‏1 بُولُوسْ، رَّاسُولْ ن يشُّو لْمَاسِيحْ، عْلَاحْسَابْ ڒُومُورْ ن أَربِّي، ڒْعُونْصَارْ نّغْ ن ثُوذَارْثْ، ؤُ ن لْمَاسِيحْ يشُّو، أَسِيثمْ نّغْ. ^▫  ▪   ‏2 إِ ثِيمُوثِييُو، مِّي ذ ثِيذتّْ ذِي لْ-إِيمَانْ: أَرْضَا ذ أَرّحْمثْ ذ ڒهْنَا زِي أَربِّي، بَابَاثْنغْ، ؤُ زِي لْمَاسِيحْ يشُّو، سِيذِيثْنغْ. ^▪  

‏3 ڒَامِي رُوحغْ غَارْ مَاكِيذُونِييَا زَاوْڭغْ شكْ أَذْ ثقِّيمذْ ذِي أَفَاسُوسْ حِيمَا أَذْ ثُومُورذْ إِ شَا ن يرْيَازنْ حِيمَا وَارْ سّڒْمِيذنْ شَا أَسڒْمذْ نّغْنِي، ^▪   ‏4 ؤُ حِيمَا وَارْ تِّيشنْ شَا ثَايْنِيثْ إِ ثْحُوجَا إِخْوَانْ ذ ثَاصِيڒَاثْ وَارْ إِقطِّينْ نِّي د-إِتَّاوْينْ غَارْ إِمْحَارْوَاضنْ كْثَارْ، وَارْ إِدْجِي غَارْ مِينْ إِدْجَانْ إِ ڒبْنِي ذِي لْ-إِيمَانْ ن أَربِّي. ^▪   ‏5 لْغَارَاضْ ن ثْوصَّا أَقَا ذ ثَايْرِي زڭْ وُوڒْ أَمزْذَاڭْ ذ ثْنفْسشْثْ إِشْنَانْ ذ لْ-إِيمَانْ ذ ثِيذتّْ. ^▪   ‏6 أَقَا ذِينِّي شَا ن يِينِّي إِهيّْضنْ خْ مَانْ أَيَا ؤُشَا نّْقڒْبنْ غَارْ ڒْهَارْضْ إِخْوَانْ. ‏7 نِيثْنِي خْسنْ أَذْ إِڒِينْ ذ إِمسْغَارنْ ن شَّارِيعَا بْڒَا ڒفْهَامثْ ذِي مِينْ قَّارنْ ؤُ خْ مِينْ خفْ تّمْشُوبُّوشنْ. ‏8 مَاشَا نسّنْ بلِّي شَّارِيعَا ثصْبحْ مَاڒَا حذْ إِجَّا إِخفْ نّسْ أَذْ إِتّْوَانْذهْ زَّايسْ عْلَاحْسَابْ شَّارِيعَا، ^▪   ‏9 أَمْ نسّنْ أَقَا شَّارِيعَا وَارْ ثمّوْشْ شَا إِ ؤُمْسڭَّاذْ، مَاشَا إِ ينِّي وَارْ إِسڭّْذنْ ؤُ إِ إِمْغوَّاغنْ، إِ إِعفَّاننْ ذ إِمذْنَابْ، إِ إِمقْجَاحْ، إِ إِمخْمُوجنْ، إِ ينِّي إِوْثِينْ بَابَاثْسنْ ؤُ إِ ينِّي إِوْثِينْ يمَّاثْسنْ ؤُ إِ ينِّي إِنقّنْ إِوْذَانْ، ^▪  

‏10 إِ أَيْثْ ن فَارْقْ-شّْغڒْ ذ زّْوَامڒْ، إِ ينِّي إِتّْسبَّابنْ ذڭْ إِوْذَانْ، إِ أَيْثْ ن بُو-إِخَارِّيقنْ ذ ينِّي إِشهّْذنْ ژُورْ ؤُشَا زعْمَا إِ مَارَّا مِينْ وَارْ د-إِتِّيسنْ شَا أَكْ-ذ ؤُسڒْمذْ إِصحّنْ

