏9 مَانْ أَيَا إِ تّْژَادْجِيغْ، أَقَا ثَايْرِي نْومْ أَذْ ثْفيّضْ أَطَّاسْ س وَاطَّاسْ ذِي ثُوسّْنَا ذ قَاعْ ڒفْهَامثْ ثَارُوحَانشْثْ،

‏10 أَذْ ثْڒمْذمْ مَاحنْذْ أَذْ ثْفَارْزمْ مِينْ إِتّْڒِيقنْ، ؤُ أَذْ ثِيڒِيمْ ثقُّورمْ ؤُ بْڒَا ڒْعِيبْ ذڭْ وَاسّْ ن لْمَاسِيحْ،

‏11 ثشُّورمْ س ڒْغِيدْجثْ ن ثْسڭْذَا إِ يدْجَانْ ذِي يشُّو لْمَاسِيحْ إِ ؤُعُودْجِي ذ ؤُسمْغَارْ ن أَربِّي.

‏12 أَ أَيْثْمَا، نشّْ خْسغْ أَذْ ثسّْنمْ بلِّي ثِيمسْڒَايِينْ إِ ذ أَيِي إِمْسَارنْ أَرْنِينْثْ عَاذْ ذِي ثُوزّڭَّارْثْ ن ثْبَارّحْثْ ن ڒخْبَارْ أَصبْحَانْ،

‏13 مِينْزِي ثتّْوَاسّنْ ثْمحْبَاسْثْ إِنُو س لْمَاسِيحْ إِ قَاعْ إِنِّي إِدْجَانْ ذِي ڒقْصَارْ ن قَايْصَارْ ؤُ إِ قَاعْ مِينْ إِقِّيمنْ.

‏14 أَزْينْ أَمقّْرَانْ ن وَاوْمَاثنْ ذِي سِيذِيثْنغْ، ؤُمِي دْجِيغْ ذِي ثْمحْبَاسْثْ، إِذْوڒْ غَارْسنْ تِّيقّثْ كْثَارْ ؤُشَا ذوْڒنْ زعّْمنْ سَّاوَاڒنْ أَوَاڒْ ن أَربِّي س ؤُفيّضْ كْثَارْ، بْڒَا ثِيڭّْوُوذِي. ^▪  

‏15 شَا زَّايْسنْ تّْبَارّْحنْ لْمَاسِيحْ زِي ڒحْسذْ ذ ؤُمنْغِي، مَاشَا شَا نّغْنِي عَاوذْ زِي نّيّثْ ثشْنَا ؤُ س ثَايْرِي،

‏16 مِينْزِي نِيثْنِي سّْننْ أَقَا تّْوَاڭّغْ مَاحنْذْ أَذْ وْثغْ خْ ڒخْبَارْ أَصبْحَانْ.

‏17 إِنّغْنِي تّْبَارّْحنْ س لْمَاسِيحْ س ؤُمْشُوبّشْ، مَاشِي نِيشَانْ، تّخْسنْ أَذْ خَافِي أَرْنِينْ ڒْمحْنثْ إِ سْنَاسڒْ إِنُو.

‏18 س مَانْ أَيَا فَارّْهغْ، وَاهْ أَذْ فَارْحغْ: أَقَا إِتّْوَابَارّحْ لْمَاسِيحْ س إِبْرِيذنْ إِفَارْزنْ، مَا س وُوذمْ، نِيغْ س ثِيذتّْ.

