5
1 إِڒِيمْ ذ إِمضْفَارنْ ن أَربِّي أَمْ ثَارْوَا إِعِيزّنْ، 2 ؤُيُورمْ ذِي ثَايْرِي أَمشْنَاوْ ؤُڒَا ذ لْمَاسِيحْ ثُوغَا إِتّخْسْ أَنغْ، إِوْشَا إِخفْ نّسْ خَانغْ ذ ثَاوْهِيبْثْ ذ ثْغَارْصْثْ إِ أَربِّي، أَقَا-ت ذ إِشْثْ ن ڒفْوَاحثْ ثَاصبْحَانْثْ. ▪ 3 مَاشَا خْ فَارْقْ-شّْغڒْ ذ مَارَّا ڒخْمجْ ذ طّْمعْ، وَارْ خَاسْ إِتِّيڒِي بُو وَاوَاڒْ أَمْ مَامّشْ إِشُووَّارْ إِ إِمْقدَّاسنْ، - ▪ 4 ؤُڒَا خْ ڒْهَارْذْ إِسّْبهْذْڒنْ نِيغْ خْ وَاوَاڒنْ إِخْوَانْ نِيغْ خْ ثْقصَّارْثْ، ثِيمسْڒَايِينْ أَيَا وَارْ نفّْعنْثْ ذِي وَالُو - ، مَاشَا مَامّشْ نّغْنِي إِتّْخصَّا أَقَاذِي. 5 مِينْزِي ثسّْنمْ أَقَا ؤُڒَا ذ إِجّْ ونِّي إِتّڭّنْ فَارْقْ-شّْغڒْ، نِيغْ أَمخْمُوجْ نِيغْ أَضمَّاعْ، أَقَا وَانِيثَا إِعبّذْ لْ-أَصْنَامْ، وَارْ غَارسْ ثدْجِي ثسْغَارْثْ ذِي ثْڭلْذِيثْ ن لْمَاسِيحْ ؤُ ن أَربِّي. ▪
6 وَارْ تّجِّيمْ ؤُڒَا ذ إِجّنْ أَذْ كنِّيوْ إِغكّْوِي س وَاوَاڒنْ إِخْوَانْ، أَقَا زِي مَانْ أَيَا د-إِهكّْوَا وغْضَابْ ن أَربِّي خْ ثَارْوَا ن ڒْمُوعْصِييّثْ. ▪ 7 وَارْ شَارّْشمْ شَا أَكِيذْسنْ! 8 مِينْزِي زِيشْ ثُوغَا كنِّيوْ ذ ثَادْجسْثْ، مَاشَا أَقَا ڒخُّو كنِّيوْ ذ ثَافَاوْثْ ذِي سِيذِيثْنغْ. س ؤُينِّي ؤُيُورمْ أَمْ ثَارْوَا ن ثْفَاوْثْ، ▪ 9 مِينْزِي ڒْغِيدْجثْ ن ثْفَاوْثْ ثتِّيڒِي ذِي مَارَّا ثْشُونِي ذ ثْسڭْذَا ذ ثِيذتّْ. ▪
10 فَارْزمْ مِينْ غَا يَارْضَانْ سِيذِيثْنغْ.
11 وَارْ شَارّْشمْ شَا ذِي ڒخْذَايمْ ثِيبَارْشَانِينْ إِ وَارْ د-إِتِّيوْينْ ڒْغِيدْجثْ ذڭْ يِيخفْ نْسنْثْ، مَاشَا وبّْخمْ ثنْ. ▪
12 مِينْزِي مِينْ تّڭّنْ ذِي ثْنُوفّْرَا، أَقَا-ث ذ نّْعِي إِ وَارْ ثْزمَّارذْ ؤُڒَا أَذْ ث ثْعَاوْذذْ.
13 مَارَّا مَانْ أَيَا أَذْ إِتّْوَاوبّخْ ؤُ أَذْ إِتّْوَاسَّارْڭبْ س ثْفَاوْثْ، ؤُ مَارَّا مِينْ د-إِسّْبَاننْ، أَقَا-ت ذ ثَافَاوْثْ. ▪
14 أَقَا مَايمِّي قَّارنْ:
”فَاقْ شكْ، أَ بُو يِيضصْ.
