‏1 بُولُوسْ، رَّاسُولْ ن يشُّو لْمَاسِيحْ عْلَاحْسَابْ ڒْخَاضَارْ ن أَربِّي، إِ ينِّي إِ يدْجَانْ ذ إِمْقدَّاسنْ ذ إِمْثِيقَّانْ ذِي يشُّو لْمَاسِيحْ ذِي أَفَاسُوسْ. ^▫  ▪   ‏2 أَرْضَا ذ ڒهْنَا أَذْ كِيذْومْ إِڒِينْ زِي أَربِّي، بَابَاثْنغْ، ؤُ زِي سِيذِيثْنغْ يشُّو لْمَاسِيحْ. ^▪  

‏3 أَذْ إِتّْوَابَاركْ أَربِّي، ثَابَابَاثْ ن سِيذِيثْنغْ يشُّو لْمَاسِيحْ، ونِّي ذ أَنغْ إِبَارْكنْ س مَارَّا لْبَارَاكَاثْ ن أَرُّوحْ إِ إِدْجَانْ ذڭْ ؤُجنَّا ذِي لْمَاسِيحْ، ^▪   ‏4 أَمْ مَامّشْ ثُوغَا ذ أَنغْ إِخْضَارْ ذَايسْ قْبڒْ مَا أَذْ إِتّْوَاڭّْ ذْسَاسْ ن دُّونشْثْ، حِيمَا أَذْ نِيڒِي ذ إِمْقدَّاسنْ بْڒَا ڒْعِيبْ قِيبَاتْشْ نّسْ. ^▪  

‏5 أَقَا ذِي ثَايْرِي إِزْوَارْ أَذْ أَنغْ إِڭّْ ذ إِحنْجِيرنْ إِ يِيخفْ نّسْ ذِي يشُّو لْمَاسِيحْ أَمْ مَامّشْ ث إِخْسْ ڒْخَاضَارْ نّسْ، ‏6 إِ ؤُسمْغَارْ ن ؤُعُودْجِي ن أَرْضَا نّسْ إِ خَانغْ إِفَارّغْ ذڭْ ؤُمْعِيزّْ. ^▪  

‏7 ذَايسْ غَارْنغْ أَصْڒَاحْ س إِذَامّنْ نّسْ، أَغْفَارْ ن دّْنُوبْ عْلَاحْسَابْ أَڭْڒَا ن أَرْضَا نّسْ، ^▪   ‏8 إِ ثُوغَا ذ أَنغْ إِوْشَا س ؤُفيّضْ ذِي مَارَّا ثِيغِيثْ ذ ڒفْهَامثْ س أَرُّوحْ. ‏9 أَقَا إِسَّارْڭبْ أَنغْ خْ سِّيرّْ ن ڒْخَاضَارْ نّسْ، إِ ثُوغَا إِزْعمْ قْبڒْ أَذْ ث إِكمّڒْ ذڭْ يِيخفْ نّسْ، ^▪  

‏10 حِيمَا، إِ ڒحْكَامثْ ن ؤُعمَّارْ ن إِكُوذنْ، أَذْ د-إِخْڒقْ مَارَّا مِينْ إِدْجَانْ ذڭْ إِجنْوَانْ ؤُ خْ ثمُّورْثْ ذ جْذِيذْ زڭْ ؤُزدْجِيفْ س لْمَاسِيحْ. ^▪  

‏11 أَقَا نتّْوَاخْضَارْ ذَايسْ، أَمْ مَامّشْ إِ خَانغْ إِڭَّا ؤُ ثُوغَا إِخْسْ أَذْ إِڭّْ عْلَاحْسَابْ لْقَارَارْ ن أَرَّايْ نّسْ، ^▪  

‏12 حِيمَا نشِّينْ، إِنِّي ذ إِمزْوُورَا إِ إِسِّيثِيمنْ ذِي لْمَاسِيحْ، أَذْ نِيڒِي إِ ؤُسمْغَارْ ن ؤُعُودْجِي نّسْ.

