لْوَالِيذِينْ ذ إِحنْجِيرنْ نْسنْ
6
1 أَ ثَارْوَا، طَّاعمْ إِ لْوَالِيذِينْ نْومْ ذِي سِيذِيثْنغْ، مِينْزِي مَانْ أَيَا نِيشَانْ إِ يدْجْ. ▪ 2 ثَا ذ ثَاوْصيّثْ ثَامزْوَارُوثْ س يِيجّْ ن لْوَاعْذْ: ’وقَّارْ بَابَاشْ ذ يمَّاشْ، ▪ 3 حِيمَا أَذْ ثِيڒِيمْ مْلِيحْ ؤُ أَذْ ثدَّارمْ أَطَّاسْ ذِي ثمُّورْثْ.“ ▪ 4 أَ إِبَابَاثنْ، وَارْ سْعَارمْ شَا ثَارْوَا نْومْ، مَاشَا أَربَّامْ ثنْ س ؤُستّفْ ؤُ ذِي ثْغُورِي ن سِيذِيثْنغْ. ▪
إِمْسخَّارنْ ذ أَيْثْبَابْ نْسنْ
5 أَ إِمْسخَّارنْ، طَّاعمْ أَيْثْبَابْ نْومْ ذِي دُّونشْثْ-أَ س ثِيڭّْوُوذِي ذ ثَارْجِيجِيثْ، ؤُ س ڒصْفَايثْ ن وُوڒْ أَخْمِي إِ لْمَاسِيحْ. ▪ 6 وَارْ إِدْجِي قِيبَاتْشْ إِ ثِيطَّاوِينْ نْسنْ أَمْ إِنِّي إِتّخْسنْ أَذْ يَارْضَانْ إِوْذَانْ، مَاشَا أَمْ إِمْسخَّارنْ ن لْمَاسِيحْ إِنِّي إِتّڭّنْ مِينْ يَارطَّانْ أَربِّي. 7 خذْممْ أَسنْ س مَارَّا ؤُڒْ نْومْ، أَمشْنَاوْ إِ لْمَاسِيحْ، وَارْ إِدْجِي إِ إِوْذَانْ. 8 أَقَا ثسّْنمْ مَاڒَا ذِينْ حذْ، إِسْمغْ نِيغْ ذ أَحُورِّي، ونِّي إِ غَا إِڭّنْ شَا ذ ثَاصبْحَانْثْ، سِيذِيثْنغْ أَذْ غَارسْ يَارّْ. 9 كنِّيوْ، أَ أَيْثْبَابْ، ڭّمْ أَمنِّي أَكْ-ذ إِمْسخَّارنْ نْومْ. سَامْحمْ أَسنْ إِعذِّييّنْ نْسنْ، مَاغَارْ ثسّْنمْ، أَقَا سِيذِيثْومْ ذڭْ ؤُجنَّا إِ يدْجْ ؤُ نتَّا وَارْ إِتّڭّْ شَا س وُوذْمَاونْ. ▪
أَمنْغِي أَرُّوحَانِي ذ أَرُّوضْ ن ڒسْنَاحْ ن أَربِّي
10 س ؤُينِّي، أَ وَاوْمَاثنْ إِنُو، محْضمْ ذِي سِيذِيثْنغْ ؤُ ذِي جّهْذْ ن ثْزمَّارْ نّسْ.
