‏1 ؤُڒَا ذ كنِّيوْ، ثُوغَا ثمُّوثمْ س دّْنُوبْ نْومْ ؤُ س ثُوبُّوهڒْيَا نْومْ ^▪   ‏2 مِينْ ذِي ثُوغَا ثُويُورمْ عْلَاحْسَابْ ثُوذَارْثْ ن كُوڒْ أَسّْ ن دُّونشْثْ-أَ، عْلَاحْسَابْ أَزدْجِيفْ ن صُّولْطَا خْ وَازَّايْ ن ڒعْوِينْ، ؤُ ن صُّولْطَا خْ أَرُّوحْ إِ إِخدّْمنْ ذِي ثَارْوَا ن ڒْمُوعْصِييّثْ. ^▪   ‏3 ثُوغَا نشْغڒْ عَاوذْ ذِي ڒخْذَايمْ نِّي، ؤُمِي نضْفَارْ نّشْوَاثْ ن أَرِّيمثْ ثَامذْنُوبْثْ نّغْ، نڭَّا مِينْ إِخْسْ أَرِّيمثْ ثَامذْنُوبْثْ ذ نّيّثْ نّغْ، ؤُ ثُوغَا أَنغْ ذ ثَارْوَا ن وغْضَابْ قَاعْ أَمشْنَاوْ إِنّغْنِي.

‏4 مَاشَا أَربِّي إِشُّورْ س أَرّحْمثْ س ثَايْرِي ثَامقّْرَانْثْ نّسْ إِ زِي خَانغْ إِعِيزّْ. ‏5 ڒَامِي ثُوغَا أَنغْ عَاذْ ذ إِمتِّيننْ ذڭْ إِخطَّانْ، أَقَا يَارّْ أَنغْ-د غَارْ ثُوذَارْثْ أَكْ-ذ لْمَاسِيحْ ؤُ س أَرْضَا نّسْ إِسّنْجمْ أَنغْ، ^▪   ‏6 ؤُ إِسّْنكَّارْ أَنغْ-د ؤُشَا إِسّْغِيمَا أَنغْ أَكْ-ذ يِيخفْ نّسْ ذڭْ ؤُجنَّا ذِي يشُّو لْمَاسِيحْ، ‏7 حِيمَا أَذْ إِسّْشنْ أَفيّضْ ن وَاڭْڒَا ن أَرْضَا نّسْ ذ ثْشُونِي نّسْ ذڭْ إِكُوذنْ إِ د غَا يَاسنْ، ونِّي خَانغْ د-يُوسِينْ س يشُّو لْمَاسِيحْ. ‏8 مِينْزِي س أَرْضَا نتّْوَاسنْجمْ، س لْ-إِيمَانْ، وَارْ إِدْجِي زَّايْومْ، أَقَا-ت ذ ثَاموْشِي ن أَربِّي، ^▫  ▪   ‏9 وَارْ ثدْجِي س ڒْخذْمثْ، مَاحنْذْ وَارْ إِتُّوفّْ ؤُڒَا ذ إِجّْ. ^▪  

‏10 مَاغَارْ نشِّينْ نتّْوَاڭّْ زَّايسْ، نتّْوَاخْڒقْ-د ذِي يشُّو لْمَاسِيحْ حِيمَا أَذْ نڭّْ ڒخْذَايمْ ثِيصبْحَانِينْ نِّي ذ أَنغْ إِسّوْجذْ أَربِّي قْبڒْ مَاحنْذْ أَذْ نُويُورْ ذَايْسنْثْ. ^▪  

‏11 س ؤُينِّي عقْڒمْ، أَقَا زِيشْ ثُوغَا كنِّيوْ ذ ڒڭْنُوسْ عْلَاحْسَابْ جَّاذِيرَا ن أَرِّيمثْ، ثتّْوَاسمَّامْ ’نْبْڒَا أَخْثَانْ‘ زڭْ إِنِّي ثُوغَا س وخْثَانْ نِّي إِدْجَانْ ذ ڒْخذْمثْ ن إِفَاسّنْ ذڭْ ويْسُومْ.