‏13 زَّايسْ أَقَا ثسْڒِيمْ أَوَاڒْ ن ثِيذتّْ، ڒخْبَارْ أَصبْحَانْ ن ؤُسنْجمْ نْومْ، ؤُشَا أَوَارْنِي ڒَامِي ثُومْننْ ذَايسْ، ثكْسِيمْ أَشمِّيعْ ن أَرُّوحْ إِقدّْسنْ إِ ذ أَنغْ إِوَاعْذْ، ^▪  

‏14 ونِّي ذ ڒْعَارْپُونْ ن ڒْوَارْثْ نّغْ إِ وصْڒَاحْ ن يِينِّي إِدَّارنْ ؤُ إِ ؤُسمْغَارْ ن ؤُعُودْجِي نّسْ. ^▪  

‏15 خْزَارْ، س ؤُينِّي نشّْ، ڒَامِي سْڒِيغْ خْ لْ-إِيمَانْ نْومْ ذِي سِيذِيثْنغْ يشُّو لْمَاسِيحْ ؤُ خْ ثَايْرِي نْومْ إِ مَارَّا إِمْقدَّاسنْ، ^▪  

‏16 وَارْ بدّغْ شَا أَذْ كنِّيوْ قَاذِيغْ نِيغْ أَذْ ذَايْومْ فكَّارغْ ذِي ثْژِيدْجَاثِينْ إِنُو،

‏17 حِيمَا أَربِّي ن سِيذِيثْنغْ يشُّو لْمَاسِيحْ، ثَابَابَاثْ ن ؤُعُودْجِي، أَذْ أَومْ إِوْشْ أَرُّوحْ ن ثِيغِيثْ ذ ؤُسَارْڭبْ حِيمَا أَذْ ث ثسّْنمْ،

‏18 ؤُشَا أَذْ أَومْ يَارْزمْ ثِيطَّاوِينْ ن ڒعْقڒْ نْومْ، حِيمَا أَذْ ثسّْنمْ مَانْ أَسِيثمْ ن ثْڒَاغِيثْ نّسْ ذ مَامّشْ إِمْغَارْ أَڭْڒَا ن ؤُعُودْجِي ن ڒْوَارْثْ نّسْ ذِي مَارَّا إِمْقدَّاسنْ.

‏19 ذ مَامّشْ إِمْغَارْ أَطَّاسْ إِدْجْ جّهْذْ نّسْ إِ مَارَّا إِنِّي يُومْننْ عْلَاحْسَابْ ڒْخذْمثْ ن جّهْذْ ن صُّولْطَا نّسْ ^▪   ‏20 إِ إِخدّْمنْ ذِي لْمَاسِيحْ ؤُمِي ث-إِ-د-إِسّْنكَّارْ زِي ثَادَّارْثْ ن إِمتِّيننْ ؤُشَا إِڭَّا إِ-ث غَارْ ؤُغزْذِيسْ أَفُوسِي نّسْ ذڭْ ؤُجنَّا، ^▪   ‏21 سنّجْ إِ كُوڒْ أَزدْجِيفْ ذ صُّولْطَا ذ جّهْذْ ذ ڒحْكَامثْ ذ مَارَّا إِسمْ إِتّْوَاسمَّانْ، مَاشِي ذِي دُّونشْثْ-أَ وَاهَا، مَاشَا عَاوذْ ذِي ثنِّي إِ د غَا يَاسنْ. ‏22 أَقَا نتَّا يَارَّا أَسْ-د مَارَّا سَاذُو إِضَارنْ نّسْ ؤُ ونِّي إِدْجَانْ سنّجْ إِ مَارَّا، أَقَا إِڭَّا إِ-ث ذ أَزدْجِيفْ إِ ثْمسْمُونْثْ، ^▪   ‏23 ثنِّي ذ أَرِّيمثْ نّسْ ؤُڒَا ذ أَعمَّارْ ن ونِّي إِتّْعمَّارنْ كُوڒْشِي ذِي مَارَّا. ^▫  ▪