11 أَرْضمْ س مَارَّا ڒسْنَاحْ ن أَربِّي، حِيمَا أَذْ ثسّْبدّمْ إِبْرِيذنْ ن ثْحْرَايْمشْثْ ن إِبْڒِيسْ. ▪
12 أَقَا وَارْ نتّْمنْغِي شَا أَكْ-ذ ويْسُومْ ذ إِذَامّنْ، مَاشَا أَكْ-ذ ڒحْكَامَاثْ، أَكْ-ذ ڒْحُوكَّامْ ذ صُّولَاطَاثْ ن دُّونشْثْ-أَ ثَابَارْشَانْثْ ؤُ أَكْ-ذ أَرُّوحَاثْ إِعفّْننْ إِنِّي إِدْجَانْ سَاذُو ؤُجنَّا. ▪
13 س ؤُينِّي أَرْضمْ س مَارَّا ڒسْنَاحْ ن أَربِّي مَاحنْذْ أَذْ ثمّْعَاڒَامْ أَكْ-ذ ؤُمْعفَّانْ، ؤُ خْمِي إِ غَا ثْكمّْڒمْ كُوڒْشِي، بدّمْ خنِّي. ▪
14 خنِّي بدّمْ، ثْبيْسمْ س ثِيذتّْ، سْذُوڒْيمْ إِذْمَارنْ نْومْ س ثْسڭْذَا، ▪
15 أَذْ إِڒِينْ إِضَارنْ نْومْ تّْوَاقّْننْ س ڒْخَاضَارْ إِ ڒخْبَارْ أَصبْحَانْ ن ڒهْنَا.
16 كْسِيمْ ثَاسدَّارْثْ ن لْ-إِيمَانْ ذڭْ ؤُفُوسْ نْومْ، مَاحنْذْ أَذْ ثْزمَّارمْ أَذْ ثسّْخسْيمْ مَارَّا فْڒِيثْشَاثْ إِتّحْذُوذُوقنْ س ثْمسِّي ن ؤُمْعفَّانْ.
17 كْسِيمْ لْكَاسْكْ ن وصْڒَاحْ خْ ؤُزدْجِيفْ نْومْ ؤُشَا طّْفمْ سِّيفْ ن أَرُّوحْ إِ إِدْجَانْ ذ أَوَاڒْ ن أَربِّي. ▪
18 ژَّادْجَامْ ذِي مَارَّا ثِيژَادْجْ ذ دّْعَاوِي نْومْ ڒبْذَا ذِي أَرُّوحْ، ؤُ حْضَامْ أَكِيذسْ بْڒَا ؤُقطُّو ذِي ثْژَادْجِيثْ، أَمْ ثتّْژَادْجَامْ ؤُ ثْكسِّيمْ س ڒْمعْرُوفْ ڒبْذَا ذِي طّْوعْ ن مَارَّا إِمْقدَّاسنْ، ▪
19 ؤُڒَا ذِي طّْوعْ إِنُو، حِيمَا أَذْ أَيِي إِمّوْشْ أَوَاڒْ خْمِي إِ غَا أَرْزْمغْ أَقمُّومْ إِنُو، مَاحنْذْ أَذْ بَارّْحغْ سِّيرّْ ن ڒخْبَارْ أَصبْحَانْ س ثرْيَاسْثْ، ▪ 20 إِ زِي نشّْ ذ أَمْسكِّي س سْنَاسڒْ، حِيمَا أَذْ خَاسْ سِّيوْڒغْ س ثرْيَاسْثْ أَمْ مَامّشْ إِشُووَّارْ أَذْ سِّيوْڒغْ. ▪
أَسدْجمْ غَارْ ؤُنڭَّارُو
21 حِيمَا أَذْ ثسّْنمْ مَامّشْ إِ غَا يِيڒِي ؤُمدُّورْ إِنُو مِيخفْ ؤُ مِينْ تّڭّغْ، خْزَارْ، ثِيشِيكُوسْ، إِجّْ ن ؤُمَاثْنغْ إِعِيزّنْ ذ أَمْسخَّارْ أَمْثِيقِّي ن سِيذِيثْنغْ أَذْ كنِّيوْ إِخبَّارْ. ▪ 22 أَقَا سّكّغْ ث-إِ-د إِ مَانْ أَيَا سِيمَانْثْ نّسْ، حِيمَا أَذْ ثسّْنمْ أَمدُّورْ إِنُو، ؤُشَا حِيمَا أَذْ ذَايْومْ يڭّْ ؤُڒْ. ▪