‏19 مِينْزِي سّْنغْ أَقَا ثِيمسْڒَايِينْ-أَ أَذْ إِڒِينْثْ إِ ثُوذَارْثْ س ثْژَادْجِيثْ نْومْ ؤُ س ثوْهِيبْثْ ن أَرُّوحْ ن يشُّو لْمَاسِيحْ، ^▪   ‏20 مَاحنْذْ نشّْ، أَمْ سِيثِيمغْ ؤُ تّْرَاجِيغْ، وَارْ تّْسضْحِيغْ شَا خْ وَالُو، مَاشَا أَمشْنَاوْ ڒبْذَا ؤُڒَا ذ ڒخُّو أَذْ إِتّْوَاسّمْغَارْ لْمَاسِيحْ س بْطَايْطَايْ ذِي أَرِّيمثْ إِنُو، مَا س ثُوذَارْثْ نِيغْ س ڒْموْثْ. ^▪   ‏21 مِينْزِي ثُوذَارْثْ إِ نشّْ ذ لْمَاسِيحْ ؤُشَا ڒْموْثْ ذ أَرْبحْ. ‏22 مَاشَا مَاڒَا قِّيمغْ دَّارغْ ذِي أَرِّيمثْ ؤُشَا أَقَا ذِينْ ڒْغِيدْجثْ زِي ڒْخذْمثْ إِنُو، خنِّي وَارْ سِّينغْ مِينْ غَا خْضَارغْ. ‏23 مَاغَارْ أَقَا أَيِي جَارْ ثْنَاينْ ن إِغزْذِيسنْ: ذَايِي مژْرِي مَاحنْذْ أَذْ رَاحغْ أَذْ إِڒِيغْ أَكْ-ذ لْمَاسِيحْ، مِينْزِي مَانْ أَيَا قَاعْ حْسنْ، ‏24 مَاشَا أَغِيمِي ذِي أَرِّيمثْ إِتّْخصَّا عَاذْ كْثَارْ ذِي طّْوعْ نْومْ. ‏25 ذ مَانْ أَيَا سّْنغْ نِيشَانْ، أَقَا أَذْ قِّيمغْ، وَاهْ أَذْ قِّيمغْ ذِي طّْوعْ ن ڒفْرَاحثْ نْومْ ؤُ مَاحنْذْ أَذْ إِڭْمَا لْ-إِيمَانْ نْومْ، ‏26 حِيمَا، خْمِي د غَا يَاسغْ غَارْومْ عَاوذْ، أَذْ زَّايِي إِفيّضْ ؤُسمْغَارْ نْومْ ذِي يشُّو لْمَاسِيحْ وَاهَا.

‏27 إِتّْخصَّا أَذْ ثُويُورمْ س ؤُوقَّارْ إِ ڒخْبَارْ أَصبْحَانْ ن لْمَاسِيحْ، حِيمَا، خْمِي د غَا يَاسغْ ؤُشَا أَذْ كنِّيوْ ژَترغْ ؤُڒَا خْمِي إِ غَا غَابغْ، أَذْ زَّايْومْ سْڒغْ، أَقَا ثْبدّمْ نِيشَانْ ذڭْ إِجّْ ن أَرُّوحْ ؤُ س إِجّْ ن ڒعْمَارْ ؤُشَا ثتّْغلّْبمْ س لْ-إِيمَانْ ذِي ڒخْبَارْ أَصبْحَانْ. ^▪   ‏28 وَارْ تّڭّْوذمْ شَا عمَّارْصْ زِي ڒْعذْيَانْ نْومْ. مَانْ أَيَا ذ أَعدْجمْ إِ نِيثْنِي غَارْ ؤُهلّكْ، مَاشَا إِ كنِّيوْ غَارْ ؤُسنْجمْ. ‏29 مِينْزِي أَقَا إِمّوْشْ أَومْ زِي أَربِّي، وَارْ إِدْجِي أَذْ ثَامْنمْ ذِي لْمَاسِيحْ وَاهَا مَاشَا عَاوذْ مَاحنْذْ أَذْ ثْمَارّْثمْ ذِي طّْوعْ نّسْ، ‏30 مِينْزِي غَارْومْ أَمنْغِي ذ إِجّنْ إِ ذ أَيِي ثژْرِيمْ ؤُشَا ڒخُّو ثسْڒِيمْ أَقَا-ث ذَايِي.