‏1 مَاڒَا خنِّي غَارْومْ شَا ن ؤُفوّجْ ذِي لْمَاسِيحْ، أَفوّجْ إِ د إِكِّينْ زِي ثَايْرِي، نِيغْ ثَامُونْثْ ن أَرُّوحْ، نِيغْ ڒحْنُونشْثْ ذِي ذَاخڒْ ذ أَرّحْمثْ، ‏2 كمّْڒمْ ڒفْرَاحثْ إِنُو ؤُمِي غَا إِمُونْ أَرَّايْ نْومْ، أَذْ غَارْومْ ثِيڒِي ثَايْرِي ذ إِشْثنْ، ذ ڒعْمَارْ ذ إِجّنْ ؤُڒَا ذ ؤُخَارَّاصْ ذ إِجّنْ. ^▪   ‏3 وَارْ تّڭّمْ شَا ؤُڒَا ذ إِشْثْ ن ڒْحَاجّثْ س ؤُمْشُوبّشْ نِيغْ زِي ثُوفّثْ إِخْوَانْ، مَاشَا أجّْ أَذْ إِوقَّارْ إِجّْ ونّغْنِي كْثَارْ زڭْ إِخفْ نّسْ س ؤُوَاضعْ. ^▪   ‏4 وَارْ إِخزَّارْ ؤُڒَا ذ إِجّْ غَارْ إِخفْ نّسْ وَاهَا، مَاشَا أجّْ كُوڒْ إِجّْ أَذْ إِخْزَارْ عَاوذْ غَارْ ؤُمْقَارّبْ نّسْ. ^▪   ‏5 أجّْ أَذْ ذَايْومْ ثِيڒِي نّيّثْ إِ ثُوغَا ذِي يشُّو لْمَاسِيهْ، ^▪   ‏6 ونِّي إِدْجَانْ ذِي صِّيفثْ ن أَربِّي، وَارْ إِحْسِيبْ شَا ذ ثُوشّفّْرَا ؤُمِي ذَايسْ ثَاروْسَا ن أَربِّي، ^▪   ‏7 مَاشَا إِسّخْوَا إِخفْ نّسْ، إِكْسِي صِّيفثْ ن ؤُمْسخَّارْ. نتَّا ثُوغَا ذڭْ وَارْوَاسْ ن بْنَاذمْ، أَقَا إِتّْوَافْ ذِي صِّيفثْ ن ورْيَازْ. ^▪   ‏8 نتَّا إِسّْوَاضعْ إِخفْ نّسْ ؤُشَا إِذْوڒْ إِطَاعْ أَڒْ ڒْموْثْ، وَاهْ أَڒْ ڒْموْثْ ن صَّالِيبْ. ^▪   ‏9 خْ مَانْ أَيَا إِسُّوعْڒَا إِ-ث أَربِّي قَاعْ سنّجْ ؤُشَا إِوْشَا أَسْ إِسمْ سنّجْ إِ كُوڒْ إِسمْ، ^▪  

‏10 حِيمَا ذڭْ يِيسمْ ن يشُّو أَذْ أَضَارنْ مَارَّا إِفَادّنْ ن يِينِّي إِدْجَانْ ذڭْ ؤُجنَّا ؤُ خْ ثمُّورْثْ ؤُ سَاذُو ثمُّورْثْ، ^▪  

‏11 ؤُ حِيمَا أَذْ إِشْهذْ كُوڒْ إِڒسْ بلِّي يشُّو لْمَاسِيحْ ذ سِيذِي إِ ؤُعُودْجِي ن أَربِّي، بَابَاسْ. ^▪  

‏12 س ؤُينِّي، أَ إِمْعِيزّنْ إِنُو، أَمْ ثُوغَا ثطَّاعمْ قْبڒْ، وَارْ إِدْجِي وَاهَا خْمِي حْضَارغْ، ڒخُّو عَاذْ كْثَارْ خْمِي غَابغْ، خذْممْ إِ ثُوذَارْثْ نْومْ س ثِيڭّْوُوذِي ذ ثَارْجِيجَاثْ،

‏13 مِينْزِي أَربِّي ذ ونِّي ذَايْومْ إِخدّْمنْ أَڒْ غَا ثخْسمْ ؤُ أَذْ ثڭّمْ زڭْ إِنِّي ذِي ثْمّژْڒمْ كنِّيوْ. ^▪  

‏14 ڭّمْ مَارَّا بْڒَا ڒعْكَاسثْ ؤُ بْڒَا أَمْشُوبّشْ، ^▪  

‏15 حِيمَا أَذْ ثِيڒِيمْ بْڒَا ڒْعِيبْ، أَمْ ثَارْوَا إِمزْذَاڭنْ ن أَربِّي إِنِّي إِزدّْغنْ ذِي ڒْوسْثْ ن جِّيڒْ إِعوّْجنْ ذ إِفَارْغنْ، أَذْ ثْشعْشعمْ جَارْ أَسنْ أَمْ ثِيفَاوِينْ ذِي دُّونشْثْ، ^▪  

