4
1 إِوَا، أَ أَيْثْمَا إِعِيزّنْ إِنِّي إِ وحّْشغْ، كنِّيوْ إِنِّي ذ ڒفْرَاحثْ إِنُو ذ تَّاجْ إِنُو، بدّمْ نِيشَانْ ذِي سِيذِيثْنغْ، أَ إِمْعِيزّنْ! ▪ 2 نشّْ تّْشجّْعغْ ؤُوُوذِييَا ذ سِينْثِيشِي مَاحنْذْ أَذْ إِمُونْ أَرَّايْ نْسنْثْ ذِي سِيذِيثْنغْ.
3 تّتَّارغْ عَاوذْ زَّايكْ، أَ أَمْعَاشَارْ أَمْثِيقِّي إِنُو، أَذْ ثْعَاوْنذْ إِنِّي خدّْمنْ أَكِيذِي خْ سِّيبّثْ ن ثْبَارّحْثْ ن ڒخْبَارْ أَصبْحَانْ، أَكْ-ذ كْلِيمنْسْ ذ إِمْسخَّارنْ إِنّغْنِي إِنِّي أَكِيذِي، إِنِّي إِسْمَاونْ نْسنْ أَقَا-ينْ ذڭْ وذْلِيسْ ن ثُوذَارْثْ. ▪
4 فَارْحمْ ڒبْذَا ذِي سِيذِيثْنغْ، ؤُ نشّْ قَّارغْ عَاوذْ: فَارْحمْ! ▪ 5 أَذْ يِيڒِي ؤُوَاضعْ نْومْ إِتّْوَاسّنْ غَارْ إِوْذَانْ مَارَّا. سِيذِيثْنغْ أَقَا يُوذسْ. ▪ 6 وَارْ كسِّيمْ شَا س ومْنُوسْ خْ وَالُو، مَاشَا أَذْ يِيڒِي مَارَّا مِينْ ثتَّارمْ ڒبْذَا إِتّْوَاسّنْ غَارْ أَربِّي س ثْژَادْجِيثْ ذ ثْكسِّيثْ ن ڒْمعْرُوفْ أَكْ-ذ ؤُقَاذِي. ▪ 7 ؤُشَا ڒهْنَا ن أَربِّي إِ إِعْذُونْ مَارَّا ڒفْهَامثْ أَذْ إِحْضَا ؤُڒَاونْ ذ إِخَارِّيصنْ نْومْ ذِي يشُّو لْمَاسِيحْ. ▪
8 غَارْ ؤُنڭَّارْ، أَ أَيْثْمَا، مَارَّا مِينْ إِدْجَانْ ذ ثِيذتّْ، مَارَّا مِينْ إِقُّورنْ، مَارَّا مِينْ إِسڭّْذنْ، مَارَّا مِينْ إِزْذِيڭنْ، مَارَّا مِينْ إِعِيزّنْ، مَارَّا مِينْ غَارْ إِدْجْ ڒْحسّْ أَصبْحَانْ، ؤُ مَارَّا مِينْ غَا إِسْذَاهدْجنْ شَّانْ ذ ؤُسمْغَارْ، خَارْصمْ ذَايسْ. ▪ 9 مِينْ ثغْرِيمْ ؤُ ثْقبْڒمْ، مِينْ ثسْڒِيمْ ؤُ ثژْرِيمْ ذَايِي، ڭّمْ ت، ؤُشَا أَربِّي ن ڒهْنَا أَذْ كِيومْ يِيڒِي!