‏11 ن ڒخْبَارْ أَصبْحَانْ ن ؤُعُودْجِي ن أَربِّي إِتّْوَابَارْكنْ، ونِّي ذ أَيِي إِتّْوَاوكّْڒنْ. ^▪  

‏12 نشّْ تّْقَاذِيغْ ونِّي ذ أَيِي إِسّْجهْذنْ، أَقَا سِيذِيثْنغْ يشُّو لْمَاسِيحْ، ؤُمِي إِحْسبْ أَيِي-د ذ أَمْثِيقِّي ڒَامِي ذ أَيِي إِڭَّا ذِي ڒْخذْمثْ ن ثْسخَّارْثْ نّسْ،

‏13 نشّْ ذ ونِّي ثُوغَا إِدْجَانْ قْبڒْ ذ أَمْشقَّافْ ذ إِجّْ ن ؤُمَارَّاثْ ن إِمَاسِيحِييّنْ ؤُ ذ إِجّْ ن بُو-ڒْعُونْفْ. مَاشَا ثمّوْشْ أَيِي-د أَرّحْمثْ، مِينْزِي ڭِّيغْ ث وَارْ سِّينغْ، ؤُمِي ذ أَيِي ثُوغَا بْڒَا لْ-إِيمَانْ. ^▪  

‏14 أَرْضَا ن سِيذِيثْنغْ ثُوغَا إِفيّضْ ذَايِي س وَاطَّاسْ، ؤُڒَا ذ لْ-إِيمَانْ ذ ثَايْرِي ثنِّي إِدْجَانْ ذِي يشُّو لْمَاسِيحْ.

‏15 وَا ذ أَوَاڒْ ذَايسْ ڒَامَانْ، إِ إِسْذَاهدْجنْ أَذْ يِيڒِي إِڭُّورْ مَانِي مَّا، أَقَا يشُّو لْمَاسِيحْ يُوسَا-د غَارْ دُّونشْثْ حِيمَا أَذْ إِسّنْجمْ إِمذْنَابْ، إِنِّي زَّايْسنْ نشّْ ذ أَمزْوَارُو. ^▪  

‏16 مَاشَا خْ ؤُيَا كْسِيغْ أَرّحْمثْ مَاحنْذْ يشُّو لْمَاسِيحْ أَذْ إِسّْشنْ ذَايِي ذ أَمزْوَارُو، مَارَّا تَّاسِيعْ ن ڒْخَاضَارْ نّسْ، ذ لْمَاثَالْ إِ ينِّي زَّايسْ إِ غَا يَامْننْ إِ ثُوذَارْثْ إِتّْذُومَانْ.

‏17 أَقَا إِ ؤُجدْجِيذْ ن إِكُوذنْ ن ڒْوقْثْ، ذ ونِّي وَارْ إِفنِّينْ، ذ ونِّي وَارْ إِتّْوِيڒِينْ، ونِّي ذ أَربِّي ذ إِجّْ، أَذْ غَارسْ يِيڒِي شَّانْ ذ ؤُعُودْجِي إِ ڒبْذَا قَاعْ. أَمِينْ.

‏18 ثَاوْصيّثْ-أَ، أَ مِّي ثِيمُوثِييُو، سّْوكّْڒغْ شكْ خَاسْ، حِيمَا أَذْ ثمّنْغذْ أَمنْغِي أَصبْحَانْ عْلَاحْسَابْ نُّوپُووَاثْ إِ خَاكْ نَّانْ قْبڒْ، ^▪  

‏19 س لْ-إِيمَانْ ذ ثْنفْسشْثْ إِشْنَانْ، مَاغَارْ إِنِّي ؤُڭِينْ مَانْ أَيَا، أَقَا سّخْوَانْ إِخفْ نْسنْ زِي لْ-إِيمَانْ. ^▪   ‏20 جَارْ أَسنْ هِيمِينِييُوسْ ذ أَلِيكْسَانْذِيرْ إِنِّي سلّْمغْ إِ شِّيطَانْ حِيمَا أَذْ ڒمْذنْ مَاحنْذْ وَارْ تّْشقَّافنْ. ^▪