‏12 ڒخْذنِّي ثُوغَا كنِّيوْ ثبْضَامْ خْ لْمَاسِيحْ، ثتّْوَاقسّمْ زِي ڒحْكَامثْ ن إِسْرَائِيل، أَقَا ثڭّْوجمْ أَمْ إِبَارَّانِييّنْ خْ ڒْعَاهْذْ ن لْوَاعْذْ. وَارْ ذَايْومْ ثُوغِي ؤُسِيثمْ، وَارْ غَارْومْ ثُوغِي أَربِّي ذِي دُّونشْثْ. ^▪  

‏13 مَاشَا ڒخُّو، ذِي يشُّو لْمَاسِيحْ، أَقَا كنِّيوْ إِنِّي ثُوغَا إِڭّْوجنْ، أَقَا ڒخُّو ثُوذْسمْ-د س إِذَامّنْ ن لْمَاسِيحْ.

‏14 مَاغَارْ نتَّا ذ ڒهْنَا نّغْ أَمْ د-يَارَّا ثْنَاينْ نِّي غَارْ يِيجّْ، أَقَا نتَّا إِهْذمْ أَغْبَارْ ن ڒقْوَارْ ونِّي ثُوغَا ثنْ إِبْضَانْ. ^▪  

‏15 ؤُشَا خنِّي إِبْضڒْ ذڭْ ويْسُومْ ن أَرِّيمثْ نّسْ ڒعْذَاوثْ، ثنِّي ذ شَّارِيعَا س ڒُومُورْ ذ ثْوصَّا نّسْ، حِيمَا أَذْ د-إِخْڒقْ ذڭْ إِخفْ نّسْ ثْنَاينْ نِّي غَارْ إِجّْ ن بْنَاذمْ ن جْذِيذْ، أَمْ إِتّڭّْ ڒهْنَا.

‏16 أَقَا نتَّا إِسّصْڒحْ ثْنَاينْ نِّي أَكْ-ذ أَربِّي ذڭْ إِشْثْ ن أَرِّيمثْ ؤُ إِنْغَا ڒعْذَاوثْ س صَّالِيبْ نّسْ.

‏17 يُوسَا-د حِيمَا أَذْ إِبَارّحْ س ڒهْنَا إِ ينِّي إِ ثُوغَا إِڭّْوجنْ ؤُ إِ ينِّي إِ ثُوغَا يُوذْسنْ، ^▪  

‏18 مِينْزِي زَّايسْ نْزمَّارْ أَذْ نَاذفْ س ثْنَاينْ إِذْنغْ س يِيجّْ ن أَرُّوحْ غَارْ ثْبَابَاثْ. ^▪  

‏19 أَمُّو كنِّيوْ وَارْ ثدْجِيمْ ذ إِبَارَّانِييّنْ ؤُڒَا ذ إِمعْزَابْ، مَاشَا كنِّيوْ ذ ثَارْوَا ن ثنْذِينْثْ ن ؤُمْقدَّاسْ ذ أَيْثْبَابْ ن ثَادَّارْثْ ن أَربِّي. ^▪   ‏20 ثتّْوَابْنَامْ خْ ذْسَاسْ ن رُّوسُولْ ذ إِنَابِييّنْ، ؤُشَا أَژْرُو ن ثغْمَارْثْ أَقَا-ث ذ يشُّو لْمَاسِيحْ. ^▫  ▪   ‏21 زَّايسْ إِ غَا إِتّْوَابْنِي ڒبْنِي مَارَّا ؤُشَا أَذْ إِمْغَارْ أَذْ إِذْوڒْ ذ إِشْثْ ن زَّاوشْثْ إِقدّْسنْ ذِي سِيذِي، ^▪   ‏22 أَمْ زَّايسْ إِ غَا ثتّْوَابْنَامْ ؤُڒَا ذ كنِّيوْ، أَذْ ثِيڒِيمْ ذ ثَازذِّيغْثْ ن أَربِّي ذِي أَرُّوحْ.