‏1 س ؤُينِّي تّْزَاوْڭغْ كنِّيوْ، حِيمَا سنّجْ إِ مَارَّا أَذْ ثْقَارّْبمْ غَارْ أَربِّي س ثُوثْرَا ذ ثْژَادْجِيثِينْ ذ ثْكسِّيثْ س ڒْمعْرُوفْ ذ ؤُقَاذِي ذِي طّْوعْ ن مَارَّا إِوْذَانْ، ‏2 ذِي طّْوعْ ن إِجدْجِيذنْ ذ مَارَّا إِنِّي إِدْجَانْ ذ إِمزْوُورَا، حِيمَا خنِّي أَذْ ندَّارْ ذِي ڒهْنَا ذ ڒْهُوذْنثْ ؤُ س مَارَّا ثِيڭّْوُوذِي ذ ثزْذُوڭِي زَّاثْ أَربِّي، ^▪   ‏3 مِينْزِي مَانْ أَيَا ذ أَصبْحَانْ ؤُ يُوسَا أَسْ-د إِ ڒْخَاضَارْ إِ أَربِّي، ڒْعُونْصَارْ نّغْ ن ثُوذَارْثْ، ‏4 ونِّي إِخْسنْ أَقَا مَارَّا إِوْذَانْ أَذْ طّْفنْ ثُوذَارْثْ ؤُشَا ذوْڒنْ-د غَارْ ثُوسّْنَا ن ثِيذتّْ. ^▪   ‏5 مِينْزِي أَقَا ذِينْ إِجّْ ن أَربِّي ذ إِجّْ ن ؤُمْسصْڒَاحْ جَارْ أَربِّي ذ إِوْذَانْ، أَقَا نتَّا ذ بْنَاذمْ يشُّو لْمَاسِيحْ، ^▪   ‏6 ونِّي إِوْشِينْ إِخفْ نّسْ ذ تَّامَانْ ن وصْڒَاحْ إِ مَارَّا بْنَاذمْ، أَقَا-ت ذ شّْهَاذثْ إِ د-يُوسِينْ ذِي ڒْوقْثْ نّسْ، ^▪   ‏7 إِ ؤُمِي تّْوَاڭّغْ ذ أَمْبَارّحْ ذ رَّاسُولْ، - أَقَا قَّارغْ ثِيذتّْ، وَارْ سّْخَارِّيقغْ شَا - ، ؤُڒَا ذ أَمْسغَّارْ ن ڒڭْنُوسْ ذِي لْ-إِيمَانْ ن ثِيذتّْ. ^▫  ▪  

‏8 خْسغْ خنِّي بلِّي إِرْيَازنْ أَذْ ژَّادْجنْ مَانِيمَّا، أَمْ سّْڭعَّاذنْ إِفَاسّنْ نْسنْ س ثزْذُوڭِي، بْڒَا أَخيّقْ ذ ؤُمْشُوبّشْ. ^▪  

‏9 أَمُّو ؤُڒَا ذ ثِيمْغَارِينْ أَذْ يَارْضنْثْ س ؤُوقَّارْ، إِتّْخصَّا أَذْ زهّْجنْثْ إِخفْ نْسنْثْ س ڒحْيَا ؤُ س ؤُهدّنْ، وَارْ إِدْجِي س ؤُمُوذِي ن ؤُشوَّافْ نِيغْ س وُورغْ نِيغْ س ثْيَاقُوثِينْ نِيغْ س وَارُّوضْ إِغْڒَانْ، ^▪  

‏10 مَاشَا أَذْ زهّْجنْثْ إِخفْ نْسنْثْ س ڒخْذَايمْ إِصبْحنْ أَمْ مَامّشْ د-يُوسَا خْ ثمْغَارِينْ، ثِينِّي إِتّْنجْبَاذنْ غَارْ ؤُوقَّارْ ن أَربِّي.

‏11 أجّْ ثَامْغَارْثْ أَذْ ثڒْمذْ ذِي ڒْهُوذْنثْ، أَكْ-ذ مَارَّا ثَامْوَاضعْثْ،

‏12 مَاشَا نشّْ وَارْ تّجِّيغْ ثَامْغَارْثْ أَذْ ثسّڒْمذْ نِيغْ أَذْ غَارسْ يِيڒِي جّهْذْ خْ ورْيَازْ، مَاشَا أَذْ ثِيڒِي ثسْقَارْ. ^▪  

‏13 مِينْزِي أَذَامْ إِتّْوَاڭّْ ذ أَمزْوَارْ، أَوَارْنِي أَسْ هَاوَا. ^▪  

‏14 ؤُشَا أَذَامْ وَارْ إِتّْوَاغَارّْ شَا، مَاشَا ثَامْغَارْثْ ثتّْوَاغَارّْ، خنِّي ثخْضَا، ^▪  

‏15 مَاشَا أَذْ ثنْجمْ س ثَارْوَا نّسْ، مَاڒَا شبَّارنْ نِيثْنِي ذِي لْ-إِيمَانْ ذ ثَايْرِي ذ ثْقدَّاسْثْ ذ ڒحْيَا.