كَّارْ-د زِي ثَادَّارْثْ ن إِمتِّيننْ،
ؤُشَا أَذْ خَاكْ إِڭّْ لْمَاسِيحْ ثَافَاوْثْ.“ ▪
15 حْضَامْ أَذْ ثُويُورمْ س ؤُوقَّارْ، مَاشِي أَمْ إِپُوهَاڒِييّنْ مَاشَا أَمْ إِمِيغِيسنْ، ▪
16 إِنِّي إِ غَا يَاوْينْ أَرِيقِّي إِ ڒْوقْثْ-أَ، مِينْزِي ؤُسَّانْ أَيَا ذ إِعفَّاننْ. ▪
17 خنِّي وَارْ تِّيڒِيمْ ذ إِپُوهَاڒِييّنْ، مَاشَا فهْممْ مِينْ إِخْسْ أَربِّي. ▪
18 وَارْ سشَّارَامْ شَا س بِينُو إِ إِتَّاوْينْ غَارْ ڒقْجَاحثْ، مَاشَا إِڒِيمْ ثْعمَّارمْ س أَرُّوحْ. ▪
19 سِيوْڒمْ جَارْ أَومْ س إِزهِّيذنْ ذ إِزْڒَانْ ن ؤُصبّحْ ذ إِزْڒَانْ ن أَرُّوحْ، غنّْجمْ ذڭْ وُوڒَاونْ نْومْ إِ سِيذِي. ▪ 20 قَاذَامْ ڒبْذَا أَربِّي ثَابَابَاثْ إِ كُوڒْ إِجّنْ ذڭْ يِيسمْ ن سِيذِيثْنغْ يشُّو لْمَاسِيحْ. ▪ 21 سْوَاضْعمْ إِخفْ نْومْ إِ وَايَاوْيَا ذِي ثَايْرِي ن لْمَاسِيحْ.
ڒمْڒَاشْ ذ ثَاصْوِيرْثْ ن لْمَاسِيحْ ذ ثْمسْمُونْثْ
22 أَ ثِيمْغَارِينْ، وَاضْضْعنْثْ إِ يرْيَازنْ نْكنْثْ أَمْ مَامّشْ ثتّْوَاضْضْعنْثْ إِ سِيذِيثْنغْ، ▪ 23 مِينْزِي أَرْيَازْ أَقَا ذ أَزدْجِيفْ ن ثمْغَارْثْ أَمشْنَاوْ ؤُڒَا ذ لْمَاسِيحْ إِ يدْجَانْ ذ أَزدْجِيفْ ن ثْمسْمُونْثْ، ذ ڒْعُونْصَارْ ن ثُوذَارْثْ ن أَرِّيمثْ. ▪ 24 أَمشْنَاوْ ثَامسْمُونْثْ إِ يدْجَانْ أَذُو إِ لْمَاسِيحْ، أَمنِّي عَاوذْ ثِيمْغَارِينْ إِ إِدْجَانْ أَذُو إِ يرْيَازنْ نْسنْثْ ذِي مَارَّا.
25 أَ إِرْيَازنْ، خْسمْ ثِيمْغَارِينْ نْومْ أَمْ مَامّشْ ثُوغَا إِخْسْ لْمَاسِيحْ ثَامسْمُونْثْ ؤُشَا إِسلّمْ إِخفْ نّسْ ذِي طّْوعْ نّسْ، ▪ 26 حِيمَا أَذْ ت يَارّْ ذ ثَامْقدَّاسْثْ ؤُ أَذْ أَسْ إِسِّيزْذڭْ س ؤُسِيرْذْ ن وَامَانْ ؤُ س وَاوَاڒْ. ▪ 27 نتَّا أَذْ إِڭّْ ثَامسْمُونْثْ قِيبَاتْشْ إِ يِيخفْ نّسْ س ؤُعُودْجِي بْڒَا أَبقِّيضْ نِيغْ أَشبْرِيقْ، مَاشَا أَذْ ثِيڒِي ذ ثَامْقدَّاسْثْ ؤُ بْڒَا ڒْعِيبْ. ▪
28 أَمُّو إِتّْخصَّا أَذْ خْسنْ يرْيَازنْ ثِيمْغَارِينْ نْسنْ أَمْ أَرِّيمثْ نْسنْ. أَقَا ونِّي إِتّخْسنْ ثَامْغَارْثْ نّسْ، أَقَا إِتّخْسْ إِخفْ نّسْ. 29 ؤُڒَا ذ إِجّْ وَارْ إِشَارْهْ دَّاثْ نّسْ، مَاشَا إِسّشَّا ث، إِتّْحَاوَاڒْ خَاسْ أَمْ مَامّشْ إِتّْحَاوَاڒْ عَاوذْ لْمَاسِيحْ خْ ثْمسْمُونْثْ. 30 مِينْزِي نشِّينْ ذ إِخْفَاونْ ن أَرِّيمثْ نّسْ، ن ويْسُومْ نّسْ ؤُ ن إِغْسَانْ نّسْ. ▪
31 س ؤُينِّي أَرْيَازْ أَذْ يجّْ يمَّاسْ ذ بَابَاسْ مَاحنْذْ أَذْ إِقّنْ غَارْ ثمْغَارْثْ نّسْ، أَذْ إِڒِينْ س ثْنَاينْ إِذْسنْ ذ إِشْثْ ن أَرِّيمثْ. ▪ 32 سِّيرّْ-أَ ذ أَمقّْرَانْ، مَاشَا نشّْ قَّارغْ ث زِي جِّيهثْ ن لْمَاسِيحْ ذ ثْمسْمُونْثْ. 33 وَاخَّا أَمنِّي إِتّْخصَّا إِ كُوڒْ إِجّْ زَّايْومْ أَذْ إِخْسْ ثَامْغَارْثْ نّسْ أَمْ مَامّشْ إِخفْ نّسْ، مَاشَا ثَامْغَارْثْ أَذْ ثْوقَّارْ أَرْيَازْ.