أَوَاڒْ ذ ؤُسدْجمْ أَنڭَّارُو
10 أَقَا فَارْحغْ أَطَّاسْ ذِي سِيذِيثْنغْ ؤُمِي أَسْحِيسّفْ نْومْ أَكِيذِي إِتّْوَاڒقّمْ، أَمْ مَامّشْ ثُوغَا ذَايْومْ أَمْنُوسْ ڒبْذَا، مَاشَا وَارْ ثُوفِيمْ شَا ثَاوَّارْثْ مَاحنْذْ أَذْ ثڭّمْ شَا. ▪
11 وَارْ ت نِّيغْ، مِينْزِي نشّْ حْوَاجغْ شَا، مِينْزِي ڒمْذغْ أَذْ قنْعغْ مَامّشْ مَا د-ثُوسَا. ▪
12 نشّْ زمَّارغْ أَذْ قوْسغْ ؤُشَا أَقَا سّْنغْ ؤُمِي قَّارنْ أَفيّضْ. مَانِي مَّا ؤُ ذِي مَارَّا أَقَا ڒمْذغْ، ذِي ثْيَاوَانْثْ، ذِي ڒَاژْ ؤُڒَا ذِي ثْيَاوَانْثْ ذ ڒغْبنْ. ▪
13 قدّغْ قَاعْ زِي لْمَاسِيحْ ونِّي ذ أَيِي إِوْشِينْ جّهْذْ.
14 وَاخَّا أَمنِّي مْلِيحْ ڒَامِي ذ أَيِي ثوْشِيمْ أَفُوسْ ذِي ڒْمحْنثْ إِنُو.
15 ثسّْنمْ عَاوذْ سِيمَانْثْ نْومْ، أَ إِفِيلِيبِّييّنْ، بلِّي غَارْ ؤُمزْوَارُو ن ثْبَارّحْثْ ن ڒخْبَارْ أَصبْحَانْ ؤُمِي د-فّْغغْ زِي مَاكِيذُونِييَا، ؤُڒَا ذ إِشْثْ ن ثْمسْمُونْثْ وَارْ ثڭِّي أَكِيذِي ڒحْسَابْ خْ مِينْ وْشِينْ ذ مِينْ كْسِينْ، مْغِيرْ ثنِّي نْومْ وَاهَا. ▪
16 مِينْزِي عَاوذْ ذِي ثِيسَّالُونِيكَا ثسّكّمْ أَيِي-د مِينْ ذ أَيِي إِتّْخصَّانْ، إِجّْ ن ؤُمُورْ ؤُ إِجّْ ن ؤُمُورْ نّغْنِي.
17 وَارْ أَرزُّوغْ ثِيموْشَا، مَاشَا أَرزُّوغْ ڒْغِيدْجثْ ثنِّي إِوسّْعنْ أَطَّاسْ ذِي ڒحْسَابْ نْومْ.
18 نشّْ طّْفغْ كُوڒْشِي ؤُ غَارِي كُوڒْشِي س زّْيَاذَا، أَقَا جِّيوْنغْ. نشّْ كْسِيغْ مَارَّا مِينْ ذ أَيِي إِ-د ثسّكّمْ س ؤُفُوسْ ن إِبَافْرُوذِيثُوسْ: إِشْثْ ن ڒفْوَاحثْ إِتّْفُوحنْ ذ ثَاغَارْصْثْ يَارْضَانْ قِيبَاتْشْ إِ أَربِّي. ▪
19 مَاشَا أَربِّي إِنُو أَذْ إِسّْيِيونْ مَارَّا ڒغْبنْ نْومْ عْلَاحْسَابْ أَڭْڒَا نّسْ ذڭْ ؤُعُودْجِي إِ إِدْجَانْ ذِي يشُّو لْمَاسِيحْ. 20 أَقَا إِ أَربِّي، بَابَاثْنغْ، أَذْ غَارسْ يِيڒِي ؤُعُودْجِي إِ ڒبْذَا قَاعْ. أَمِينْ.
21 سدْجْممْ خْ كُوڒْ إِمْقدَّاسنْ ذِي يشُّو لْمَاسِيحْ س ڒهْنَا.
أَوْمَاثنْ إِنِّي أَكِيذِي تّْسدْجَامنْ خَاومْ س ڒهْنَا.
22 أَقَا مَارَّا إِمْقدَّاسنْ تّْسدْجَامنْ خَاومْ س ڒهْنَا، أَمزْوَارُو إِنِّي إِدْجَانْ زِي ثَادَّارْثْ ن قَايْصَارْ.
23 أَرْضَا ن سِيذِيثْنغْ يشُّو لْمَاسِيحْ أَذْ يِيڒِي أَكِيذْومْ مَارَّا. أَمِينْ.