‏16 مَاحنْذْ أَذْ ثِيڒِيمْ إِ نِيثْنِي ذڭْ ومْشَانْ ن ثُوذَارْثْ، حِيمَا أَذْ غَارِي يِيڒِي أَسمْغَارْ ذڭْ وَاسّْ ن لْمَاسِيحْ، وَارْ ؤُيُورغْ نِيغْ خذْمغْ بَاطڒْ. ^▪  

‏17 مَاشَا مَاڒَا تّتّْوَارُوشّغْ أَمْ إِشْثْ ن ثضْحِييثْ ن ثِيسِّيثْ خْ ثْغَارْصْثْ ؤُ خْ ثْسخَّارْثْ ذِي طّْوعْ ن لْ-إِيمَانْ نْومْ، أَذْ فَارْحغْ عَاوذْ ؤُشَا أَذْ أَرشْقغْ أَكِيذْومْ مَارَّا. ^▪  

‏18 خنِّي فَارْحمْ ؤُشَا ثْفَارْحمْ أَكِيذِي.

‏19 نشّْ سِّيثِيمغْ ذِي سِيذِيثْنغْ يشُّو، أَذْ أَومْ-د سّكّغْ ثِيمُوثِييُو ذغْيَا، حِيمَا أَذْ إِڒِيغْ خْ ڒْخَاضَارْ إِنُو خْمِي إِ غَا سّْنغْ أَمدُّورْ نْومْ. ^▪   ‏20 مِينْزِي وَارْ غَارِي ذَانِيثَا ؤُڒَا ذ إِجّنْ أَمْ مَامّشْ نّغْنِي إِكسِّي س ومْنُوسْ خْ مَامّشْ إِفّغْ ؤُمدُّورْ نْومْ س نّيّثْ ذ إِشْثنْ أَكِيذِي. ‏21 مِينْزِي مَارَّا إِنّغْنِي يَارزُّونْ ذِي مِينْ نْسنْ، وَارْ إِدْجِي ذِي مِينْ إِدْجَانْ ن يشُّو لْمَاسِيحْ. ^▪   ‏22 كنِّيوْ ثسّْنمْ ثَاقدْجبْثْ نّسْ، بلِّي ثُوغَا إِخدّمْ أَكِيذِي ذِي ثْبَارّحْثْ ن ڒخْبَارْ أَصبْحَانْ أَمشْنَاوْ أَحنْجِيرْ غَارْ بَابَاسْ. ‏23 نتَّا ذ ونِّي سِّيثِيمغْ أَذْ غَارْومْ د-سّكّغْ ذغْيَا، خْمِي إِ غَا ژَترغْ مَامّشْ إِ غَا إِفّغْ ؤُمدُّورْ إِنُو. ‏24 مَاشَا تِّيقّغْ ذِي سِيذِي، بلِّي عَاوذْ نشّْ سِيمَانْثْ إِنُو أَذْ د-أَسغْ ذغْيَا.

‏25 مَاشَا إِتّْغِيڒْ أَيِي بلِّي ثُوغَا إِتّْخصَّا أَذْ د-أَومْ سّكّغْ إِبَافْرُوذِيثُوسْ، ؤُمَا، ونِّي ذ أَمْعَاونْ إِنُو ذ أَمْسخَّارْ أَكِيذِي، مَاشَا نتَّا عَاوذْ ذ رَّاسُولْ نْومْ ذ أَمْسخَّارْ نْومْ ذِي مِينْ حْذَاجغْ. ^▫   ‏26 مِينْزِي ثُوغَا إِوحّشْ أَطَّاسْ أَذْ كنِّيوْ إِژَارْ مَارَّا، ؤُشَا ثُوغَا إِكْسِي س ومْنُوسْ مِينْزِي كنِّيوْ ثسْڒِيمْ بلِّي ثُوغَا إِهْڒشْ. ‏27 ثُوغَا إِهْڒشْ أَڒْ ڒْموْثْ، مَاشَا أَربِّي ثُوغَا يَارْحمْ إِ-ث، وَارْ إِدْجِي نتَّا وَاهَا، أَحقَّا ؤُڒَا ذ نشّْ، حِيمَا وَارْ غَارِي إِتِّيڒِي ؤُفقُّوصْ خْ ؤُفقُّوصْ. ‏28 س ؤُينِّي سّكّغْ ث س ثَازْڒَا أَطَّاسْ، حِيمَا، خْمِي ث غَا ثْژَارمْ، أَذْ ثْفَارْحمْ عَاوذْ ؤُشَا أَذْ ذَايِي يِيڒِي ذْرُوسْ ن ومْنُوسْ. ‏29 س ؤُينِّي قبْڒمْ ث ذِي سِيذِي، س مَارَّا ڒفْرَاحثْ، وقَّارمْ إِنِّي إِدْجَانْ أَمْ وَانِيثَا، ^▪   ‏30 مِينْزِي خْ سِّيبّثْ ن ڒْخذْمثْ ن لْمَاسِيحْ، ثُوغَا إِقَارّبْ غَارْ ڒْموْثْ أَمْ إِسبّڒْ ثُوذَارْثْ نّسْ مَاحنْذْ أَذْ إِكمّڒْ مِينْ إِنقْصنْ ذِي ثْسخَّارْثْ نْومْ إِ نشّْ.